قر سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتى باسشىسىنىڭ ورىنباسارى تالعات باشەۆتىڭ ايتۋىنشا, پارا الدى دەگەن كۇدىككە ىلىنگەن ە.م. ادىلوۆكە قاتىستى سوتقا دەيىنگى تەرگەۋ بيىلعى جىلدىڭ 16 اقپانىندا باستالدى.
- قر قىلمىستىق كودەكسىنىڭ 366-بابى, 2-بولىگىمەن ءىس قوزعالدى. قازىرگى ۋاقىتتا ءىستىڭ ءمان-جايىن انىقتاۋعا باعىتتالعان تەرگەۋ ارەكەتتەرى جۇرگىزىلۋدە. تەرگەۋ مۇددەلەرىنە قاتىستى باسقا اقپارات جاريا ەتۋگە جاتپايدى, دەدى ول.
ەرلان ءادىلوۆ 2020 جىلدىڭ ماۋسىم ايىندا الماتى قالالىق موبيلدىك باسقارماسىنىڭ باستىعى بولىپ تاعايىندالعان ەدى. ەرلان ءادىلوۆ 1976 جىلى تۋعان. م. تىنىشپاەۆ اتىنداعى قازاق كولىك جانە كوممۋنيكاتسيا اكادەمياسىن بىتىرگەن. كولىك جانە قۇقىقتانۋ سالالارى بويىنشا ەكى جوعارى ءبىلىمى بار. كولىك سالاسىنداعى قىزمەتى الماتىداعى «№4 اۆتوبۋس پاركى» جشس تەحنيكا قاۋىپسىزدىگىنىڭ ينجەنەرىنەن باستالدى. مەملەكەتتىك قىزمەتكە 2007 جىلى كەلدى. 2008 جىلدان باستاپ الماتى قالاسىنىڭ جولاۋشىلار كولىگى جانە اۆتوموبيل جولدارى باسقارماسىندا كولىك ءبولىمىنىڭ مامانى بولدى. اتالعان باسقارمادا جۇمىس اتقارعان جىلدارى مەملەكەتىك قىزمەتتىڭ بارلىق ساتىلارىنان ءوتتى.
