شىعىس قازاقستاندا سانيتارلىق-ەپيدەميالىق باقىلاۋ دەپارتامەنتىنىڭ باسشىسى قانات تۇرديەۆ ونلاين فورماتتا وتكەن ءباسپاسوز ءماسليحاتىندا كوروناۆيرۋس ينفەكتسياسى بويىنشا ەپيدەميالىق جاعدايدىڭ تۇراقتى ەكەندىگىن ايتتى.
ءوڭىر بويىنشا پاندەميا باستالعالى بەرى جالپى تىركەلگەن ناۋقاستار سانى – 22846-گە جەتكەن. 30 ناۋرىزدا ءوسىم قارقىنى تاۋلىگىنە 0,2%-دى قۇراپ وتىر.
«بيىلعى وقۋ جىلى باستالعالى بەرى 1334 وقۋشى جۇقپالى دەرتكە شالدىققان. ولاردىڭ 678-ءى اۋرۋ بەلگىلەرىمەن, ال 656-سى سيمپتومى جوق ناۋقاستار. 974-ءى قاشىقتان ءبىلىم الىپ جاتقاندار بولسا, 360 بالا كەزەكشى سىنىپتاردا كوروناۆيرۋس جۇقتىردى. سوڭعى اقپاراتتارعا سايكەس 1298 وقۋشى ىندەتتەن جازىلىپ, وقۋىن قايتا جالعاستىرۋدا. ال 35 بالا ۇيدە دارىگەرلەر باقىلاۋىندا», دەدى قانات تۇرديەۆ.
قانات تۇرديەۆتىڭ ايتۋىنشا, سوڭعى قابىلدانعان قاۋلىعا سايكەس وڭىردەگى شەكتەۋ شارالارى 2 ساۋىرگە دەيىن ۇزارتىلعان. قۇجاتتا جازىلعانداي, قوعامدىق تاماقتانۋ وبەكتىلەرىنە اپتانىڭ بارلىق كۇندەرى ساعات 07:00-دەن 24:00-گە دەيىن جۇمىس ىستەۋگە رۇقسات بەرىلگەن.
«سونىمەن قاتار 4 توقساننان باستاپ 300 وقۋشىعا دەيىنگى قالالىق جانە اۋىلدىق مەكتەپ وقۋشىلارى ءداستۇرلى فورماتتا وقيدى. تالاپ بويىنشا ءار سىنىپتاعى بالا سانى 25 ادامنان اسپاۋى ءتيىس. ءبىلىم بەرۋ ۇيىمى اكىمشىلىگىنىڭ شەشىمى بويىنشا ساباقتان تىس ۋاقىتتا 15 ادامنان اسپايتىن توپتا وقۋشىلاردى جەكە وقىتۋعا رۇقسات بەرىلگەن. ال كوللەدجدەر مەن جوعارى وقۋ ورىندارىنىڭ 1-كۋرس ستۋدەنتتەرى ءۇشىن شتاتتىق وقىتۋ جالعاسادى», دەدى دەپارتامەنت باسشىسى.
