وسىعان وراي مەملەكەت باسشىسى قاسىم-جومارت توقاەۆ قازاقستاندىق يمانبەك زەيكەنوۆكە اسا بەدەلدى Grammy مۋزىكالىق سىيلىعىنىڭ تابىس ەتىلۋى جونىندەگى جاڭالىقتى زور قۋانىشپەن قابىلدادى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي ءوزىنىڭ Facebook پاراقشاسىندا جازدى. ء«وزىنىڭ تالانتى مەن ماقسات قويا ءبىلۋىنىڭ ارقاسىندا ديدجەي Imanbek الەمدىك شوۋ-بيزنەستىڭ باستى سىيلىقتارىنىڭ ءبىرىن يەلەندى. ونىڭ شىعارماشىلىعى قازاقستاندىق جاستاردىڭ دا ەڭ بيىك شىڭداردى باعىندىرا الاتىنىن دالەلدەدى. پرەزيدەنتتىڭ اتىنان يمانبەكتى وسى جارقىن جەڭىسىمەن قۇتتىقتايمىن جانە جاڭا شىعارماشىلىق تابىستار تىلەيمىن!», دەلىنگەن جازبادا.
ەسكە سالا كەتەيىك, «Egemen Qazaqstan» گازەتى العاشقىلاردىڭ ءبىرى بولىپ جاس ونەرپازدىڭ دارىنىنا ەرەكشە قىزىعۋشىلىق ءبىلدىرىپ, ءۇن قوسقانى, 2020 جىلدىڭ 18 قىركۇيەكتەگى سانىندا «يمانبەكتىڭ يىرىمدەرى» اتتى ماقالا جارىق كورگەنى وقىرمانداردىڭ ەسىندە بولار.
كەشەگى ءسۇيىنشى جاڭالىق اتالعان سىيلىقتىڭ Twitter پاراقشاسىندا حابارلاندى. 21 جاستاعى تانىمال رەپەر 63-رەت ۇيىمداستىرىلعان Grammy جۇلدەسى ءۇشىن باق سىناسقان ءتورت ۇمىتكەردىڭ ىشىنەن قارا ءۇزىپ شىققان. سىيلىقتى العان ساتىندە ول ەڭ الدىمەن اتا-اناسىنا, كومانداسىنا, مەنەدجەرىنە جانە Grammy قازىلارىنا العىسىن جەتكىزەدى. ءوز جازباسىندا: ء«ار مۋزىكانتتىڭ شىعارماشىلىق جولىنداعى ەڭ كەرەمەت ءسات – Grammy سىيلىعىن يەلەنۋ. ءبىز وسى جەتىستىككە قول جەتكىزدىك», دەدى مۋزىكانت.
جۋىردا كوپشىلىككە ديدجەي رەتىندە تانىلعان جەرلەسىمىز Imanbek Rita Ora جانە David Guetta سياقتى الەمگە ايگىلى مۋزىكانتتارمەن بىرگە ءان جازعان بولاتىن. ءوزىنىڭ ايتۋىنشا, ول ءان ارلەۋدى جەرگىلىكتى ديدجەيلەر مەن پروديۋسەرلەردەن جانە Youtube جەلىسىندەگى ۆيدەوساباقتاردان ۇيرەنگەن.
2019 جىلى يمانبەك رەپەر Saint Jhn-نىڭ Roses دەگەن ءانىن بايقاپ, ونى بيلەۋگە ىقشامداپ رەميكس جاساعان. رەميكس وتە جىلدام قارقىنمەن تانىمال بولا باستادى. دۇنيە جۇزىندەگى ءبىرشاما چارتتاردا بولدى. رەميكس YouTube-تە 145 ميلليوننان اسا قارالىم جيناعان.
The New York Times باسىلىمىنا سۇحبات بەرگەن يمانبەك اتا-اناسىمەن بىرگە پاۆلودار وبلىسىنا قاراستى اقسۋ قالاسىندا تۇرادى.
كەيىنگى جىلدارى ءان ونەرى مەن كينو سالاسىنداعى ەل تالانتتارى الەمدىك ارەنادا ءجيى توپ جارىپ ءجۇر. اسقاق ۇنىمەن جەر-جاھاندى تامساندىرعان الەمدەگى ەڭ تانىمال قازاقستاندىق ديماشتىڭ ءوزى ءبىر توبە. كانن كينوفەستيۆالىندە ەڭ ۇزدىك ايەل ءرولى ءۇشىن ماراپاتتالعان سامال ەسلياموۆانىڭ جۇلدىزدى جەڭىسىن دە ۇمىتا قويعان جوقپىز. قازاق ونەرىنىڭ دەڭگەيىن كوتەرىپ, مارتەبەسىن اسىراتىن ونەرپازدار كوپ بولسىن دەيمىز.
