ۇكىمەت باسشىسى قوردىڭ بۇرىنعى باسقارما توراعاسى احمەتجان ەسىموۆكە قازاقستان رەسپۋبليكاسىنىڭ الەۋمەتتىك-ەكونوميكالىق دامۋىنا قوسقان ەلەۋلى ۇلەسى جانە تاۋەلسىزدىك جىلدارى ءتۇرلى مەملەكەتتىك لاۋازىمدارداعى ءتيىمدى جۇمىسى ءۇشىن العىس ايتتى. پرەمەر-مينيستر ا. ەسىموۆتىڭ «سامۇرىق-قازىنا» ۇاق» اق ترانسفورماتسياسىن جۇرگىزۋ جانە جاڭعىرتۋ, قازاقستان ەكونوميكاسىن ءارتاراپتاندىرۋ مەن دامىتۋدى ارتتىرۋ جونىندەگى مىندەتتەردى تابىستى شەشكەنىن اتاپ ءوتتى. اسقار مامين قوردىڭ جاڭا باسشىسى الماسادام ساتقاليەۆتى تانىستىرا وتىرىپ, ونىڭ ەنەرگەتيكا سالاسىنداعى جانە «سامۇرىق-قازىنا» ۇاق» اق جۇيەسىندەگى ۇلكەن جۇمىس تاجىريبەسىن اتاپ ايتتى.
«قر تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ پەن مەملەكەت باسشىسى قاسىم-جومارت كەمەل ۇلى توقاەۆ «سامۇرىق-قازىنا» قورىنىڭ الدىندا ماڭىزى ۇلكەن مىندەتتەر قويىپ وتىر. بۇل ەلىمىزدىڭ ينفراقۇرىلىمدىق, كولىك-لوگيستيكالىق جانە يندۋستريالدىق دامۋىن قامتاماسىز ەتۋ ارقىلى, سونىمەن قاتار, وتىن-ەنەرگەتيكا كەشەنىن دامىتۋ, ينۆەستيتسيالاردى تارتۋ جانە وتاندىق تاۋار وندىرۋشىلەرگە قولداۋ كورسەتۋ ارقىلى ۇلتتىق ەكونوميكانىڭ ودان ءارى تۇراقتى دامۋىنا جاعداي جاساۋ», دەدى ا. مامين.
الماسادام مايدان ۇلى ساتقاليەۆ 1970 جىلى 31 قازاندا الماتى قالاسىندا تۋعان. ءال-فارابي اتىنداعى قازاق ۇلتتىق ۋنيۆەرسيتەتىن «مەحانيك, قولدانبالى ماتەماتيك» ماماندىعى بويىنشا, نازارباەۆ ۋنيۆەرسيتەتىنىڭ جوعارى بيزنەس مەكتەبىن, ستەنفورد ۋنيۆەرسيتەتىنىڭ جوعارى بيزنەس مەكتەبىن بىتىرگەن. ەكونوميكا عىلىمدارىنىڭ دوكتورى, قازاقستان ۇلتتىق جاراتىلىستانۋ عىلىمدارى اكادەمياسىنىڭ اكادەميگى, رەسەي جاراتىلىستانۋ عىلىمدارى اكادەمياسىنىڭ شەتەلدىك مۇشەسى.
1997-2001 جىلدارى «قازترانسويل» ۇلتتىق مۇناي تاسىمالداۋ كومپانياسى» اق-دا مەنەدجەر, كليرينگ دەپارتامەنتىنىڭ باستىعى, جوبالاردى باسقارۋ دەپارتامەنتىنىڭ باستىعى, باسقارۋشى ديرەكتور, ەكونوميكا جونىندەگى ۆيتسە-پرەزيدەنتى بولىپ جۇمىس ىستەدى. 2001-2006 جىلدارى «KEGOC» ەلەكتر جەلىلەرىن باسقارۋ جونىندەگى قازاقستاندىق كومپانيا» اق قارجى ديرەكتورى, ەكونوميكا جونىندەگى ۆيتسە-پرەزيدەنتى جانە ءبىرىنشى ۆيتسە-پرەزيدەنتى لاۋازىمدارىن اتقاردى.
2006-2007 جىلدارى «سامۇرىق» مەملەكەتتىك اكتيۆتەردى باسقارۋ جونىندەگى قازاقستاندىق حولدينگى» اق-نىڭ ەلەكتر ەنەرگەتيكا اكتيۆتەرىن باسقارۋ جونىندەگى ديرەكتورى بولدى. 2007 جىلعى قاڭتاردا قازاقستان رەسپۋبليكاسىنىڭ ەنەرگەتيكا جانە مينەرالدىق رەسۋرستار ۆيتسە-ءمينيسترى, «سامۇرىق» مەملەكەتتىك اكتيۆتەردى باسقارۋ جونىندەگى قازاقستاندىق حولدينگى» اق ديرەكتورلار كەڭەسىنىڭ مۇشەسى بولىپ تاعايىندالدى.
2008-2009 جىلدارى – «KEGOC» ەلەكتر جەلىلەرىن باسقارۋ جونىندەگى قازاقستاندىق كومپانيا» اق ءبىرىنشى ۆيتسە-پرەزيدەنتى, 2009-2011 جىلدارى – «ەلەكتر جەلىلەرىن باسقارۋ جونىندەگى قازاقستاندىق كومپانيا» اق پرەزيدەنتى. 2011 جىلى «سامۇرىق-قازىنا» ۇاق» اق باسقارۋشى ديرەكتورى بولىپ تاعايىندالدى, 2011-2018 جىلدارى – «سامۇرىق-ەنەرگو» اق ديرەكتورلار كەڭەسىنىڭ توراعاسى, باسقارما توراعاسى. 2018 جىلدان باستاپ قازىرگى ۋاقىتقا دەيىن – «سامۇرىق-قازىنا» ۇاق» اق اكتيۆتەردى باسقارۋ جونىندەگى باسقارۋشى ديرەكتورى.
