ناۋرىز ايى باستالا سالا ۆولونتەرلەر قارعا كومىلگەن اۋلالار مەن بۇلاق ارنالارىن قاردان تازارتۋعا كىرىسكەن. كوبەسى سوگىلمەگەن كۇرتىك قاردى ويىپ الۋ دا وڭاي ەمەس. سونىڭ وزىندە شىن جاناشىرلىق تانىتقان جاستار قاۋىپتىڭ الدىن الۋ ءۇشىن ايانىپ قالىپ جاتقان جوق.
گلۋبوكوە اۋدانىنداعى Jas Otan ۆولونتەرلەرى تجد ماماندارىمەن بىرلەسىپ, رەسپۋبليكالىق «30 يگى ءىس» اكتسياسى شەڭبەرىندە جالعىزباستى, مۇمكىندىگى شەكتەۋلى جانداردىڭ اۋلالارىن قاردان ارىلتۋعا اتسالىسىپ ءجۇر. سونىمەن قاتار قىزىل سۋ ءجۇرۋى ىقتيمال ارىقتاردى دا تازالاپ شىقتى.
– قاي كەزدە بولسىن, كومەككە مۇقتاج جانداردىڭ جانىنان تابىلامىز. قىستاي قاريالاردىڭ, جالعىزباستى انالاردىڭ ۇيىندەگى شارۋاسىنا قولعابىس ەتتىك. ەندى مىنە, قارعىن سۋدىڭ الدىن الۋعا سەپتىگىمىزدى تيگىزسەك دەپ ءجۇرمىز, – دەيدى گلۋبوكوە كەنتىنىڭ تۇرعىنى, ۆولونتەر شاكارىم مارالحانوۆ.
وزەن بويىندا جاتقان گلۋبوكوە, التاي, بورودۋليحا سىندى اۋدانداردىڭ كەيبىر اۋىلدارىنا سۋ باسۋ قاۋپى ءتونىپ تۇر. سوندىقتان دا تۇرعىنداردىڭ ەرتە قامدانعاندارى ءجون. قاتارلارى تولىعىپ كەلە جاتقان ۆولونتەر جاستار دا ءبىر جاعىنان شىعىسىپ ءجۇر. اسىرەسە, بىلتىر ىندەت قىسقان كەزدە كوپشىلىك سولاردىڭ كومەگىنە جۇگىنگەن.
سونىمەن قاتار تاسقىننىڭ الدىن الۋ ءۇشىن ءوڭىر بويىنشا 2412 تەحنيكا, 370 موتوپومپا دايىندالىپ, 87 مىڭ دانا ىدىس-قاپ, 15 مىڭ توننا ينەرتتى ماتەريالدار ازىرلەنگەن. قۇتقارۋشىلار حالىققا ءتۇسىندىرۋ جۇمىستارىن جۇرگىزىپ, بارىنشا اباي بولۋ قاجەتتىگىن ەسكەرتىپ-اق جاتىر.
شىعىس قازاقستان وبلىسى
