كەلۋشىلەر نازارىنا قازاقتىڭ ۇلى اقىنى ابايدىڭ جارى – ءدىلدا الشىنبايقىزىنىڭ قوس ىشەكتى قالاق دومبىراسى, قازاق تاريحى مەن مادەنيەتىندەگى شوقتىعى بيىك تۇلعالار – امىرە قاشاۋباەۆ, جاياۋ مۇسا, ماناربەك ەرجانوۆ, ەلۋباي ومىرزاقوۆ, كۇلاش بايسەيىتوۆا, سونداي-اق قانىش ساتباەۆ, قاسىم امانجولوۆ, جۇبان مولداعاليەۆ, ءالىبي جانگەلدين, كەمەل اقىشەۆ, وزبەكالى جانىبەكوۆ قاتارلى عىلىم, مادەنيەت جانە ونەر مايتالماندارىنىڭ مۋزىكالىق اسپاپتارى ۇسىنىلعان. سونىمەن بىرگە كورمەدەن ساحنالىق اكسەسسۋارلاردى, عيبراتتى عۇمىر يەلەرىنىڭ ءومىر ورنەگىنەن سىر شەرتەتىن بەينەلەۋ ونەر تۋىندىلارىن دا تاماشالاۋعا بولادى.
قازاق حالقىنىڭ تاريحي-مادەني, الەۋمەتتىك جانە رۋحاني ومىرىندە مۋزىكا ونەرى ايرىقشا مانگە يە. سان عاسىردان سارقىلماي جەتكەن مۋزىكالىق ءداستۇر ۇرپاقتان-ۇرپاققا بەرىلىپ, حالىق شىعارماشىلىعىنىڭ اجىراماس بولىگىنە اينالدى. مۋزىكالىق مادەنيەتىمىزدىڭ نەگىزىن ءان, اۋىزەكى داستۇرگە نەگىزدەلگەن سۋىرىپ سالمالىق, ەپيكالىق, سونداي-اق اسپاپتىق شىعارمالار قۇرايدى. «بابادان قالعان سىرلى اۋەن» دەپ اتالعان بىرەگەي كورمە قازاق مادەنيەتىنە قالتقىسىز قىزمەت ەتكەن قايراتكەرلەردىڭ كوزىندەي بولعان سىرلى اسپاپتاردىڭ سيقىرلى ۇنىندەي ىستىق.
200-گە جۋىق جادىگەر قويىلعان كورمە قابىرعاسىنان مۋزىكالىق اسپاپتاردىڭ ىشەكتى, ۇرمەلى, تىلشەلى, سوقپالى تۇرلەرى – جەتىگەن, شەرتەر, قوبىز, سىبىزعى, سازسىرناي, اساتاياق, تۇياق, قوڭىراۋ جانە تاعى باسقالارىن تاباسىز. ەڭ باستىسى, قازاق ءۇشىن زاتتىق جانە اۋەزدىك ءتول مۇرا ءارى ۇلتىمىزدىڭ سيمۆوليكالىق نىشانىنا بالاناتىن دومبىرانىڭ سان الۋان ءتۇرى كورمە تورىندە سامساپ تۇر.
الماتى
