ساۋران اۋدانىنىڭ اكىمشىلىك ورتالىعى – شورناق اۋىلى بولادى. كەنتاۋ قالاسىنىڭ قۇرامىنان شاعا, جاڭا يقان, ەسكى يقان, ۇشقايىق, ياسسى, ورانعاي, قاراشىق, جۇينەك, بابايقورعان, شورناق, جىبەك جولى, مايدانتال اۋىلدىق وكرۋگتەرى شىعارىلىپ, ساۋران اۋدانىنا وتەدى. جاڭا اۋداننىڭ قۇرىلۋىنا بايلانىستى اتقارىلاتىن بارلىق ءىس-شارالاردىڭ جۇزەگە اسۋىمەن ارنايى كوميسسيا اينالىسادى. شورناق اۋىلىندا جاڭا اۋداننىڭ قۇرىلۋىنا وراي وتكەن سالتاناتتى شارادا تۇركىستان وبلىسىنىڭ اكىمى ومىرزاق شوكەەۆ ۇلىستىڭ ۇلى كۇنى قارساڭىندا تاريحى باستاۋ العان يگى ىسكە اتسالىسقان بارشا ازاماتتارعا العىس ايتتى. جاڭا اۋداننىڭ دامۋ جوسپارى جايلى وي ءبولىستى. اۋدان قۇرامىنا ەنەتىن ەلدى مەكەندەردەگى مەملەكەتتىك قىزمەتتەردى الۋ ساپاسى كوتەرىلەدى. الەۋمەتتىك ماسەلەلەر وڭ شەشىمىن تاۋىپ, جاڭا جۇمىس ورىندارىنىڭ اشىلۋى سەكىلدى ماڭىزدى ماسەلەلەرگە باسىمدىق بەرىلەدى. اۋىل شارۋاشىلىعى سالاسىنىڭ قارقىندى دامۋىنا كۇش سالىنادى.
قولدانىستاعى زاڭدارعا سايكەس, مەملەكەت باسشىسىنىڭ اۋداندى قۇرۋ تۋرالى جارلىعىن ورىنداۋ ماقساتىندا اكىمشىلىك قۇرىلىمىن جاساقتاۋ ءۇشىن الدىمەن اۋداندىق ءماسليحات قۇرىلادى. تيىسىنشە ءماسليحات كەلىسىمىمەن اۋدان اكىمى تاعايىندالىپ, اۋداندى باسقارۋ جۇيەسى جانە بيۋدجەتى بەكىتىلەدى. قۇقىق قورعاۋ ورگاندارى مەن مينيسترلىكتەردىڭ اۋداندىق بولىمشەلەرى ءوز قىزمەتىن باستايدى. سونداي-اق وبلىس اكىمى الداعى 1-2 جىلدىڭ كولەمىندە بارلىق اكىمشىلىك, الەۋمەتتىك نىسانداردىڭ قۇرىلىسى ءبىتىپ, پايدالانۋعا بەرىلەتىنىن اتاپ ءوتتى. ال ازىرگە مەملەكەتتىك ورگاندار مەن
اۋدان اكىمدىگىن قوسا العاندا ۋاقىتشا جەكەلەگەن نىسانداردى جالعا الىپ, جۇمىسىن جۇرگىزەدى. جاڭا اۋدان حالقىنىڭ سانى 100 مىڭنان اساتىن بولادى. اۋدان تۇرعىنى اتانعان 100 مىڭنان استام حالىقتىڭ اتىنان ءسوز سويلەگەن ساۋراندىقتار ەلباسىنا العىستارىن جەتكىزۋدى سۇرادى. تۇركىستاندى تۇركى الەمىنىڭ مادەني-رۋحاني ورتالىعى اتانۋىنا ىقپال ەتكەن جانە قاسيەتتى قالانى ارنايى جارلىعىمەن وبلىس ورتالىعى ەتىپ بەكىتكەن ەلباسى نۇرسۇلتان نازارباەۆقا, تۇڭعىش پرەزيدەنتىمىزدىڭ ءىسىن جالعاستىرىپ, تۇركىستاننىڭ دامۋىنا كۇش سالىپ جاتقان پرەزيدەنت قاسىم-جومارت توقاەۆقا ريزاشىلىقتارىن ءبىلدىردى.
ەلباسى قابىلداعان ستراتەگيالىق شەشىمنىڭ كۇللى تۇركى جۇرتىنىڭ رۋحاني استاناسى بولعان تۇركىستاننىڭ قايتا تۇلەۋىنە ۇلكەن سەرپىن بەرگەنى دە ايتىلدى. «بۇل قالامەن مىڭ جارىم جىلدىق تاريح ساباقتاسىپ جاتىر. وسىلايشا كەزىندە ءىرى ساۋدا ورتالىعى نەگىزىندە قۇرىلىپ, اق وردانىڭ استاناسى بولعان ساۋران اتاۋى ءوزىنىڭ تاريحي مارتەبەسىن قايتا الدى. كونە شاھاردى وبلىس ورتالىعى ەتۋدەگى نۇرسۇلتان ءابىش ۇلىنىڭ باستاپ بەرگەن جولىنىڭ جالعاسى رەتىندە تۇركىستانمەن ىرگەلەس جاتقان كەنتاۋ قالاسىن سەرىكتەس قالا رەتىندە دامىتۋ جوسپارى بەكىتىلدى. وسى رەتتە قالا شەكاراسىنىڭ كەڭەيۋى, تۇرعىندار سانىنىڭ ەكى ەسەگە ارتۋى تەز ارادا جاڭا
اۋدان قۇرۋعا سەبەپ بولدى», دەيدى وبلىستىق ءماسليحاتتىڭ حاتشىسى قايرات بالابيەۆ.
تۇركىستان وبلىسى
