ەلىمىزدىڭ وڭتۇستىك, سولتۇستىك جانە باتىس وڭىرلەرىنىڭ داستۇرىنە ساي توقىلعان, كوركەمدىك-تاريحي ماڭىزى جوعارى قازاق كىلەمدەرى وسى كورمەنىڭ ءارىن اشىپ, ءاربىر جادىگەردىڭ تاريحي ماڭىزىن ايشىقتاي ءتۇستى. قالپىنا كەلتىرىلگەن كىلەم جانە توقىما بۇيىمدارىنىڭ مۋزەي قورىندا ۇزاق جىلدار بويى ساقتالۋىنىڭ وزىندىك سىرى بار. ۇلتتىق جادىگەرلەرگە جاڭا تىنىس بەرىپ, كوركەمدىگىن قالپىنا كەلتىرگەن مۋزەي رەستاۆراتورلارىنىڭ كاسىبي شەبەرلىگى وتىز بەس جىلدىق تاريحى بار قالپىنا كەلتىرۋ ءبولىمىنىڭ تاريحىمەن ساباقتاسىپ جاتىر. ۇزاق ۋاقىت وسى سالادا ەڭبەك ەتكەن تاجىريبەلى مامانداردىڭ تاريحي-مادەني ەسكەرتكىشتەردى جاڭعىرتۋ, قالپىنا كەلتىرۋدىڭ قىر-سىرىن, تاسىلدەرىن يگەرۋدەگى ەڭبەگى وراسان.
مۋزەيدىڭ قوعاممەن بايلانىس ماماندارىنىڭ دەرەكتەرى بويىنشا, تاريحي-مادەني ارتەفاكتىلەردى قالپىنا كەلتىرۋ جۇمىستارى تاريحي, مادەني, مۋزەيلىك ماڭىزى بار بۇيىمداردى ب ۇلىنۋدەن ساقتاپ, ۇزاق ۋاقىت ساقتاۋعا مۇمكىندىك بەرەدى. بۇگىندە مۋزەي قورىندا ساقتالىپ كەلگەن جادىگەرلەردىڭ ومىرشەڭدىگى قالپىنا كەلتىرۋ جۇمىستارىنىڭ ساپاسىمەن بايلانىستى. قازىرگى كەزدە مۋزەيدە كەسكىندەمە, گرافيكا, قىش, ماتا بۇيىمدارى, كىلەم-كيىز, تاعى دا باسقا قۇندىلىقتاردى رەستاۆراتسيالاۋمەن اينالىساتىن 8 بىلىكتىلىگى جوعارى سۋرەتشى-قالپىنا كەلتىرۋشى جۇمىس ىستەيدى.
كىلەمدەر كورمەسىنىڭ ماقساتى – مۋزەي قورى نەگىزىندە قازاق حالقىنىڭ كىلەم جانە توقىما بۇيىمدارىنىڭ تىرشىلىك قامىنداعى قولدانىسىن, ماتەريالدار مەن توقىلۋ تەحنيكاسىن, شارۋاشىلىق, تۇرمىستىق جانە دە ءداستۇرلى كىلەم توقۋ مادەنيەتىنىڭ الۋان تۇرلىلىگىن كورسەتۋ. سونىمەن بىرگە كورمەدە قازاق كيىز ءۇي جابدىقتارىن تاماشالاۋعا بولادى.
الماتى
