سەسسيا تاقىرىبى – «ايەلدەردىڭ قوعامدىق ومىرگە جانە شەشىمدەر قابىلداۋعا جان-جاقتى جانە ءتيىمدى قاتىسۋى, سونداي-اق گەندەرلىك تەڭدىككە قول جەتكىزۋ ءۇشىن زورلىق-زومبىلىقتى جويۋ جانە ايەلدەر مەن قىزداردىڭ ءرولىن كۇشەيتۋ».
ايەلدەر جاعدايى جونىندەگى كوميسسيانىڭ (اجك) 65-ءشى سەسسياسى شەڭبەرىندە مينيسترلىك دوڭگەلەك ۇستەلىندە اقپارات جانە قوعامدىق دامۋ ءمينيسترى ايدا بالاەۆا بەينەبايانداما جاسادى. ءوز سوزىندە ا. بالاەۆا قازاقستاندىق ايەلدەردىڭ قوعامنىڭ ەكونوميكالىق جانە ساياسي ومىرىندەگى ءرولى جانە ولاردىڭ جان-جاقتى دامۋى ءۇشىن جاسالىپ جاتقان جاعدايلار تۋرالى ايتىپ بەردى. مينيستر ەرلەر مەن ايەلدەردى تەڭ جۇمىسپەن قامتۋعا قول جەتكىزۋ, گەندەرلىك اعارتۋدى ىلگەرىلەتۋ, اۋىلداعى ايەلدەردى قولداۋ, بالالار مەن ايەلدەرگە قاتىستى وتباسىنداعى زورلىق-زومبىلىقتىڭ الدىن الۋ ءۇشىن ۇنەمى مەملەكەت شارالار قابىلداپ وتىرعاندىعىن جەتكىزدى.
«2023 جىلعا دەيىن مينيسترلىك وڭىرلەر, قالالار مەن اۋداندار بولىنىسىندە جۇمىسپەن قامتۋ, بارلىق ايەلدەردىڭ بازالىق الەۋمەتتىك قىزمەتتەرگە قولجەتىمدىلىگى, مەملەكەتتىك قولداۋدىڭ ءتۇرلى شارالارى بولىگىندە گەندەرلىك قاجەتتىلىكتەر كارتاسىن ازىرلەپ, قولدانىسقا ەنگىزەتىن بولادى», دەپ اتاپ ءوتتى ايدا بالاەۆا.
ماسەلەن, 2020 جىلى قازاقستاندا زاڭعا تۇزەتۋلەر ەنگىزىلدى, وندا پارتيالىق تىزىمدەر كەمىندە 30%-عا ايەلدەر مەن جاستاردان تۇرۋى ءتيىس دەپ جازىلعان.
«بۇگىنگى تاڭدا ەلىمىزدە مەملەكەتتىك قىزمەتتە باسشىلىق لاۋازىمداردى اتقاراتىن ايەلدەردىڭ ۇلەسى شامامەن 40%-دى, سوت ورگاندارىندا – 53%-دى, قوعامدىق كەڭەستەردىڭ قىزمەتىندە – 27,2%-دى قۇرايدى», دەدى ا.بالاەۆا.
سونداي-اق اجك 65-ءشى سەسسياسىنىڭ جۇمىسىنا پارلامەنت ءماجىلىسىنىڭ دەپۋتاتى, قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ل.رامازانوۆا, قر ىشكى ىستەر ءمينيسترى ە.تۇرعىمباەۆ قاتىسۋدا.
جالپى, دوڭگەلەك ۇستەل جۇمىسىنا الەمنىڭ 20 ەلىنىڭ وكىلدەرى قاتىستى. ولاردىڭ ىشىندە: كولۋمبيانىڭ ۆيتسە-پرەزيدەنتى مارتا لۋسيا راميرەز, يتاليانىڭ تەڭ مۇمكىندىكتەر جانە وتباسى ءمينيسترى ەلەنا بونەتتي, كەنيانىڭ مەملەكەتتىك قىزمەت جانە گەندەر ءمينيسترى مارگارەت كوبيا, ءباا قوعامدىق دامۋ ءمينيسترى گەسسا بينت ەسسا بۋحۋمايد جانە باسقالار.
ەستەرىڭىزگە سالا كەتەيىك, ايەلدەردىڭ جاعدايى جونىندەگى كوميسسيا — بۇۇ ەكونوميكالىق جانە الەۋمەتتىك كەڭەسى جانىنداعى قوسالقى قۇرىلىمداردىڭ ءبىرى. كوميسسيا 1995 جىلى ايەلدەردىڭ جاعدايى جونىندەگى دۇنيەجۇزىلىك كونفەرەنتسيادا قابىلدانعان بەيجىڭ ءىس-قيمىل تۇعىرناماسىندا ايقىندالعان پروبلەمالاردىڭ پروگرەسىن قاداعالايدى.
