زەرتتەۋ قازاقستانداعى مەملەكەتتىك قىزمەت تۋرالى قولدانىستاعى زاڭناماعا جاڭا ەرەجەلەر ەنگىزىلگەننەن كەيىن مەملەكەتتىك قىزمەتشىلەردىڭ ادەپ نورمالارىن ساقتاۋ دەڭگەيىن تالداۋعا باعىتتالدى. ساۋالناماعا بارلىعى 7000 رەسپوندەنت, ونىڭ ىشىندە مەملەكەتتىك قىزمەتشىلەر, كاسىپكەرلەر, زاڭدى تۇلعالار, سونداي-اق تاۋەلسىز ساراپشىلار قاتىستى.
«بۇۇ دامۋ باعدارلاماسىمەن ىنتىماقتاستىق – اگەنتتىك قىزمەتىنىڭ ماڭىزدى قۇرامداس بولىگى. بۇۇدب قولداۋىمەن مەملەكەتتىك اپپاراتتى كاسىبيلەندىرۋگە بايلانىستى كوپتەگەن جوبالار جۇزەگە اسىرىلدى, بۇل اگەنتتىكتىڭ الەۋەتىن نىعايتۋعا, قازاقستانداعى مەملەكەتتىك قىزمەت جۇيەسىن دامىتۋعا جانە مەملەكەتتىك قىزمەتتەردىڭ ساپاسىن جاقسارتۋعا وڭ اسەر ەتۋدە. وسى ساۋالناما اگەنتتىككە مەملەكەتتىك اپپارات ەتيكاسىن جاقسارتۋ بويىنشا ودان ءارى شارالار ازىرلەۋدە ايتارلىقتاي كومەك كورسەتەدى دەپ ويلايمىز. سونداي-اق, بۇل كەزدەسۋ اگەنتتىك پەن بۇۇدب اراسىنداعى مەملەكەتتىك قىزمەت سالاسىنداعى ىنتىماقتاستىقتى نىعايتۋداعى تاعى ءبىر قادام بولادى دەپ ۇمىتتەنەمىز», دەدى مەملەكەتتىك قىزمەت ىستەرى اگەنتتىگى ستراتەگيالىق دامۋ جانە حالىقارالىق باعدارلامالار دەپارتامەنتىنىڭ ديرەكتورى ازامات جولمانوۆ.
«بۇۇدب مەملەكەتتىك قىزمەت ىستەرى اگەنتتىگىمەن ۇزاق مەرزىمدى سەرىكتەستىكتى جوعارى باعالايدى, ونىڭ اياسىندا بىرقاتار ءساتتى جوبالار مەن ماڭىزدى باستامالار جۇزەگە اسىرىلدى. ءبىز مەملەكەتتىك قىزمەتتەگى ەتيكا مەن ادالدىق قاعيداتتارىنىڭ ورىندالۋىنا قولداۋ كورسەتەتىن بولامىز», دەدى قازاقستانداعى بۇۇدب-نىڭ ءتيىمدى باسقارۋ دەپارتامەنتىنىڭ ديرەكتورى كونستانتين سوكۋلسكي زەرتتەۋ ناتيجەلەرىن تانىستىرۋعا ارنالعان ءىس-شارادا.
ساۋالناما ناتيجەلەرى بويىنشا رەسپوندەنتتەردىڭ ۇشتەن ءبىرى (37,5 پايىزى) مەملەكەتتىك قىزمەتشىلەردىڭ جارتىسىنان كوبى ادەپ كودەكسى تالاپتارىن ساقتايدى دەپ سانايدى. 34,9%-ى مەملەكەتتىك قىزمەتشىلەردىڭ مىنەز-ق ۇلىق ادەبىنە قاتىستى جاعداي جاقسارىپ كەلەدى دەپ سانايدى; 31%-ى جاعدايدىڭ ءاردايىم جاقسى بولىپ قالاتىنىنا سەنىمدى.
