كوپبالالى انا ايسۇلۋ قۇزدىباەۆا بەس بالاسىن اياداي ۇيدە عانا تاربيەلەپ وتىر. قالاعا ايەل تاياۋدا كەلگەن. ول ءىرى سوماداعى قاعازدى العان كەزدە قۋانىشىندا شەك بولماعان. الايدا سەرتيفيكاتتىڭ ەشقانداي قۇنى بولماي, جاي عانا قاعاز بولىپ شىققان. امالى قالماعان ايسۇلۋ 5 بالاسىمەن بىرگە جاتاقحانانىڭ 14 شارشى مەتر جەرىن پانالاۋدا.
كوپبالالى انا بۇعان دەيىن جاعدايىنىڭ ناشارلىعىن ايتىپ, الەۋمەتتىك جەلى ارقىلى كومەك سۇراعان. وعان ەرىكتىلەر ءۇن قاتىپ, ۇيىنە جوندەۋ جۇرگىزىپ, تەلەديداردان باستاپ توبەگە ىلەتىن شامىنا دەيىنگى كەرەك-جاراقتارىن الىپ بەرگەن. ەندى سونىڭ بارىنە 2 ملن تەڭگەدەي قاراجات جۇمسالىپتى-مىس.
بەلگىلى بولعانداي ايسۇلۋ قۇزدىباەۆا 1 ناۋرىزدا ايەل العىس كۇنىنە ارنالعان شاراعا شاقىرىلعان. اقتوبە وبلىسىنىڭ اكىمى كوپبالالى اناعا سالتاناتتى شارادا سەرتيفيكات تابىستاعان. بىراق وتباسى اقشانى قايدان الارىن بىلمەگەن.
«وبلىس اكىمى تاپسىردى. ەكى ميلليونىم بار دەپ, ەندى وعان ءسال اقشا قوسىپ, باسقا باسپانا ساتىپ العىم كەلگەن. كورشىلەرىم كەلىپ قۇتتىقتاعان. سويتسە, بۇل جاي عانا قاعاز بولىپ شىقتى», دەيدى كوڭىلى قالعان انا.
شەنەۋنىكتەر بولسا ايەلگە بۇل سەرتيفيكاتتىڭ قۇنى جوعىن ەسكەرتكەنبىز دەپ وتىر. ول قازاقستان حالقى اسسامبلەياسىنىڭ وبلىستىق فيليالى اتىنان كوپبالالى اناعان كورسەتىلگەن كومەكتى كورسەتۋ ءۇشىن تاپسىرىلعان بولىپ شىقتى.
«جاستاردان جوندەۋ جۇمىسىنا قانشا اقشا شىعاردىڭىزدار دەپ سۇرادىق. ولاردىڭ ايتۋىنشا, جوندەۋ جۇرگىزىپ, جيھاز ساتىپ العان, جالپى ەكى ميلليونداي شىعارعان. كورسەتىلگەن كومەكتىڭ سوماسىن كورسەتۋ ءۇشىن ايسۇلۋعا وسى سەرتيفيكاتتى تاپسىردىق. بۇعان اقشا بەرە مە دەپ تە سۇراعان. بەرىلمەيتىنىن تۇسىندىردىك, بۇل سوماعا جوندەۋ جۇمىستارىن جۇرگىزىلگەنىن ايتىپ, وسىنى كورسەتكىمىز كەلدى», دەيدى قازاقستان حالقى اسسامبلەياسى اقتوبە وبلىستىق فيليالى حاتشىلىعىنىڭ جەتەكشىسى مارجان قورعانباەۆا.
