نەگىزى ەلدىڭ 2025 جىلعا دەيىنگى ستراتەگيالىق دامۋ جوسپارى 2018 جىلى قابىلدانعان بولاتىن. الايدا پاندەميا جاھاندىق ەكونوميكاعا كەرى اسەر ەتىپ, ەلدەردىڭ دامۋ ستسەناريىنە تۇبەگەيلى وزگەرىس ەنگىزدى. ۇلتتىق جوسپاردى قۇرۋ وسىنداي قاجەتتىلىكتەن تۋىندادى.
ستراتەگيالىق جوسپارلاۋ جانە رەفورمالاۋ اگەنتتىگىنىڭ توراعاسى قايرات كەلىمبەتوۆتىڭ ايتۋىنشا, ۇلتتىق جوسپار ازاماتتاردىڭ ءال-اۋقاتى, ينستيتۋتتاردىڭ ساپاسى جانە مىقتى ەكونوميكا سىندى ءۇش باعىت بويىنشا 10 جالپىۇلتتىق باسىمدىقتان تۇرادى.
– ء«ادىل الەۋمەتتىك ساياسات» جالپىۇلتتىق باسىمدىعى ناتيجەلى جۇمىسپەن قامتۋعا جانە الەۋمەتتىك سالاماتتىلىقتى قامتاماسىز ەتۋگە باعىتتالعان جۇيەلى شارالاردى قامتيدى. بۇل رەتتە, ەڭبەك نارىعىن قالپىنا كەلتىرۋ, جۇمىسسىزدىق دەڭگەيىن تومەندەتۋ ءۇشىن ءتيىستى شارالار قابىلدانادى. الەۋمەتتىك قامسىزداندىرۋ سالاسى جاڭا الەۋمەتتىك كودەكسىمەن رەتتەلمەك. ناتيجەسىندە, جۇمىسسىزدىق دەڭگەيى 2025 جىلعا قاراي 4,7 پايىزدان اسپايتىن بولادى. مەملەكەتتىڭ الەۋمەتتىك تولەمدەر مەن جاردەماقىلار بويىنشا بارلىق الەۋمەتتىك مىندەتتەمەسى تولىق كولەمدە ورىندالادى. ينفلياتسيا دەڭگەيىن ەسكەرە وتىرىپ, الەۋمەتتىك تولەمدەردى يندەكستەۋ جۇرگىزىلەدى, – دەدى ق.كەلىمبەتوۆ.
«قولجەتىمدى جانە ءتيىمدى دەنساۋلىق ساقتاۋ جۇيەسى» جالپىۇلتتىق باسىمدىعى ادامداردىڭ دەنساۋلىعىن جاقسارتۋدى, قولداۋدى جانە قالپىنا كەلتىرۋدى, سونداي-اق قازىرگى جانە بولاشاق ۇرپاقتىڭ يگىلىگىنە ىقپال ەتەتىن تۇراقتى دەنساۋلىق ساقتاۋ جۇيەسى تۇجىرىمداماسىن دامىتۋدى كوزدەيدى. بۇل رەتتە, دارىگەرلەردىڭ جالاقىسىن 2023 جىلعا قاراي 2,5 ەسە ءوسىرۋ مىندەتى تۇر. بارلىق وڭىردە 20 زاماناۋي مەديتسينالىق ورتالىق, نۇر-سۇلتان جانە الماتى قالالارىندا ەكى عىلىمي-يننوۆاتسيالىق كوپبەيىندى كلينيكا سالىنادى. قابىلدانعان شارالاردىڭ ناتيجەسىندە قازاقستاندىقتاردىڭ ءومىر ءسۇرۋ ۇزاقتىعى 75 جاسقا جەتەدى.
«ساپالى ءبىلىم بەرۋ» باسىمدىعى باسەكەگە قابىلەتتى ادام كاپيتالىن دامىتۋدى كوزدەيدى. سوندىقتان 2023 جىلعا قاراي مۇعالىمدەردىڭ جالاقىسىن ەكى ەسە ءوسىرۋ جوسپارلانۋدا. 2025 جىلعا دەيىن ەلىمىزدە 800 جاڭا مەكتەپ سالىنادى. بۇل اپاتتى جانە ءۇش اۋىسىمدىق مەكتەپتەردى جويىپ, ورىن تاپشىلىعى ماسەلەسىن رەتتەيدى. بۇدان بولەك, نازارباەۆ ۋنيۆەرسيتەتىنىڭ تاجىريبەسى بويىنشا 2 جەتەكشى جوعارى وقۋ ورنى قۇرىلماق.
