«16 ناۋرىزدا ساعات 00:45-تە قاراعاندىنىڭ 21-شاعىناۋدانىندا 5-قاباتتاعى ءبىر بولمەلى پاتەردە گاز-اۋا قوسپاسىنىڭ جارىلىسى بولىپ, 5 شارشى مەتر اۋماقتا ءۇي زاتتارى مەن جيھازدارى جانىپ كەتتى. ءورت ورنىنان 1994 جىلى تۋعان ەر ادام اۋرۋحاناعا جەتكىزىلدى. ءورت 1 ساعات 19 مينۋتتا ءسوندىرىلدى. تجد كۇشىمەن باسپالداق مارشى بويىنشا ءبىر ادام قۇتقارىلىپ, 25 ادام (ونىڭ ىشىندە التى بالا) ەۆاكۋاتسيالاندى. وقيعا ورنىنا تجد-ءنىڭ 40 قىزمەتكەرى مەن 11 تەحنيكاسى جۇمىلدىرىلدى. الدىن الا بولجام بويىنشا, وتتىڭ شىعۋ سەبەبى – 27 ليترلىك گاز باللونىنىڭ رەدۋكتورىنان گاز-اۋا قوسپاسىنىڭ اعىپ كەتۋى. قاراعاندى وبلىسىنىڭ تجد ەسكە سالادى: 2 قاباتتان ارتىق قاباتتى كوپپاتەرلى ۇيلەردە گاز باللوندارىن پايدالانۋعا تىيىم سالىنادى. تەك جارامدى گاز جابدىقتارىن پايدالانۋ قاجەت», دەپ حابارلادى قاراعاندى وبلىستىق تجد-دان.
قاراعاندى وبلىسىنىڭ دەنساۋلىق ساقتاۋ باسقارماسى ەر ادامنىڭ جاعدايى تۋرالى حابارلادى.
«16 ناۋرىزدا 1994 جىلى تۋعان ناۋقاس پريشاحتينسكىدەن جەدەل جاردەم بريگاداسىمەن ماقاجانوۆ كلينيكاسىنىڭ قابىلداۋ بولمەسىنە شامامەن 1 ساعات 30 مينۋتتا جەتكىزىلدى. ناۋقاس وتە اۋىر جاعدايدا, اياق-قول, بەت, مويىن, ارقانىڭ 45% ءىىى B دارەجەلى كۇيىك جاراقاتىمەن, كۇيىك شوگى كۇيىندە جەتكىزىلدى. قازىرگى ۋاقىتتا ناۋقاس جانساقتاۋ بولىمىندە جاتىر, جاعدايى تۇراقتى اۋىر دەپ باعالانۋدا», دەپ ناقتىلادى ۆەدومستۆودان.
جارىلىس سالدارىنان تۇرعىن ۇيدە ەلەكتر ەنەرگياسى اقاۋلارى پايدا بولدى. الايدا, «قاراعاندى جارىق» جشس ءباسپاسوز قىزمەتىنىڭ حابارلاۋىنشا, قازىر ەلەكتر قۋاتى تەك جارىلىس بولعان كىرەبەرىستە عانا جوق. وكتيابر اۋدانىنىڭ اكىمدىگى پاتەر مەن كىرەبەرىستى تازالاۋ جۇمىستارىن ۇيىمداستىردى.
«تۇرعىندار اراسىندا باسقا زارداپ شەككەندەر جوق جانە ولاردىڭ بارلىعى ءوز پاتەرلەرىندە. ۇيدە جىلىتۋ جانە سۋ بەرۋ قالىپقا كەلتىرىلدى. ەلەكتر ەنەرگياسىنا كەلەتىن بولساق, ول تەك ءورت بولعان كىرەبەرىستە عانا جوق, جاقىن ارادا «قاراعاندى جارىق« جشس ماماندارى ماسەلەنى شەشەتىن بولادى. جەرگىلىكتى اكىمدىكتىڭ كۇشىمەن پاتەردى بولعان جاعدايدان تازارتۋ جۇمىستارى ۇيىمداستىرىلدى», دەپ ءتۇسىندىردى ۆەدومستۆودا.
ەسكە سالا كەتەيىك, قارماقشى اۋدانى, جوسالى كەنتى, رۇستەمبەكوۆ كوشەسى, 29, جەكە تۇرعىن ۇيدە تۇسكى 13:30 كەزىندە 27 ليترلىك گاز باللونى جارىلدى. 144 شارشى مەتر جەر ورتكە ورانىپ, 4 ادام قايتىس بولعان ەدى.
