ءىس-شارانى اشقان ءماجىلىسى توراعاسىنىڭ ورىنباسارى بالايم كەسەباەۆا قازىرگى ۋاقىتتا تەحنيكالىق جانە كاسىپتىك ءبىلىم بەرۋ كادرلارىن, NEET ساناتىنداعى جاستاردى, از قامتىلعان, كوپ بالالى وتباسىلاردان شىققان بالالاردى جانە اۋىل جاستارىن دايارلاۋعا 2020-2021 جىلدارعا ارنالعان مەملەكەتتىك ءبىلىم بەرۋ تاپسىرىسىن ۇلعايتۋ جونىندەگى جول كارتاسى ىسكە اسىرىلىپ جاتقانىن ايتا كەلىپ: «Nur Otan» پارتياسىنىڭ سايلاۋالدى باعدارلاماسى اياسىندا «وزگەرىستەر جولى: ءار ازاماتقا لايىقتى ءومىر!» 2025 جىلعا قاراي بارلىق تىلەك بىلدىرۋشىلەردى اقىسىز تەحنيكالىق جانە كاسىپتىك ءبىلىم بەرۋمەن قامتۋ 100%-عا جەتۋ قاراستىرىلعان. بۇل ءۇشىن رەسپۋبليكالىق بيۋدجەتتەن قوسىمشا 50 مىڭ ورىنعا مەملەكەتتىك ءبىلىم بەرۋ تاپسىرىسىن ۇلعايتۋعا قاراجات كوزدەلىپ وتىر. بۇل شارالار نەگىزگى مەكتەپتەن كەيىن جۇمىسشى ماماندىقتارعا عانا ەمەس, ورتا بۋىن ماماندىقتارىنا قولجەتىمدىلىكتى قامتاماسىز ەتۋگە, حالىقتىڭ الەۋمەتتىك وسال ساناتتارىنداعى بالالاردىڭ ماماندىق الۋىنا مۇمكىندىك بەرەدى», دەدى ۆيتسە-سپيكەر.
وتىرىسقا ءماجىلىس دەپۋتاتتارى, ءبىلىم جانە عىلىم ۆيتسە-ءمينيسترى ب.اسىلوۆا, ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ە.وسپانوۆ, دەنساۋلىق ساقتاۋ ۆيتسە-ءمينيسترى ا.عينيات, وبلىستار جانە رەسپۋبليكالىق ماڭىزى بار نۇر-سۇلتان, الماتى جانە شىمكەنت قالالارى اكىمدەرىنىڭ ورىنباسارلارى, «اتامەكەن» ۇلتتىق كاسىپكەرلەر پالاتاسىنىڭ, كوللەدجدەردىڭ, ۇكىمەتتىك ەمەس ۇيىمداردىڭ جانە باق وكىلدەرى قاتىستى.
سونىمەن قاتار كەڭەيتىلگەن تاقىرىپتىق وتىرىستا ەلدەگى تەحنيكالىق جانە كاسىپتىك ءبىلىم بەرۋ جۇيەسىنىڭ اعىمداعى جاي-كۇيى, دامىتۋدىڭ وزەكتى ماسەلەلەرى, سونداي-اق ولاردى ودان ءارى شەشۋ جولدارى جان-جاقتى تالقىلاندى.
ايتا كەتۋ كەرەك, بۇگىنگى تاڭدا ەلىمىزدە تەحنيكالىق جانە كاسىپتىك ءبىلىم بەرۋ جۇيەسىنىڭ جان-جاقتى دامۋىنا ەرەكشە نازار اۋدارىلۋدا. 2017 جالدان باستاپ قازاقستان رەسپۋبليكاسىنىڭ تۇڭعىش پرەزيدەنتى-ەلباسى نۇرسۇلتان ءابىش ۇلى نازارباەۆتىڭ باستاماسىمەن «بارشاعا ارنالعان تەگىن كاسىپتىك-تەحنيكالىق ءبىلىم بەرۋ» جوباسى ىسكە اسىرىلۋدا. وسى جوبا اياسىندا جىل سايىن 21 مىڭ جاس جۇمىسشى ماماندىقتارىن يەگەرۋدە.
اتالعان جوبامەن «ەڭبەك» مەملەكەتتىك باعدارلاماسىمەن 2017 جىلدان باستاپ 300 مىڭنان استام ادام قامتىلدى. ولاردىڭ 80%-ى حالىقتىڭ الەۋمەتتىك وسال توپتارىنان, NEET ساناتىنداعى جاستار ۇلەسىنىڭ دەڭگەيى 9,5%-دان (2016 ج.) 7%-عا دەيىن (2019 ج.) تومەندەدى. مەملەكەت باسشىسى قاسىم-جومارت توقاەۆ ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا تەحنيكالىق جانە كاسىپتىك ءبىلىم بەرۋدە اكادەميالىق دەربەستىكتى ەنگىزۋ, جان باسىنا شاققانداعى قارجىلاندىرۋدى جەتىلدىرۋ ەڭبەك نارىعىنىڭ بولاشاعىن ەسكەرۋ قاجەتتىگىنە نازار اۋداردى.
وسىعان وراي, «تجكب بار كادرلاردى, ونىڭ ىشىندە NEET ساناتىنداعى جاستاردى, از قامتىلعان, كوپ بالالى وتباسىلاردان شىققان بالالاردى جانە اۋىل جاستارىن دايارلاۋعا 2020-2021 جىلدارعا ارنالعان مەملەكەتتىك ءبىلىم بەرۋ تاپسىرىسىن ۇلعايتۋ جونىندەگى» جول كارتاسى ىسكە اسىرىلۋدا. ونىڭ اياسىندا مەملەكەتتىك تاپسىرىستى جەرگىلىكتى بيۋدجەتتەن جىل سايىن 2% -عا ۇلعايتۋ جوسپارلانىپ وتىر.
بيىلدان باستاپ تجكب-عا كوللەدجدەرگە قابىلداۋدىڭ جاڭا فورماتى «اقشا ستۋدەنتپەن» قاعيداتى بويىنشا ەنگىزىلۋدە. وسىعان بايلانىستى, كوللەدجدەرگە مەملەكەتتىك تاپسىرىس بويىنشا وقۋعا قابىلداۋ ءبىلىم تۋرالى (اتتەستات, كۋالىك) قۇجاتتىڭ مىندەتتى جانە بەيىندىك پاندەرىنىڭ باعالارى بويىنشا جۇزەگە اسىرىلادى.
وتىرىستى قورىتىندىلاعان الەۋمەتتىك-مادەني دامۋ كوميتەتىنىڭ ءتورايىمى ج. نۇرمانبەتوۆا جيىنداي ايتىلعان ۇسىنىس-پىكىرلەر نەگىزىندە ۇسىنىمدار ازىرلەنىپ, ۇكىمەتكە جولداناتىنىن ايتتى.
