ۇكىمەت باسشىلارى ساۋدا-ەكونوميكالىق, قارجى-ينۆەستيتسيالىق, ەنەرگەتيكا جانە عارىش سالالارىنداعى قازاقستان-رەسەي ىنتىماقتاستىعىن ودان ءارى ارتتىرۋ ماسەلەلەرىن, سونداي-اق ونەركاسىپتىك كووپەراتسيا شەڭبەرىندەگى جوبالاردى تالقىلادى.
ەۋرازيالىق ەكونوميكالىق وداق فورماتىنداعى ءوزارا ءىس-قيمىلدىڭ وزەكتى ماسەلەلەرى قارالدى. COVID-19-دىڭ تارالۋىنا قارسى كۇرەس جانە ەكى ەلدىڭ ەكونوميكالارى ءۇشىن پاندەميانىڭ سالدارىن جويۋ جونىندەگى بىرلەسكەن ءىس-شارالارعا ەرەكشە نازار اۋدارىلدى.
«سپۋتنيك V» رەسەيلىك ۆاكتسيناسىنىڭ 4 ملن دوزاسىن قازاقستانعا قوسىمشا جەتكىزۋ تۋرالى ۋاعدالاستىققا قول جەتكىزىلدى. «ۆيرۋستىڭ تارالۋىن جەڭۋ ءۇشىن ءبىزدىڭ ەلدەرىمىزدىڭ كۇش-جىگەرىن, ونىڭ ىشىندە حالىقتى جاپپاي ۆاكتسيناتسيالاۋ ماسەلەلەرىندە ۇيلەستىرۋدىڭ جوعارى دەڭگەيى قاجەت», دەدى ا. مامين.
سونىمەن قاتار بيىلعى جىلدىڭ ەكىنشى جارتىسىندا كوكشەتاۋ قالاسىندا وتەتىن «ەكولوگيا جانە جاسىل ءوسىم سالاسىنداعى ىنتىماقتاستىق» تاقىرىبىنا ارنالعان XVII ايماقارالىق ىنتىماقتاستىق فورۋمىنا دايىندىق ماسەلەسى قارالدى.
قر مەن رف اراسىنداعى 2021-2025 جىلدارعا ارنالعان ەكونوميكالىق ىنتىماقتاستىقتىڭ كەشەندى باعدارلاماسىن ازىرلەۋ جانە وعان قول قويۋ بويىنشا جۇمىستى جانداندىرۋ قاجەتتىگى اتاپ ءوتىلدى. رەسەي – قازاقستاننىڭ نەگىزگى سىرتقى ەكونوميكالىق سەرىكتەسى. 2020 جىلى تاۋار اينالىمى $18,2 ملرد قۇرادى.
قازاقستاندا رەسەي كاپيتالىنىڭ قاتىسۋىمەن 10 مىڭنان استام كاسىپورىن جۇمىس ىستەيدى, بۇل شەتەلدىك قاتىسۋى بار كاسىپورىنداردىڭ جالپى سانىنىڭ 36,1%-ىن قۇرايدى. رف ونەركاسىپ جانە ساۋدا ءمينيسترى دەنيس مانتۋروۆپەن جانە رەسەيدىڭ تىكەلەي ينۆەستيتسيالار قورىنىڭ باس ديرەكتورى كيريلل دميتريەۆپەن كەزدەسۋدە وڭدەۋ ونەركاسىبىندەگى (فارماتسەۆتيكا, ماشينا جاساۋ, مەتالل وڭدەۋ, حيميا ونەركاسىبى جانە ت.ب.) بىرلەسكەن جوبالاردى ىسكە اسىرۋدىڭ جاي-كۇيى مەن پەرسپەكتيۆالارى, سونداي-اق ەكىجاقتى فورماتتا جانە ەاەو شەڭبەرىندە ساۋدانى كەڭەيتۋ تالقىلاندى.
«روسگەولوگيا» باسقارما توراعاسى سەرگەي گوركيمەن ەكى ەلدىڭ گەولوگيا سالاسىنداعى ءوزارا ءىس-قيمىلىنىڭ وزەكتى ماسەلەلەرى تالقىلاندى. «روسكوسموس» مەملەكەتتىك كورپوراتسياسىنىڭ باس ديرەكتورى دميتري روگوزينمەن كەزدەسۋدە عارىش سالاسىنداعى ىنتىماقتاستىق جوبالارى قارالدى. ساپارعا قر پرەمەر-ءمينيسترىنىڭ ورىنباسارى رومان سكليار, ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى — احقو باسقارۋشىسى قايرات كەلىمبەتوۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, دەنساۋلىق ساقتاۋ ءمينيسترى الەكسەي تسوي, قر-نىڭ رف-داعى توتەنشە جانە وكىلەتتى ەلشىسى ەرمەك كوشەرباەۆ جانە ت. ب. قاتىستى.
