ءتارتىپ ساقشىلارىنىڭ اراسىندا ۆاكتسينا الدىمەن تۇرعىندارمەن تىعىز بايلانىستا بولاتىن, ۆيرۋس جۇقتىرۋ قاۋپى جوعارى پوليتسەيلەرگە سالىنادى. ولاردىڭ اراسىندا ۋچاسكەلىك پوليتسيا ينسپەكتورلارى, پوترۋلدىك پوليتسەيلەر, يۋۆەنالدىق پوليتسيا جانە باسقا دا قىزمەتتەر بار.
ۆاكتسينا سالماستان بۇرىن مىندەتتى تۇردە دارىگەر دەنە تەمپەراتۋراسىن, جۇرەك قاعىسىن, ارتەريالىق قان قىسىمىن, تىنىس الۋىن جانە جۇرەك-قان تامىرلارى جۇيەسىن, اۋىز قۋىسىن تەكسەرەدى, ەپيدەميولوگيالىق انامنەز ناقتىلانادى.
ۆاكتسيناتسياعا تەك ەكپەگە قارسى كورسەتكىشى جوق قىزمەتكەرلەر عانا كىرگىزىلدى.
ءپوترۋلدى پوليتسيا قىزمەتىنىڭ ينسپەكتورى ايبەك قۇرامىسوۆ ۆاكتسينا العاننان كەيىن ءوزىن قالاي سەزىنىپ تۇرعانىن ايتتى.
«مەديتسينالىق تەكسەرىستەن كەيىن ۆاكتسينانىڭ ءبىرىنشى كومپونەنتىن الدىم. ءوزىمدى قالىپتى سەزىنىپ تۇرمىن, جۇمىس ورنىندامىن. ۆاكتسيناتسيانىڭ ۆيرۋسپەن كۇرەستە كومەگى تيەتىنىنە سەنىمدىمىن. پاندەميا باستالعاننان بەرى پوليتسيا قىزمەتكەرلەرى ءتۇرلى جاعدايمەن ۇشىراسىپ, ۆيرۋس جۇقتىرۋ قاۋپى جوعارى ايماقتاردا الدىڭعى شەپتە ءجۇر عوي», – دەدى پوليتسيا اعا لەيتەنانتى.
ايتا كەتسەك, ۆاكتسيناتسيا نۇر-سۇلتان قالاسى پوليتسيا دەپارتامەنتىنىڭ ەمحاناسىندا ءوتتى. ولارعا قاراعاندىدا وندىرىلگەن وتاندىق گام-كوۆيد ۆاكتسيناسى سالىندى.
№85 مەكتەپ-ليتسەيىنىڭ باستاۋىش سىنىپ مۇعالىمى اينۇر جانسەرىكوۆا ەڭ ءبىرىنشى ءوزىنىڭ وقۋشىلارىنىڭ قاۋىپسىزدىگى ءۇشىن ۆاكتسينا قابىلداعانىن اتاپ ءوتتى.
«بىزگە ناقتى نۇسقاما بەرىلدى جانە الداعى 3 كۇندە بولۋى مۇمكىن سيمپتومدار تۋرالى ءتۇسىندىردى. قىسقا-نۇسقا, ءبارى تۇسىنىكتى جازىلعان. ءبىز ەلىمىزدىڭ ازاماتى جانە پاتريوتتارى رەتىندە ەكپە الۋ ءۇشىن كەلدىك. قانشاما وقۋشىمەن بايلانىستا بولامىز. سوندىقتان ولاردىڭ, ءوزىمىزدىڭ جانە جاقىندارىمىزدىڭ قاۋىپسىزدىگى ءۇشىن ۆاكتسينا سالدىراتىن بولدىق. ءبىزدى ەشكىم كۇشتەپ, ماجبۇرلەپ جاتقان جوق. ەكپە سالدىرۋعا تاعى 7 ارىپتەسىم بىرگە كەلدى», – دەدى اينۇر جانسەرىكوۆا.
ەكپە سالىناتىن ادامعا پروتسەدۋرا وتكىزۋ الگوريتمى كورسەتىلگەن «پاتسيەنتتەر مارشرۋتى» بەرىلەدى.
«الدىن الا جاسالعان ءتىزىم بويىنشا ازاماتتاردى ەكپە سالۋعا شاقىرامىز. جالپى تەكسەرۋدەن وتەدى, قاجەتتى مالىمەتتەر بەرىلەدى. ودان كەيىن پاتسيەنتتىڭ كەلىسىمى الىنىپ, ەكپە سالىنادى. ەكپەدەن سوڭ 30 مينۋت ءبىزدىڭ باقىلاۋىمىزدا بولادى. ەگەر ەشقانداي اللەرگيالىق رەاكتسيا بايقالماسا ۇيىنە جىبەرەمىز»,- دەدى «شيپاگەر» ەمحاناسىنىڭ جالپى تاجىريبە دارىگەرى ساندۋعاش زۇلپۇحاروۆا.
دارىگەردىڭ ايتۋىنشا, 18 جاسقا دەيىنگى بالالارعا, جۇكتى ايەلدەرگە, جرۆي سيمپتومدارى بار, سونىمەن قاتار سوڭعى 6 ايدا كوروناۆيرۋسپەن اۋىرعان ازاماتتارعا ەكپە سالىنبايدى.
ەكپە جاسالعاننان كەيىن 3 كۇن بويى مونشاعا بارۋعا, ياعني ەكپە ورنىن سۋلاۋعا بولمايدى. سپيرتتىك ىشىمدىك ىشۋگە جانە اۋىر جۇمىس ىستەۋگە دە تىيىم سالىنعان.
ەستەرىڭىزگە سالساق, قازاقستاندا ۆاكتسيناتسيا كەزەڭ-كەزەڭىمەن جۇرگىزىلۋدە. ءبىرىنشى كەزەڭدە, كوروناۆيرۋس ينفەكتسياسىنا قارسى ۆاكتسينانى ينفەكتسيالىق اۋرۋحانالاردىڭ دارىگەرلەرى, جەدەل مەديتسينالىق جاردەم ستانتسيالارىنىڭ, جانساقتاۋ بولىمدەرىنىڭ, اۋرۋحانالاردىڭ قابىلداۋ بولىمدەرىنىڭ, سانەپيدقىزمەت جانە باسقا دا بولىمدەردىڭ ماماندارى قابىلدادى. 1 ناۋرىزدان باستاپ ۆاكتسيناتسيانىڭ ەكىنشى كەزەڭىندە پوليتسەيلەر مەن مۇعالىمدەرگە جانە مەديتسينالىق ۇيىمداردىڭ باسقا دا بولىمدەرىنىڭ قىزمەتكەرلەرىنە ەكپە سالىنۋدا. ال ۆاكتسيناتسيانىڭ ءۇشىنشى كەزەڭىندە سوزىلمالى اۋرۋلارى بار جانە باسقا دا ساناتتاعى ازاماتتار قامتىلادى. جىل سوڭىنا دەيىن قازاقستاندا ۆاكتسينا قابىلداعان ازاماتتار سانىن 6 ميلليونعا جەتكىزۋ كوزدەلىپ وتىر.