– «ازاماتتاردىڭ مۇددەسىن قورعايتىن ءادىل جانە ءتيىمدى مەملەكەت» جالپىۇلتتىق باسىمدىعى زاڭنىڭ ناقتى ۇستەمدىگىن قامتاماسىز ەتۋگە باعىتتالعان قۇقىقتىق نەگىزدەردى جەتىلدىرۋدى كوزدەيدى. ناتيجەسىندە, ەكونوميكالىق قىزمەتتى ىنتالاندىرۋ, ءومىر ءسۇرۋ ساپاسىن جاقسارتۋ جانە ازاماتتار قۇقىقتارىنىڭ قورعالۋ دەڭگەيىن ارتتىرۋ ءۇشىن جاعدايلار جاسالماق, – دەدى اگەنتتىك توراعاسى.
«مەملەكەتتىك باسقارۋدىڭ جاڭا مودەلى» باسىمدىعى حالىق پەن بيزنەستىڭ مۇددەسىن قاناعاتتاندىرۋعا باعدارلانعان مەملەكەتتىك باسقارۋدىڭ سەرۆيستىك جانە «ادامعا باعدارلانعان» مودەلىن ەنگىزۋدى قۇپتايدى. 2025 جىلعا قاراي مەملەكەتتىك ورگانداردىڭ بارلىق قىزمەتى اۆتوماتتاندىرىلادى ءارى ەلەكتروندى فورماتقا اۋىستىرىلادى. مەملەكەتتىك اپپارات پەن كۆازيمەملەكەتتىك سەكتوردىڭ سانى 25 پايىزعا قىسقارماق.
– «پاتريوتيزم قۇندىلىقتارىن دارىپتەۋ» جالپىۇلتتىق باسىمدىعى ۇلتتىق بىرەگەيلىكتى ساقتاۋعا جانە ءاربىر ازاماتتىڭ ساناسىن جاڭعىرتۋعا باعىتتالعان. جاستاردىڭ ءوزىن ءوزى تانىتۋى, قايىرىمدىلىق مادەنيەتىنىڭ دەڭگەيىن ارتتىرۋ جايى قامتىلادى. «ۇلتتىق قاۋىپسىزدىكتى نىعايتۋ» باسىمدىعى 2025 جىلعا دەيىنگى ۇلتتىق قاۋىپسىزدىك ستراتەگياسى شەڭبەرىندە ۇلتتىق مۇددەلەردى ءتيىمدى قورعاۋدى قامتاماسىز ەتەدى. ناتيجەسىندە, قوعامدىق قاۋىپسىزدىك 80 پايىزعا دەيىن قامتاماسىز ەتىلىپ, كولەڭكەلى ەكونوميكا ۇلەسى 15 پايىزعا دەيىن تومەندەيدى, – دەدى اگەنتتىك باسشىسى.
ۇلتتىق جوسپار اياسىندا ەكونوميكالىق قاتىناستاردىڭ جاڭا جۇيەسىن قالىپتاستىرۋ جاعدايىندا ارتاراپتاندىرىلعان جانە يننوۆاتسيالىق ەكونوميكانى دامىتۋعا باعىتتالعان قۇرىلىمدىق رەفورمالار ىسكە اسىرىلماق. ۇلتتىق ەكونوميكا ءمينيسترى اسەت ەرعاليەۆتىڭ مالىمەتىنشە, رەفورمالاردىڭ ناتيجەسىندە ەكونوميكاداعى ورتا كاسىپكەرلىكتىڭ ۇلەسى 15 پايىزعا دەيىن وسەدى. ال شاعىن جانە ورتا بيزنەستە جۇمىس ىستەيتىندەردىڭ سانى 4 ملن ادامعا دەيىن كوبەيمەك.
