وڭىرلىك كوممۋنيكاتسيالار الاڭىندا وتكەن بريفينگتە ەنەرگوتيىمدىلىك جانە ينفراقۇرىلىمدىق دامۋ باسقارماسى باسشىسىنىڭ ورىنباسارى مىندەتىن اتقارۋشى بەرىك جامبىلوۆ «الماتى-2020» دامۋ باعدارلاماسى اياسىندا وتكەن جىلى 33 جوبا بويىنشا 312 شاقىرىم سۋ قۇبىرى جانە كارىز جەلىلەرى سالىنعانىن جەتكىزدى. بۇل قالاعا قوسىلعان ەلدى مەكەندەردە, سونىڭ ىشىندە دۋمان, سامعاۋ جانە اقبۇلاق كەنتتەرىندە 23 مىڭعا جۋىق تۇرعىن ءۇيدى قامتۋعا مۇمكىندىك بەرىپ وتىر.
قازىرگى كەزدە قالا تۇرعىندارىنىڭ ءجۇز پايىزعا جۋىعى ورتالىقتاندىرىلعان سۋمەن قامتىلعان. ب.جامبىلوۆ اتاپ وتكەندەي, تۇرعىنداردى سۋمەن قامتاماسىز ەتۋ 2019 جىلمەن سالىستىرعاندا 0,6 پايىزعا وسكەن. ال قالانىڭ 17 شاعىن اۋدانىندا وتكەن جىلى باستالعان جۇمىستار بيىل اياقتالادى. وسى ورايدا قۇرامىس, جايلاۋ, تاۋجولى, كولحوزشى, المەرەك, كەمەل, العاباس, بورالداي, شۇعىلا, اقجار, قايرات, سامعاۋ, قاراسۋ, شاپاعات, تەرەكتى, شاڭىراق-1, كوكشوقى سياقتى ەلدى مەكەندەردە 150 شاقىرىمدى سۋمەن جابدىقتاۋ جانە 130 شاقىرىمعا سۋ جەلىلەرىن تارتۋ جوسپارلانۋدا.
ناۋرىز مەرەكەسىنە وراي الماتىلىقتاردىڭ سۋسىز قالماۋىن الدىن الۋ ماقساتىندا كوممۋنالدىق قىزمەتتەر كۇشەيتىلگەن رەجىمگە كوشكەن.
ەنەرگوتيىمدىلىك جانە ينفراقۇرىلىمدىق دامۋ باسقارماسىنىڭ مالىمەتتەرى بويىنشا, مەگاپوليستى ەنەرگيامەن جانە جىلۋمەن جەو-1, جەو-2, گەس كاسكادى, باتىس جىلۋ كەشەنى جانە 8 قازاندىق قامتاماسىز ەتىپ وتىر.
قازىرگى كەزدە قالالىق جىلۋ-ەنەرگەتيكالىق جانە تۇرعىن ءۇي-كوممۋنالدىق شارۋاشىلىق سالالارىنىڭ 817 مامانى مەن ينجەنەرلىك-تەحنيكالىق قىزمەتكەرلەرى ءوز مىندەتتەرىنە ساقاداي ساي. ال توتەنشە جاعدايلاردىڭ الدىن الۋ ماقساتىندا 300 ماماننان جاساقتالعان 80 بريگادا, 280 ارنايى تەحنيكا جۇمىس ىستەيدى. سونىمەن بىرگە ارنايى تەحنيكا جانە قۇرىلعىلارمەن قامتىلعان ديسپەتچەرلەر, كەزەكشى قىزمەتكەرلەردىڭ دە جۇمىسى كۇشەيتىلگەن.
الماتى
