مۇگەدەكتىگى بار بالالاردىڭ انالارى بىرقاتار پروبلەما مەن ۇسىنىستى ايتتى. اتاپ ايتقاندا, ايەلدەردى مۇگەدەكتىگى بار بالا كۇتىمى بويىنشا جاردەماقىمەن بىرگە اسىراۋشىسىنان ايىرىلۋ بويىنشا جاردەماقى تولەۋ مۇمكىندىگىن قاراۋ ماسەلەسى الاڭداتتى.
بۇل ماسەلەنىڭ شەشىمى پارلامەنت ءماجىلىسىنىڭ قاراۋىندا جاتقان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا كورىنىس تاپتى.
«بۇل اسىراۋشىسىنان ايىرىلعان جانە قۇرامىندا مۇگەدەك بالالارى بار وتباسىلاردىڭ تابىس دەڭگەيىن ارتتىرۋعا مۇمكىندىك بەرەدى. وسى نورمانى ەنگىزگەن كەزدە 2 مىڭ بالا مۇگەدەكتىگى بويىنشا جاردەماقىمەن قاتار اسىراۋشىسىنان ايرىلۋ جاعدايى بويىنشا جاردەماقى الا الادى. قازىرگى ۋاقىتتا تاڭداۋ بويىنشا جاردەماقىنىڭ ءبىر ءتۇرى عانا بەرىلەدى», دەپ اتاپ ءوتتى ەرلان اۋكەنوۆ.
سونداي-اق مامانداندىرىلعان ورتالىقتاردا بالالاردى وڭالتۋ تۋرالى ماسەلە قوزعالدى. بۇگىنگى كۇنى قازاقستاندا حالىقتى الەۋمەتتىك قورعاۋ سالاسىندا 40 وڭالتۋ ورتالىعى جۇمىس ىستەيدى, ونىڭ ىشىندە 2020 جىلى ەڭبەك جانە حالىقتى الەۋمەتتىك قورعاۋ مينيسترلىگىنىڭ باستاماسىمەن 12 جاڭا ورتالىق اشىلدى. ەڭبەكمينى 2025 جىلعا دەيىن ولاردىڭ سانىن 2 ەسەگە ارتتىرۋدى جوسپارلاپ وتىر.
قازاقستاندا ەرەكشە قاجەتتىلىكتەرى بار ادامدارعا ءتۇرلى الەۋمەتتىك قولداۋ شارالارى كورسەتىلەتىنىن اتاپ وتكەن ءجون. اتاپ ايتقاندا, مۇگەدەكتىگى بار بالا تاربيەلەپ وتىرعان ازاماتتارعا اي سايىنعى جاردەماقى, بالا كەزىنەن I توپتاعى مۇگەدەككە كۇتىم جاساۋ بويىنشا اي سايىنعى جاردەماقى تولەنەدى. وڭالتۋدىڭ تەحنيكالىق قۇرالدارىنىڭ 55 ءتۇرىن (67 تۇرلەرىن ەسكەرە وتىرىپ), جەكە كومەكشىلەردىڭ قىزمەتتەرىن, ساناتورلىق-كۋرورتتىق ەمدەۋ, قالالىق قوعامدىق كولىكتە تەگىن ءجۇرۋ جانە ينۆاتاكسي قىزمەتتەرىن الۋ مۇمكىندىگى بار. مۇگەدەكتىگى بار ادامدارعا (I, II توپتاعى) بىرجولعى اقشالاي تولەمدەر, ءتىس پروتەزدەۋ قىزمەتتەرى, قاتتى وتىن ساتىپ الۋعا الەۋمەتتىك كومەك جانە ت. ب. ۇسىنىلادى.
