ورداباسى اپب-نە جەرگىلىكتى تۇرعىن ارىزدانىپ كەلەدى. ونىڭ ايتۋىنشا, بەلگىسىز ادامدار تۇنگى ۋاقىتتا جىلىجايدا ءوسىپ تۇرعان قيارىن جىمقىرماق بولعان. قياردىڭ سالماعى 1500 كەلىنى قۇراپ, جابىرلەنۋشىگە 1 ميلليون 500 مىڭ تەڭگە شىعىن كەلگەن. اتالعان جايتتى پوليتسيا قىزمەتكەرلەرى قر قك-ءنىڭ 188-بابى (ۇرلىق) بويىنشا سدتبت-عا تىركەدى. ورىن العان وقيعا بويىنشا تاجىريبەلى ءتارتىپ ساقشىلارىنان جەدەل تەرگەۋ توبى قۇرىلىپ, قىلمىستىق ءىستى اشۋ ماقساتىندا بىردەن ىسكە كىرىستى. ۇرلىق بولعان ايماقتى ءبىر شولىپ شىعىپ, اينالاداعى بەينەباقىلاۋ كامەرالارىن مۇقيات قاراپ, كۇدىكتى بولىپ كورىنگەن ازاماتتاردان تۇسىنىك الدى. ناتيجەسىندە وسى جايتقا قاتىسى بار وزبەكستان رەسپۋبليكاسىنىڭ ازاماتى قىلمىس ۇستىندە ۇستالىپ بولىمشەگە جەتكىزىلدى.
تەرگەۋ بارىسىندا كۇدىكتى جاس ازاماتتىڭ قيار وسىرەتىن جىلىجايدا جۇمىس ىستەيتىنى بەلگىلى بولدى. سونداي-اق پوليتسەيلەر كۇدىكتى ازاماتتىڭ قىلمىسقا قاتىسى بار ءتورت سىبايلاسى بارىن انىقتادى. ولاردا وزگە ەلدىڭ ازاماتتارى. كۇدىكتىلەر سالماعى ءبىر جارىم توننا بولاتىن قياردى جەكە-جەكە قاپقا سالىپ ساتپاق بولعان. قازىرگى تاڭدا ءتورت سىبايلاسقا قاتىستى ىزدەستىرۋ امالدارى جۇرگىزىلۋدە.
بۇگىنگى تاڭدا كۇدىكتىگە قاتىستى سوتقا دەيىنگى تەرگەۋ امالدارى جالعاسۋدا.
