وتكەن جىلدىڭ كۇزىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە الەۋمەتتىك كاسىپكەرلىكتى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا جۇمىس باستالعان بولاتىن. بۇگىن سەنات توراعاسى ماۋلەن اشىمباەۆتىڭ توراعالىق ەتۋىمەن وسى زاڭ جوباسىنىڭ تۇساۋكەسەرى بولدى. ونى پارلامەنت دەپۋتاتتارى ازىرلەگەن بولاتىن.
سەنات توراعاسى قازىر قوعامنىڭ الەۋمەتتىك كاسىپكەرلىككە دەگەن سۇرانىسى ارتىپ كەلە جاتقانىن, ال وسى سالانىڭ ءوزى جالپى الەمدىك ترەندكە اينالعانىن اتاپ ءوتتى. سونىمەن قاتار, دامىعان ەلدەردە الەۋمەتتىك كاسىپكەرلەر ءوز ەلدەرىنىڭ ەكونوميكاسىنا ايتارلىقتاي ۇلەس قوسىپ كەلەدى.
«بۇگىن تانىستىرىلعان زاڭ جوباسى الەۋمەتتىك ماسەلەلەر بويىنشا جۇمىس ىستەيتىن كاسىپورىنداردى جۇيەلى تۇردە قولداۋعا ارنالعان. وندا الەۋمەتتىك كاسىپكەرلىك تۋرالى نەگىزگى تۇسىنىكتەر مەن ولاردىڭ مىندەتتەرى بەكىتىلەدى. سونداي-اق, قۇجاتتا مەملەكەتتىك قولداۋدىڭ ناقتى شارالارى بەلگىلەنەدى. مۇنداي كاسىپورىندار ءۇشىن مەملەكەتتىك قولداۋدىڭ ماڭىزى اسا زور», دەدى سەنات توراعاسى.
جۇمىس توبى وسى زاڭ جوباسىن ازىرلەۋ بارىسىندا 69 ۇسىنىس دايىنداعان بولاتىن. جۇمىس توبىنىڭ جەتەكشىسى, سەناتور ەرىك سۇلتانوۆتىڭ ايتۋىنشا, نەگىزگى زاڭ جوباسى 3 كودەكس پەن 2 زاڭعا 21 وزگەرىس پەن تولىقتىرۋ ەنگىزۋدى كوزدەيدى. ونىڭ ىشىندە: كاسىپكەرلىك كودەكستەگى «الەۋمەتتىك كاسىپكەر» ۇعىمىنىڭ رەسمي انىقتاماسى, سونداي-اق الەۋمەتتىك كاسىپكەر دەپ ساناۋعا بولاتىن ادامدار ءۇشىن ولشەمشارتتار ەنگىزۋ تۋرالى نەگىزگى تولىقتىرۋلار بار.
«نەگىزگى 4 ولشەمشارت ناقتىلاندى. ولاردىڭ ۇشەۋى حالىقتىڭ الەۋمەتتىك وسال توپتارىن جۇمىسپەن قامتاماسىز ەتۋ, ولار وندىرگەن تاۋارلاردى وتكىزۋگە ىقپال ەتۋ ارقىلى قولداۋعا باعىتتالعان. ءتورتىنشىسى - قوعامدىق-پايدالى ماقساتتاردى جانە زاڭدا كوزدەلگەن سالالارداعى الەۋمەتتىك پروبلەمالاردى شەشۋدى كوزدەيدى», دەدى سەناتور ەرىك سۇلتانوۆ.
سونىمەن قاتار, زاڭ جوباسىندا الەۋمەتتىك كاسىپكەرلىك سۋبەكتىلەرى مەن وڭىرلىك كوميسسيالاردىڭ ءتىزىمىن جاساۋ ۇسىنىلادى. ءدال وسى كوميسسيالار ەسەپ, مونيتورينگ جۇرگىزەدى, سونداي-اق مەملەكەتتىك قولداۋ شارالارى بويىنشا شەشىم قابىلدايدى. الداعى ۋاقىتتا زاڭ جوباسى ءماجىلىستىڭ قاراۋىنا ەنگىزىلەتىن بولادى.
