تۇجىرىمدامانىڭ ماقساتى – ازاماتتار مەن ولاردىڭ ءال-اۋقاتى باستى قۇندىلىق بولاتىن مەملەكەتتىك باسقارۋدىڭ سەرۆيستىك جانە «ادامعا باعىتتالعان» مودەلىنە كوشۋ. قازىرگى تاڭدا مەملەكەتتىك باسقارۋ سالاسىن رەفورمالاۋ جۇمىستارىمەن اينالىسىپ جاتقان ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى قايرات كەلىمبەتوۆ قۇجاتتى ەگجەي-تەگجەي ءتۇسىندىرىپ, ونىڭ نەگىزگى جاڭالىقتارىمەن ءبولىستى.
– تۇجىرىمداما مەملەكەتتىك اپپاراتتى مەملەكەتتىك باسقارۋدىڭ سەرۆيستىك جانە «ادامعا باعدارلانعان» مودەلىنە, ياعني, بيۋروكراتيالىق مودەلدەن پرواكتيۆتى قىزمەتكە كوشۋىنە باعىتتايدى, دەدى اگەنتتىك توراعاسى قايرات كەلىمبەتوۆ.
مەملەكەتتىك ساياساتتاردى قالىپتاستىرۋ مەن ىسكە اسىرۋ كەزىندە مەملەكەتتىك اپپارات پەن مەملەكەتتىك قىزمەتشىلەر مەملەكەتتىك باسقارۋدىڭ بەس نەگىزگى قاعيداتىن باسشىلىققا الاتىن بولادى. مەملەكەت «حالىق ۇنىنە قۇلاق اساتىن», ءتيىمدى, قوعام الدىندا ەسەپ بەرەتىن, كاسىبي جانە پراگماتيكالىق بولۋى قاجەت.
وسى قاعيداتتارعا سۇيەنۋ ءۇشىن مەملەكەتتىك اپپارات توعىز نەگىزگى مىندەتتى ورىنداماق. اتاپ ايتقاندا, ولار – كليەنتكە باعدارلانعان جانە اشىق مەملەكەتتىك اپپاراتتى قالىپتاستىرۋ, ستراتەگيالىق جانە بيۋدجەتتىك جوسپارلاۋ, سونداي-اق رەفورمالار جۇرگىزۋ تاسىلدەرىن جەتىلدىرۋ, وڭتايلى جانە ءتيىمدى مەملەكەتتىك اپپاراتتى قالىپتاستىرۋ, ازاماتتاردىڭ قاجەتتىلىكتەرىنە نەگىزدەلگەن پرواكتيۆتى مەملەكەتتىك قىزمەتتەرگە كوشۋ, ادامي رەسۋرستاردىڭ ساپاسىن جاقسارتۋ جانە مەملەكەتتىك اپپاراتتى كاسىبيلەندىرۋ, ءتيىمدى, وڭتايلى جانە اشىق كۆازيمەملەكەتتىك سەكتوردى قالىپتاستىرۋ, جەرگىلىكتى ءوزىن-ءوزى باسقارۋدى ودان ءارى جەتىلدىرۋ, بيزنەستى دامىتۋعا قولايلى جاعداي جاساۋ, مەملەكەتتىڭ سەرۆيستىك مودەلىن قۇرۋ ءۇشىن سوت جۇيەسى مەن قۇقىق قورعاۋ جۇيەسىن ترانسفورماتسيالاۋ.
تارقاتىپ ايتار بولساق, مەملەكەتتىك قىزمەتتەر مەملەكەتتىك باسقارۋدى دامىتۋ تۇجىرىمداماسى اياسىندا تسيفرلىق فورماتقا كوشۋدى جالعاستىرادى. مەملەكەتتىك اپپاراتتىڭ قىزمەتى پرواكتيۆتى بولىپ, حالىقتىڭ مۇقتاجدىقتارىنا ساي قايتا فورماتتالادى. الەۋمەتتىك سالا ۇيىمدارىنا قوعامدىق مونيتورينگ جۇرگىزۋگە مۇمكىندىك بەرەتىن «قوعامدىق ماڭىزى بار قىزمەت» ۇعىمىن ەنگىزۋ جوسپارلانۋدا.
