پەتروپاۆل قالاسى پوليتسيا باسقارماسىنا قالا تۇرعىندارىنان ينتەرنەت-الاياقتىق فاكتىلەرى تۋرالى بىرنەشە ارىز كەلىپ تۇسكەن. بارلىق جاعدايلاردا قاسكوي جابىرلەنۋشىلەردى Instagram الەۋمەتتىك جەلىسىندەگى جالعان ينتەرنەت-دۇكەن پاراقشاسى ارقىلى الداعان. پاراقشانىڭ اكىمشىسى قىمبات تۇراتىن ايەلدەر كيىمى مەن بۇيىمداردى “ساتاتىنداي” سىڭاي تانىتىپ, الدىن الا تولەمدى قولعا تۇسىرگەننەن كەيىن بايلانىسقا شىقپاي قويعان. اتالعان فاكتىلەر سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە قر قىلمىستىق كودەكسىنىڭ 190-بابى 2-بولىگى “الاياقتىق” بويىنشا ەنگىزىلدى.
– كوپ جاعدايدا ايەلدەر الدانىپ قالعان. Instagram الەۋمەتتىك جەلىسىندەگى “Modnyi Store” پاراقشاسىنان كيىمگە تاپسىرىس بەرىپ, الدىن الا تولەمدى اۋدارعان. جىبەرىلگەن سوما ءار ءتۇرلى: 10 مىڭنان 300 مىڭ تەڭگەگە دەيىن. قارجى شوتقا تۇسكەننەن كەيىن قاسكوي بايلانىسقا شىعۋدى قويعان, – دەدى پوليتسەيلەر.
كريمينالدىق پوليتسيا قىزمەتكەرلەرى كۇدىكتىنى جەدەل تەكسەرىس كەزىندە انىقتادى. كۇدىكتى الماتى قالاسىنىڭ تۇرعىنى بولىپ شىقتى. پەتروپاۆلدىق جەدەل ۋاكىلدەر ونى تەمىرتاۋ قالاسىنىڭ اۋماعىندا ۇستادى. قازىرگى ۋاقىتتا كۇدىكتى قاماۋعا الىندى. تەرگەۋشىلەر ونىڭ ۇقساس قىلمىستارعا قاتىسىن تەكسەرۋدە. قازىرگى ۋاقىتتا ءىس ماتەريالدارىندا پەتروپاۆل قالاسى بويىنشا 13 ەپيزود تىركەلگەن.
پوليتسەيلەر تاۋار مەن قىزمەتتەرگە الدىن الا تولەمدى تالاپ ەتۋ – ينتەرنەت-الاياقتاردىڭ ءجيى پايدالاناتىن امالى ەكەندىگى تۋرالى ەسكەرتەدى جانە تاۋاردىڭ بارىنا كوز جەتكىزبەي, الدىن الا تولەمدى جىبەرمەۋگە شاقىرادى. سونداي-اق, قارجى وپەراتسيالارىن جاساماس بۇرىن ينتەرنەت-دۇكەندى كوممەنتاريلەر بويىنشا زەردەلەپ, ساتۋشىدان تاۋاردىڭ بەينە-شولۋىن جىبەرۋدى سۇراعان ءجون.
