وتىرىس ەكولوگيا, تابيعي رەسۋرستاردى ۇتىمدى پايدالانۋ جانە ورنىقتى دامۋ ماسەلەلەرىنە ارنالعان بولاتىن. سەنات توراعاسى شارانى اشا كەلىپ, ەكولوگيالىق پروبلەمالاردى جۇرتشىلىقتىڭ بەلسەندى قاتىسۋىمەن شەشۋگە بولاتىنىن اتاپ ءوتتى.
«ەكولوگيالىق پروبلەمالاردى مەملەكەتتىڭ قاتىسۋىمەن عانا شەشۋ مۇمكىن ەمەس ەكەنى انىق. ازاماتتىق سەكتور, ۇەۇ, بيزنەس, جاناشىر جاندار مەن ەرىكتىلەر تاراپىنان دا بەلسەندى ءىس-قيمىل قاجەت بولادى. حالىق اراسىندا ەكولوگيالىق ويلاۋ مەن قورشاعان ورتاعا جاۋاپكەرشىلىكتى دامىتۋ قاجەت», دەپ اتاپ ءوتتى سەنات توراعاسى.
ءال-فارابي اتىنداعى قازۇۋ-دىڭ ەكولوگ-زەرتتەۋشىسى, عىلىم جانە تەحنولوگيالار سالاسىنداعى PhD, بۇۇ-نىڭ كليماتتىڭ وزگەرۋى جونىندەگى حاتشىلىعىنىڭ ساراپشى-رەتسەنزەنتى ايىمگۇل كەرىمراي ەلىمىزدەگى ەكولوگيالىق ماسەلەلەردى شەشۋگە ازاماتتاردىڭ بەلسەندى قاتىسۋى ءۇشىن اۋادا لاستاۋشى زاتتاردىڭ كونتسەنتراتسياسى جوعارى ەكەندىگى تۋرالى حالىقتى جەدەل حاباردار ەتۋ جۇيەسىن قۇرۋدى ۇسىندى.
«اۋا ساپاسى تۋرالى اقپارات جاڭالىقتار سايتتارى مەن تەلەارنالاردا كۇن سايىن كوپشىلىككە قول جەتىمدى بولۋى كەرەك. اۋانىڭ ساپاسى تۋرالى اقپارات كوپتەگەن ەلدەردە اۋا رايى بولجامىمەن بىرگە بەرىلەدى. اۋا-رايىنىڭ قاۋىپتى جاعدايى تۋرالى حابارلايتىن SMS-حابارلاما سياقتى اۋانىڭ لاستانۋ دەڭگەيى جوعارى بولعاندا دا اقپارات بەرىلۋى كەرەك», دەدى ساراپشى.
ايىمگۇل كەرىمراي سونىمەن قاتار ەلىمىزدە لاستاۋشى زاتتاردىڭ رۇقسات ەتىلگەن كونتسەنتراتسياسىنىڭ قابىلدانعان شەگى ەسكىرگەنىن جانە حالىقارالىق دەڭگەيدەن وزگەشە دەپ سانايدى. ال مەملەكەتتىك ورگاندار شەشىم قابىلداۋ كەزىندە اۋا ساپاسىنىڭ جاي-كۇيى تۋرالى دەرەكتەردى ءتيىستى دارەجەدە پايدالانباي كەلەدى.