قىزمەتتەر بارىنشا قىسقا مەرزىمدە ەكساۋماقتىق (تۇراتىن جەرىنە بايلانباي), پرواكتيۆتىلىك جانە كومپوزيتتىك قاعيدالارى بويىنشا كورسەتىلەتىن بولادى. بۇل رەتتە كومپوزيتتىك قىزمەتتەر الۋشىلارعا ءبىر ءوتىنىش نەگىزىندە ۇسىنىلادى.
قازاقستاندىقتار قانداي دا ءبىر سۇراۋ سالۋسىز مەملەكەتتىك قىزمەتتى الۋ قاجەتتىلىگى نەمەسە مۇمكىندىگى تۋرالى اۆتوماتتى تۇردە حابارلاما الماق. كەي جاعدايلاردا قىزمەتتەر پرواكتيۆتى تۇردە كورسەتىلەدى.
سونىمەن قاتار, مەملەكەتتىك باسقارۋدىڭ «ادامعا باعدارلانعان» مودەلىندە ەلدەگى قۇقىق ۇستەمدىگى مەن قاۋىپسىزدىكتى قامتاماسىز ەتۋگە ۇندەيتىن سوت جانە قۇقىق قورعاۋ جۇيەلەرىنە ەرەكشە نازار اۋدارىلاتىن بولادى. قوعامنىڭ سوتتارعا دەگەن سەنىمىن نىعايتۋ ءۇشىن سوت بيلىگىنىڭ تاۋەلسىزدىگىن قامتاماسىز ەتۋگە باعدارلانعان سوت اكىمشىلىگىن جۇرگىزۋدىڭ قاعيدالىق جاڭا امالدارى قالىپتاستىرىلماق.
تولىققاندى تاۋەلسىز سوت بيلىگى ادام مەن قوعام تاراپىنان قۇقىقتار مەن مۇددەلەردى ىسكە اسىرۋدى ساپالى قامتاماسىز ەتۋ ءۇشىن بارلىق دەڭگەيدەگى اتقارۋشى بيلىكتىڭ مىنەز-قۇلقى مەن قىزمەتىنىڭ مودەلىن قايتا قۇرىلاتىن بولادى. ينۆەستورلار تاراپىنان مەملەكەتكە سەنىمدى ارتتىرۋ مەن ولاردى قورعاۋ جونىندەگى جۇمىستارى ودان ارى جالعاستىرىلماق. وسى تۇرعىدا احقو سوتىنىڭ كوممەرتسيالىق كەلىسىمشارتتار بويىنشا شارتتىق تالاپتاردى قاراۋ مۇمكىندىگى پايدالانىلادى.
قازاقستاننىڭ سوت كورپۋسى بيلىكتىڭ باسقا تارماقتارىنىڭ قاتىسۋىنسىز جاڭارتىلادى جانە قالىپتاسادى. سۋديالاردى ىرىكتەۋ بارىسى باق-تا قاتار جاريالانادى.
قۇقىق قورعاۋ ورگاندارىنىڭ جۇمىسىن كۇشەيتۋ ءۇشىن قىزمەتكە كىرۋ جانە قىزمەت بابىندا ىلگەرىلەتۋ كەزىندە مەريتوكراتيا قاعيداسىن قامتاماسىز ەتە وتىرىپ, كادرلاردى ىرىكتەۋ ساپاسى ارتادى.
اگەنتتىك توراعاسىنىڭ ايتۋىنشا, تۇجىرىمدامانىڭ ماقساتتارى مەن مىندەتتەرىنە قول جەتكىزۋ ءۇشىن ءار باعىت بويىنشا بىرقاتار ناقتى باستامالار قاراستىرىلعان. قۇجاتتىڭ ساپالى ورىندالۋى مەملەكەتتىك باسقارۋدىڭ تيىمدىلىگىن, مەملەكەتتىك اپپاراتتىڭ اشىقتىعى مەن ەسەپتىلىگىن ارتتىرۋعا, مەملەكەت پەن ازاماتتار اراسىنداعى بايلانىستى جاقسارتۋعا, حالىقتىڭ مەملەكەت ينستيتۋتتارىنا دەگەن سەنىمىن نىعايتۋعا ىقپال ەتۋى ءتيىس.
