يمپەريالىق ساياساتتىڭ قول استىندا بولعان حالىق رۋحىنىڭ مىقتىلىعى, ەرجۇرەكتىلىگى ارقاسىندا ۇلكەن مەملەكەتكە يەلىك ەتىپ قالدى. ەل باسقارۋ تاجىريبەسىندە وتكەنىمىز بەن بۇگىنگى كۇننىڭ اراسىندا ەلجاندىلىق, وتانسۇيگىشتىك سياقتى اسىل قاسيەتتەرىمىز ۇرپاقتان-ۇرپاققا جالعاسىپ كەلەدى.
قازاقستان تاۋەلسىزدىك العان ۋاقىتتان بەرى ەلىمىزدە كوپتەگەن وزگەرىس بولدى. ەتەك-جەڭىمىزدى جيىپ, ەل ەڭسەسىن تىكتەپ, الەمگە ءماشھۇر بولدىق. حالىقارالىق بەدەلىمىز نىعايا ءتۇستى. دەسەك تە, ەل ىشىندەگى احۋالعا ۇلكەن قولداۋ كەرەك. حالىقتىڭ الەۋمەتتىك جاعدايى جاقسارىپ جاتسا, جاستاردىڭ ءبىلىم الۋىنا مول مۇمكىندىك بەرىلىپ جاتسا, قۇبا-قۇپ. وسى تۇرعىدان العاندا پرەزيدەنتىمىزدەن باستاپ, بيلىكتە جۇرگەن ءاربىر ازاماتتىڭ تۋعان ەلىمىزگە, حالقىمىزعا تۇڭعىش پرەزيدەنتىمىزدەي جاناشىر بولعانىن قالار ەدىم. ساپالى ءبىلىم مەن ەلدىڭ الەۋمەتتىك جاعدايىنىڭ جاقسارعانى ەلدەگى ساياساتتىڭ دۇرىس باعداردا ءجۇرىپ جاتقاندىعىن كورسەتسە كەرەك-ءتى.
قاي حالىقتى الساق تا ونىڭ دامۋى مادەنيەتى مەن ادەبيەتى, ونەرى مەن بىلىمىنەن كورىنىس بەرەتىنى بەلگىلى. «ونەر سۇيگەن پاتشا – حالىق بايلىعى» دەيدى. ال ۇلان-عايىر دالامىزداعى بايلىعىمىز – حالىقتىڭ مەنشىگى, نەسىبەسى. وسىناۋ يەن بايلىقتى ۇقىپتاپ, ەل يگىلىگىنە جۇمسايتىن باسشىدان بىلىكتىلىك قانا ەمەس, پاراساتتىلىق تا تالاپ ەتىلەدى. قانداي دەڭگەيدەگى باسشى بولماسىن, حالىقتىڭ ۇنىنە قۇلاق اسىپ, ەتەنە جاقىن بولۋى, مۇڭ-مۇقتاجىن تىڭداۋى الداعى اتقارىلار ىستەردىڭ ناتيجەلى بولۋىنا ىقپال ەتپەك. ال قازاق ەلىنىڭ ابىرويلى بولعانى بيلىكتە وتىرعان ازاماتتارىمىزدىڭ كورەگەندىلىگىنە بايلانىستى. مەن ەلىمدى ءبىلىمدى جاستارى بار, حالقى داۋلەتتى, مەيىرىم مەن قايىرىمعا تولى ىستەرىمەن ەرەكشەلەنەتىن مەملەكەت رەتىندە كورگىم كەلەدى.
ءسابيت ورازباەۆ,
قازاقستاننىڭ حالىق ءارتىسى,
مەملەكەتتىك سىيلىقتىڭ لاۋرەاتى
