قولدانىستاعى زاڭناماعا سايكەس اسكەري قىزمەتتە كۇنتىزبەلىك ەسەپپەن كەمىندە جيىرما جىل قىزمەت ەتىپ بوساتىلعان اسكەري قىزمەتشىلەردىڭ تۇرعىن ءۇيدى جەكەشەلەندىرۋگە نەمەسە اقشالاي وتەماقى الۋعا قۇقىعى بار.
سونىمەن قاتار وسى مەرزىمنەن از قىزمەت ەتكەن اسكەري قىزمەتشىلەر دە بار. ولاردىڭ تۇرعىن ءۇيدى جەكەشەلەندىرۋ ورنىنا اقشالاي وتەماقى الۋعا قۇقىعى جوق, سونىمەن قاتار ونى وتەۋسىز نەگىزدە الا المايدى. زاڭ بويىنشا اسكەري قالاشىقتىڭ اۋماعىندا ورنالاسقان قىزمەتتىك پاتەردى جەكەشەلەندىرۋگە بولمايدى.
تۇرعىن ءۇي زاڭناماسىنا ەنگىزىلگەن تۇزەتۋلەر جۇمىستان شىعارىلعان ادامدارعا قىزمەتتىك تۇرعىن ءۇيدى ءارى قاراي جەكەشەلەندىرۋ ارقىلى, مەملەكەتتىك تۇرعىن ءۇي قورىنان باسقا تۇرعىن ۇيگە ايىرباستاۋعا مۇمكىندىك بەرەدى.
- قورعانىس مينيسترلىگىنىڭ بالانسىندا نۇر-سۇلتان, الماتى جانە باسقا قالالاردا 236 پاتەر بار. بۇل زاڭ قىزمەت مەرزىمى جەتكىلىكسىز بۇرىنعى اسكەري قىزمەتشىلەرگە تۇرعىن ءۇيدى اۋىستىرۋ قۇقىعىن پايدالانۋعا مۇمكىندىك بەرەدى. ءسىز پاتەردى قالدىق قۇنى بويىنشا ساتىپ الا الاسىز. باستاپقى تولەم رەتىندە 30% سالىم, ال قالعان سومانى ون جىلعا پايىزسىز ءبولىپ تولەۋ قاراستىرىلعان, – دەپ ءتۇسىندىردى اسكەرلەردى پاتەرلەرگە ورنالاستىرۋ باس باسقارماسىنىڭ اعا وفيتسەرى ادىلەت مايورى داۋرەنبەك جۇمابەك.
ماسەلەن, نۇر-سۇلتان قالاسىندا قالدىق قۇنى ءۇش ميلليوننان جەتى ميلليون تەڭگەگە دەيىنگى 34 پاتەر ايىرباستاۋعا ۇسىنىلدى. مىسالى, اۋدانى 31,5 شارشى مەتر, قۇنى 3 ملن 300 مىڭ تەڭگەنى قۇرايتىن ءبىر بولمەلى پاتەردى ساتىپ الۋ ءۇشىن باستاپقى جارنا رەتىندە 990 مىڭ تەڭگە تولەۋ قاجەت. قالعان 2 ملن 310 مىڭ تەڭگە ون جىل ىشىندە تولەنەدى. اي سايىنعى تولەم 19 250 تەڭگەنى قۇرايدى.
قازىرگى ۋاقىتتا جۇزدەگەن ادام وسى مەحانيزم ارقىلى تۇرعىن ءۇي ساتىپ الۋدىڭ جولدارى مەن مۇمكىندىكتەرىن قاراستىرۋدا. بۇل رەتتە سەمەي پوليگونىنداعى يادرولىق سىناقتاردىڭ سالدارىنان زارداپ شەككەن دەگەن مارتەبە بەرىلگەن ادامدار وسى اۋىستىرۋدان كەيىن پاتەرلەرىن اقىسىز مەنشىگىنە اينالدىرا الادى.
الماتى وبلىسىنا قاراستى جەتىگەن اۋىلىندا قىزمەت ەتكەن جانە اسكەري قالاشىقتا تۇرعان زاپاستاعى كىشى سەرجانت باقتىگۇل سىدىقوۆا نۇر-سۇلتان قالاسىندا ءبىر بولمەلى پاتەرگە يە بولدى. بۇگىندە ول – ەلوردا تۇرعىنى.
– زاڭعا ەنگىزىلگەن وزگەرىستەردەن كەيىن اۋداندىق پايدالانۋ ءبولىمىنىڭ وكىلدەرى ماعان تولىق تۇسىنىكتەمە بەردى. اۋىستىرۋعا قاتىستى بارلىق ماسەلەلەر جەدەل جاسالدى. مەنىڭ جەكە پاتەرىم, باسىمدا باسپانام بارىنا قۋانىشتىمىن, – دەپ باقتىگۇل سىدىقوۆا جاعىمدى جاڭالىقپەن ءبولىستى.
قارۋلى كۇشتەردىڭ اسكەرلەردى پاتەرلەرگە ورنالاستىرۋ باس باسقارماسى اسكەري قالاشىقتارداعى تۇرعىن ۇيلەردى رەسپۋبليكانىڭ باسقا وڭىرلەرىنەن پاتەرلەرگە ايىرباستاۋ جونىندە ءتۇسىندىرۋ جۇمىستارىن جالعاستىرۋدا. ۆەدومستۆونىڭ تۇرعىن ءۇي قورى تۋرالى بارلىق اقپارات قورعانىس مينيسترلىگىنىڭ رەسمي سايتىنداعى «تۇرعىن ۇيمەن قامتاماسىز ەتۋ» بولىمىندە ورنالاستىرىلعان.
