جامبىل وبلىسىندا ءوز ەركىمەن ءوتىنىش بىلدىرگەن 4 035 مەديتسينا جانە 1 068 ءبىلىم سالاسىنىڭ قىزمەتكەرى ەرىكتى تۇردە ەكپە سالدىرعان. ولاردىڭ قاتارىندا ءوڭىردىڭ دەنساۋلىق ساقتاۋ سالاسىندا قىزمەت اتقارىپ جۇرگەن بىلىكتى دارىگەرلەرمەن قاتار, ايماقتاعى بالاباقشا تاربيەشىلەرى, باستاۋىش سىنىپ پەداگوگتەرى, كوللەدج مۇعالىمدەرى, سونداي-اق ءبىلىم باسقارماسى مەن بولىمدەرىنىڭ قىزمەتكەرلەرى دە بار.
جامبىل وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ بۇگىندە وڭىردە «سپۋتنيك V» ۆاكتسيناسىنىڭ 1 كومپونەنتى بارلىعى 5 540 ادامعا ەگىلگەنىن ايتتى. Oلاردىڭ 72,8 پايىزى مەديتسينا قىزمەتكەرلەرى بولسا, 19,8 پايىزىن مۇعالىمدەر قۇرايدى ەكەن. سونداي-اق ۆاكتسينا سالدىرعانداردىڭ قاتارىندا ۇلتتىق قاۋىپسىزدىك كوميتەتى مەن پوليتسيا دەپارتامەنتىنىڭ, الەۋمەتتىك مەكەمەلەردىڭ قىزمەتكەرلەرى جانە ءتۇرلى دەڭگەيدەگى مەملەكەتتىك قىزمەتشىلەر, ستۋدەنتتەر مەن تاعى باسقا دا ماماندىق يەلەرى بار. بۇگىندە ەكپە سالدىرعان پەداگوگتەردىڭ دەنساۋلىعى قالىپتى ەكەن. ۆاكتسينانىڭ قانداي دا ءبىر تەرىس اسەرى بولماعان.
«ۇستازدار ءوز ەركىمەن ۆاكتسينا الۋعا جازباشا كەلىسىم بەرگەن سوڭ الدىمەن ارنايى ەكپە ءۇشىن دايىندالعان بولمەگە بارىپ دەنساۋلىعىن تەكسەرتەدى. وندا دەنە قىزۋى مەن قان قىسىمىن ولشەتەدى. دەنساۋلىعىندا كىنارات بولماسا, ءبىرىنشى دوزاسىن قابىلدايدى. كەيىن 30 مينۋت دارىگەردىڭ باقىلاۋىندا بولادى», دەيدى اسەت قاليەۆ.
ال وبلىستىق ءبىلىم باسقارماسىنىڭ باسشىسى گۇلنار حودجابەرگەنوۆانىڭ ايتۋىنشا, ۆاكتسينا العاننان كەيىن دە پەداگوگتەر دارىگەرلەردىڭ باقىلاۋىندا بولعان. وڭىردەگى پەداگوگتەرگە ەكپە تۋرالى ءتۇسىندىرۋ جۇمىستارى جۇرگىزىلدى. بالالاردىڭ ءومىرى مەن دەنساۋلىعىنىڭ قاۋىپسىزدىگى ءۇشىن ءار مۇعالىم جاۋاپتى. سوندىقتان ۆاكتسينا الۋدى ءار پەداگوگ ازاماتتىق مىندەتى دەپ ەسەپتەۋ كەرەك.
جوسپارعا سايكەس, جامبىل وبلىسى بويىنشا بيىل 18 جاستان اسقان 593 مىڭ 700 ادامعا كوروناۆيرۋس ىندەتىنە قارسى ەكپە سالىنادى. بۇل وبلىس حالقىنىڭ 52 پايىزىن قۇرايدى. ال كەيىننەن حالىقتىڭ قوسىمشا وسال توپتارىن قوسا وتىرىپ, كونتينگەنتتى كەڭەيتۋ جوسپارلانعان.
جامبىل وبلىسى