– ەكونوميكانىڭ بازالىق سالالارىندا قوسىلعان قۇنى جوعارى ءوندىرىستى دامىتۋ ءۇشىن ساپالى جاڭا تاسىلدەر ىسكە اسىرىلادى. ەكونوميكانى يندۋستريالاندىرۋ جونىندەگى جۇمىستىڭ نەگىزگى ناتيجەسى وڭدەۋشى ونەركاسىپ ءونىمىنىڭ كولەمىن 1,5 ەسە ۇلعايتۋ بولماق. اگروونەركاسىپتە نەگىزگى باسىمدىق اۋقىمدى جانە كەشەندى ەكوجۇيەلەردى قالىپتاستىرۋعا ارنالادى. وسى ماقساتتا 350 مىڭ فەرمەرلىك جانە ءۇي شارۋاشىلىعىن تارتا وتىرىپ, اۋىل شارۋاشىلىعى ونىمدەرىن ءوندىرۋ جانە قايتا وڭدەۋ بويىنشا 7 ءىرى ەكوجۇيە قۇرىلادى. اۋىل شارۋاشىلىعىنىڭ جالپى ءونىمىنىڭ كولەمى 1,3 ەسە, قايتا وڭدەلگەن اگروونەركاسىپ ءونىمىنىڭ ۇلەسى 70 پايىزعا دەيىن ۇلعايادى, – دەدى ءا.ەرعاليەۆ.
سونداي-اق ەكونوميكا سالالارىن تسيفرلاندىرۋ, جاساندى ينتەللەكت جانە Big Data ەلەمەنتتەرىن ەنگىزۋ جۇمىستارى جالعاسادى. ەل حالقىنىڭ 99 پايىزى ساپالى ينتەرنەتكە قول جەتكىزىپ, وبلىس ورتالىقتارى مەن رەسپۋبليكالىق ماڭىزى بار قالالار 5G جوعارى جىلدامدىقتى ينتەرنەتپەن قامتىلادى.
– ءتۋريزمدى دامىتۋ شارالارى ونىڭ ۇلەسىن ىشكى جالپى ءونىمنىڭ 8 پايىزىنا دەيىن وسىرۋگە مۇمكىندىك بەرەدى. ۇيلەستىرىلگەن ماكروەكونوميكالىق ساياسات سالىق-بيۋدجەت تۇراقتىلىعىن ساقتاۋ جانە ءتيىمدى مونەتارلىق ساياساتتى ىسكە اسىرۋ, سونداي-اق باسەكەلى جانە ءتيىمدى قارجى نارىعىن دامىتۋ ەسەبىنەن قامتاماسىز ەتىلمەك. «ەكونوميكالىق جانە ساۋدا ديپلوماتياسىن بەلسەندى دامىتۋ» جالپىۇلتتىق باسىمدىعى قازاقستاننىڭ ناقتى باسەكەگە قابىلەتتىلىگىن ارتتىرۋدى جانە ونىڭ الەمدىك ەكونوميكالىق قوعامداستىقتىڭ جاۋاپتى قاتىسۋشىسى رەتىندەگى مارتەبەسىن نىعايتۋدى كوزدەيدى. سىرتقى ەكونوميكالىق ساياساتتا ينۆەستيتسيالاردى بەلسەندى جانە تارگەتتەپ تارتۋ, سونداي-اق قازاقستاندىق ەكسپورتتى ىلگەرىلەتۋ ماڭىزدى باسىمدىققا اينالادى. وسىعان وراي 2025 جىلعا قاراي تىكەلەي شەتەلدىك ينۆەستيتسيا كولەمىن 30 ملرد دوللارعا جەتكىزۋ جوسپارلانۋدا. شيكىزاتتىق ەمەس ەكسپورت ەكى ەسە, ياعني 41 ملرد دوللارعا ۇلعايادى, – دەدى ۇلتتىق ەكونوميكا ءمينيسترى.
«تەڭگەرىمدى اۋماقتىق دامۋ» جالپىۇلتتىق باسىمدىعى وڭىرلەردىڭ الەۋەتىن اشۋدى جانە ولاردىڭ الەۋمەتتىك-ەكونوميكالىق جۇيەلەرىنىڭ باسەكەگە قابىلەتتىلىگىن نىعايتۋدى كوزدەيدى. 2025 جىلعا قاراي ۋربانيزاتسيا دەڭگەيى 62,6 پايىزدى قۇرايدى دەگەن بولجام بار. سونىمەن قاتار ءاربىر تىرەك اۋىلعا دەيىنگى بارلىق رەسپۋبليكالىق جانە جەرگىلىكتى جول قايتا جاڭارتىلىپ, جوندەلەدى. 3,5 مىڭنان استام اۋىل جاڭا وڭىرلىك ستاندارتتارعا سايكەس جاڭعىرتىلادى.
ۇلتتىق جوسپار 2025 جىلعا قاراي ەكونوميكانىڭ ءوسۋىن 5 پايىزعا قامتاماسىز ەتپەك.