2020 جىلدىڭ ناتيجەلەرىن 2017, 2018 جىلدارداعى ناتيجەلەرمەن سالىستىرساق, ايتارلىقتاي وزگەرىستەردى كورۋگە بولادى, ياعني مەملەكەتتىك قىزمەتشىلەرگە قاتىستى ادەپكە ساي ەمەس مىنەز-قۇلقىنا بايلانىستى شارالار قابىلداۋعا ءماجبۇر بولعان رەسپوندەنتتەردىڭ پايىزى ايتارلىقتاي تومەندەدى. مىسالى, ەگەر 2018 جىلى 34,7% رەسپوندەنت مەملەكەتتىك قىزمەتشىنىڭ ادەپكە جات مىنەز-قۇلقىنا قاتىستى شارالار قابىلداۋعا تۋرا كەلدى دەپ جاۋاپ بەرسە, 2020 جىلى مۇنداي رەسپوندەنتتەر ۇلەسى 13,4% بولدى.
رەسپوندەنتتەردىڭ باسىم كوپشىلىگى (92,8%) كارانتين كەزىندە مەملەكەتتىك قىزمەتشىلەرمەن ارەكەتكە ءتۇسۋ بارىسىندا ادەپكە قاتىستى قانداي دا ءبىر پروبلەمانى بايقاماعان. تەك 10 رەسپوندەنت (0,4%) كارانتين كەزىندە ادەپكە بايلانىستى بۇزۋشىلىقتاردى بايقاعانىن ايتتى.
ساۋالناماعا سايكەس, سۇرالعان مەملەكەتتىك قىزمەتشىلەردىڭ 85,7%-ى ادەپ جونىندەگى كەڭەستىڭ جانە ونىڭ شەشىمدەرىمەن ىستەردى قاراۋ راسىمدەرىنىڭ ادىلدىگىنە سەنەدى. 2017, 2018 جىلداردىڭ ناتيجەلەرىمەن سالىستىرعاندا مەملەكەتتىك قىزمەتشىنىڭ ادەبىن ساقتاۋعا جاۋاپتى ورگاندار مەن ينستيتۋتتار راسىمدەرىنىڭ ادىلدىگىنە دەگەن سەنىمنىڭ وسكەنىن كورۋگە بولادى. 2020 جىلى ادەپ كودەكسىنىڭ مازمۇنىمەن تانىسقان مەملەكەتتىك قىزمەتشىلەردىڭ سانى ءوستى.
بۇدان باسقا, 2021 جىلى اگەنتتىك العاش رەت ادەپ جونىندەگى ۋاكىلگە ادەپتىلىك دەڭگەيىن ايقىنداۋ ءۇشىن ءاربىر مەملەكەتتىك ورگاننىڭ رەسمي سايتىندا ساۋالناما ورنالاستىرۋدى ۇسىندى, وعان بارلىق ازاماتتار قاتىسا الادى. وسىلايشا, ءاربىر ازامات ساۋالناماعا قاتىسۋىنا بولادى.
مەملەكەتتىك قىزمەتشىلەردىڭ ادەپ دەڭگەيىنىڭ جانە ادەپ جونىندەگى ۋاكىلدەر قىزمەتىنىڭ رەيتينگتەرى مىنا سىلتەمەدە قولجەتىمدى: https://www.gov.kz/memleket/entities/qyzmet?lang=ru
ساۋالناما بۇۇدب مەن مەملەكەتتىك قىزمەت ىستەرى اگەنتتىگىنىڭ «مەملەكەتتىك اپپاراتتى كاسىبيلەندىرۋ تەتىكتەرىن جەتىلدىرۋ, مەملەكەتتىك قىزمەتتەردىڭ ساپاسىن قامتاماسىز ەتۋ جانە سىبايلاس جەمقورلىقتىڭ الدىن الۋ» بىرلەسكەن جوباسى شەڭبەرىندە جۇرگىزىلدى.
