PIIMA (Prezident, ijod va ixtisoslashtirilgan maktablarni rivojlantirish agentligi) – وزبەكستاندا 2019 جىلعى قىركۇيەكتە رەسپۋبليكا پرەزيدەنتى شاۆحات ميرزيەەۆتىڭ جارلىعىمەن قۇرىلعان دارىندى بالالارعا ارنالعان يننوۆاتسيالىق مەكتەپتەر بولىپ تابىلادى. وزبەكستان رەسپۋبليكاسى مينيسترلەر كابينەتى جانىنداعى پرەزيدەنتتىك, شىعارماشىلىق جانە مامانداندىرىلعان مەكتەپتەردى دامىتۋ اگەنتتىگىنىڭ ديرەكتورى حيلولا ۋماروۆانىڭ ايتۋىنشا, وزبەكستان ءبىلىم بەرۋ ستاندارتىن, سونداي-اق وقىتۋدىڭ ادىستەمەلەرى مەن تەحنولوگيالارىن جەتىلدىرۋ, ءبىلىم بەرۋ ۇيىمدارىنىڭ جاڭا مودەلدەرىن قالىپتاستىرۋ مەن تاراتۋ, پەداگوگتاردى كاسىبي دامىتۋ بويىنشا كەشەندى جۇمىس ىستەپ كەلەدى.
«نازارباەۆ زياتكەرلىك مەكتەپتەرى» دببۇ باسقارما ءتورايىمى كۇلاش ءشامشيدينوۆا العاشقى جىلدارى ۇلىبريتانيانىڭ, فينليانديانىڭ, اقش-تىڭ جانە دە وزگە دە كوپتەگەن ەلدەردىڭ ءبىلىم بەرۋ جۇيەلەرى زەرتتەلگەنىن, سودان كەيىن قازاقستاندىق يدەولوگيا, وتاندىق مەنتاليتەت, مادەنيەت پەن داستۇرلەر نەگىزىندە زياتكەرلىك مەكتەپتەردىڭ وزىندىك باعدارلاماسى – NIS-programme قۇرىلعانىن اتاپ ءوتتى. شەتەلدىك ارىپتەستەردى وقۋ-ادىستەمەلىك ماتەريالدار جانە ولاردى ازىرلەۋ, جازعى لاگەرلەردى, وليمپيادالىق قوزعالىستى ۇيىمداستىرۋ جونىندەگى پراكتيكالىق سۇراقتار قىزىقتىردى.
وتكەن جىلدىڭ جەلتوقسان ايىندا اگەنتتىك دەلەگاتسياسى نۇر-سۇلتان قالاسىنا كەلىپ, ەلورداداعى ءۇش زياتكەرلىك مەكتەپتىڭ, پەداگوگيكالىق شەبەرلىك, پەداگوگيكالىق ولشەمدەر جانە ءبىلىم بەرۋ باعدارلامالارى ورتالىقتارىنىڭ جۇمىس بارىسىن زەرتتەدى.
