كەزىندە يگىباي الىباەۆ, تەمىرعالي قاسەنوۆ, ۋاحيت تەمىربەكوۆ جانە ت.ب. ايتىس سۇلەيلەرى شىققان ءوڭىر كەيىن بۇل ونەردى توقىراتىپ العان. ايتىس قايتا جاندانعان تاۋەلسىزدىك جىلدارى عانا ەرىك اسقاروۆ باستاعان ءبىر شوعىر اقىندار وبلىس نامىسى ءۇشىن شىعىپ ءجۇردى, بىراق قاناتىن كەڭگە جايا المادى. ءسويتىپ, اندا-ساندا كورىنگەن ءبىر-ەكى اقىن بولماسا باسقا جاعىنان بۇل ونەر بىزدە ابدەن تۇرالاپ قالعان ەدى.
سوڭعى جىلدارى بۇل حالىقتىق ونەر سولتۇستىكتە, قۇداي كوپسىنبەسىن, قايتا سامعاپ, قۇلاشىن كەڭگە جايىپ كەلەدى. ەرىك اسقاروۆ اتىنداعى وبلىستىق اقىندار مەكتەبى اشىلىپ, وعان موڭعوليادان كەلگەن تالانتتى قانداسىمىز جارقىن جۇپارحان باسشىلىق ەتىپ, ءتول ونەرىمىز ىرگەسىن بەكىتە باستادى. باسقاسىن ايتپاعاننىڭ وزىندە جارقىن بىلتىرعى كارانتين كۇندەرىنىڭ وزىندە تەلەۆيزيالىق ايتىس ۇيىمداستىرىپ, ول بىرنەشە ايعا سوزىلىپ ايدى اسپانعا ءبىر-اق شىعارعان. اۋرۋ كۇتىپ, اجالدان قورقىپ, جانشىلىپ جۇرگەن جانداردىڭ سانالارى ءبىر سەرپىلىپ, رۋحاني قۋات الىپ, ءبىر جاساڭعىراپ قالعان ەدى سوندا. وبلىستىڭ وزىنەن عانا ايتىساتىن 18 جاس اقىن تاۋىپ, اراسىندا ءۇزىلىسىن جاساي وتىرىپ ولاردى ءبىر-بىرىمەن ايتىستىرىپ, اقىرى فينالعا دا جەتكىزىپ, ونداعى قازىلىقتىڭ توراعالىعىنا ايتىستىڭ اقتاڭگەرى ءجۇرسىن ەرماندى شاقىرىپ, تەرىستىكتىڭ اتاعىن اسپانعا شىعارعان. كارانتين كەزىندە وسىنداي جوبانى ابىرويمەن ىسكە اسىرعانى ءۇشىن ج.جۇپارحانعا مادەنيەت مينيسترلىگى دە ءوزىنىڭ العىسىن بىلدىرگەن.
ودان كەيىن جارقىننىڭ ءوزى 26 اقپان كۇنى تاراز قالاسىندا وتكەن «جامبىل – مەنىڭ جاي اتىم, حالىق – مەنىڭ شىن اتىم» رەسپۋبليكالىق اقىندار ايتىسىنا قاتىسىپ, جۇلدەلى 3-ورىننىڭ بايگەسى 300 مىڭدى قانجىعاسىنا بوكتەرىپ, وبلىسقا ولجا سالدى.
وسى ايتىسقا جارقىن بەكەم دايىندالىپ, سولتۇستىك ءوڭىردىڭ اقىن-جازۋشىلارىمەن جىر الىبىنىڭ قانداي بايلانىستارى بولىپ ەدى دەگەن سياقتى دۇنيەلەردى زەرتتەپ, بىزدەن دە ءبىر كەڭەستەر الدى. وعان ءبىز سول تۇستا «ەگەمەندە» جارىق كورگەن «جامبىل مەن ءسابيت» اتتى ماقالانى وقۋعا كەڭەس بەرگەنبىز. سونىمەن بىرگە جاكەڭ مۋزەيىنىڭ العاشقى ديرەكتورى قىزىلجاردىڭ تۋماسى, مايدانگەر, ءتورت وردەننىڭ يەگەرى, جۋرناليست ەسىلباي قازىبەكوۆ بولعانىن ايتقان ەدىك...
ايتەۋىر ءدۇبىرلى دوداعا قاتىسقان 22 اقىننىڭ اراسىنان ءۇشىنشى ورىن الۋ ءبىزدىڭ ءوڭىر ءۇشىن ۇلكەن مارتەبە ەدى. ءاسانالى ءاشىموۆ باستاعان ۇلت زيالىلارى قازىلىق ەتكەن بۇل ايتىستا جارقىننىڭ جارقىراي كورىنگەنىنە ءماز بولعانبىز.
ەندى جارقىن ءىنىمىز تاعى ءبىر جارقىن باستاما كوتەرىپ وتىر. جاڭا عانا جوندەۋدەن وتكەن وبلىستىق ورىس دراما تەاترىنىڭ ساحناسىندا «ولەڭ ءسوزدىڭ داڭعىلى, بار قازاقتىڭ جامبىلى» اتتى وبلىستىق اقىندار ايتىسىن ناۋرىز مەرەكەسىنە وراي 20 ناۋرىزدا وتكىزگەلى وتىر. وعان 12 اقىن قاتىسپاقشى.
سانيتارلىق-ەپيدەميولوگيالىق تالاپتارعا سايكەس بيلەتتەر زالدى تولتىراتىنداي ەمەس, 30 پايىزدىق قامتۋمەن عانا ساتىلىپ جاتىر. وسى كۇنى قىزىلجارلىقتاردىڭ ءبارىنىڭ اۋزىندا وسى ايتىس ءجۇر. وسىنداي تاماشا رۋحاني سەرپىلىستەردى ۇيىمداستىرۋعا مۇرىندىق بولىپ جۇرگەن جارقىن جۇپارحانعا دەگەن حالىقتىڭ العىسى شەكسىز.
