«ەجەلگى تاراز ەسكەرتكىشتەرى» مەملەكەتتىك تاريحي-مادەني قورىق-مۋزەيىنىڭ ۇيىمداستىرۋىمەن ۇلىستىڭ ۇلى كۇنى – ناۋرىز مەيرامى اتالىپ ءوتتى. سونىمەن قاتار مەرەكەلىك شارا بارىسىندا قازاقتىڭ تۇساۋكەسەر, بەتاشار سياقتى ۇلتتىق سالت-داستۇرلەرى دە دارىپتەلدى. اسىرەسە, شاراعا كەلگەن جاستارعا بالانىڭ تۇساۋىن كەسۋ, كەلىننىڭ بەتىن اشۋ سياقتى عۇرىپتار تانىستىرىلدى. اتالعان مەكەمە اۋلاسىنا كيىز ءۇي تىگىلىپ, التىباقان قۇرىلدى. شارا بارىسىندا اتالعان قورىق-مۋزەيدىڭ ديرەكتورى نۇرلان بىقىباەۆ كوپشىلىكتى ۇلىستىڭ ۇلى كۇنىمەن قۇتتىقتاسا, شەرحان مۇرتازا اتىنداعى وبلىستىق رۋحانيات جانە تاريحتانۋ ورتالىعىنىڭ ديرەكتورى ساۋران قاليەۆ مەملەكەت باسشىسى قاسىم-جومارت توقاەۆ ءوزىنىڭ «تاۋەلسىزدىك بارىنەن قىمبات» اتتى ماقالاسىندا ناۋرىز مەيرامىن لايىقتى دەڭگەيدە اتاپ ءوتۋدى تاپسىرعانىن, سوعان ساي وڭىردە ۇلىستىڭ ۇلى كۇنى تويلانىپ جاتقانىن جەتكىزدى. ال وبلىستىق تاريحي-ولكەتانۋ مۋزەيىنىڭ ديرەكتورى سەيىتجان ءىلياس جينالعان كوپشىلىكتى ناۋرىز مەرەكەسىمەن قۇتتىقتاپ, ەلىمىزگە اماندىق, جەرىمىزگە بەرەكە تىلەدى. سونداي-اق ءمادينا ساعىنبەكوۆا, جانار وزتەمىروۆا سىندى وڭىرگە بەلگىلى انشىلەر اننەن شاشۋ شاشتى.
مۇندا ايتۋلى مەرەكەگە وراي, كوپشىلىككە ارنايى داستارقان جايىلىپ, ناۋرىز كوجە تاراتىلدى. كەلۋشىلەر التىباقان تەۋىپ, اۋلا ماڭىندا ورنالاسقان تاريحي جادىگەرلەرمەن تانىستى.
جامبىل وبلىسى
