فورۋمدى ىشكى ىستەر ءمينيسترى ەرلان تۇرعىمباەۆ پەن ەقىۇ-نىڭ نۇر-سۇلتانداعى باعدارلامالار ءوفيسىنىڭ باسشىسى, ەلشى دەرد سابو اشتى. ءىس-شاراعا مەملەكەتتىك ورگانداردىڭ, ۇكىمەتتىك ەمەس ۇيىمداردىڭ جانە جەكە سەكتور كومپانيالارىنىڭ الپىسقا جۋىق وكىلى, سونىڭ ىشىندە ارگەنتينا, كانادا, فرانتسيا, اقش جانە ۇلىبريتانيادان سپيكەرلەر قاتىستى.
– ءبىز قوعامدى رەفورمالار قابىلداۋ ۇردىسىنە بارىنشا جۇمىلدىرۋعا تىرىسامىز. سونداي-اق پوليتسيامەن جانە باسقا دا مەملەكەتتىك ورگاندارمەن ۇنەمى ديالوگ قۇرىپ, قوعامنىڭ ءوز قاۋىپسىزدىگىنە بەيجاي قاراماي, جاۋاپكەرشىلىگىن ارتتىرۋعا كومەكتەسەمىز, – دەپ اتاپ ءوتتى دەرد سابو.
قاتىسۋشىلار ەلىمىزدە سەرۆيستىك پوليتسيا قۇرۋدىڭ ەرەكشەلىكتەرى مەن قازاقستاندا ورنىقتى جانە قاۋىپسىز قوعامداستىقتار قۇرۋ ءۇشىن مەملەكەتتىك ورگانداردىڭ, بيزنەس-قوعامداستىق پەن ازاماتتاردىڭ كۇش-جىگەرىن بىرىكتىرۋ تاقىرىبىن تالقىلادى.
فورۋمدا ەقىۇ باعدارلامالار ءوفيسىنىڭ قاراعاندى وبلىسىندا ىسكە اسىرعان قاۋىپسىزدىكتى قامتاماسىز ەتۋدەگى سەرۆيستىك تاسىلدەمەلەر بويىنشا قاناتقاقتى جوباسىنىڭ ناتيجەلەرى تانىستىرىلدى. جوبا نەگىزىندە بەلگىلى ءبىر اۋماقتىڭ پروبلەمالارىن جەرگىلىكتى اۋماقتا شەشۋ ءۇشىن ۆەدومستۆوارالىق توپ قۇرىلىپ, وعان مەملەكەتتىك ورگاندار مەن قوعام وكىلدەرى كىردى.
– مەملەكەت باسشىسى پوليتسيانى سەرۆيستىك مودەلگە كوشىرۋدى جانداندىرۋدى تاپسىردى. بۇگىنگى الاڭ پوليتسيا قىزمەتىن دامىتۋدىڭ جاڭا ترەندتەرىن تالقىلاۋعا, وزىق تاجىريبەمەن بولىسۋگە, قۇقىق بۇزۋشىلىقتىڭ الدىن الۋدىڭ ءتيىمدى ادىستەرىن تابۋعا مۇمكىندىك بەرەدى. جۇمىستاعى جاڭا ءتاسىلدىڭ ارقاسىندا ءبىز ناتيجەلەردى كورىپ وتىرمىز. پوليتسيا حالىقپەن تىعىز جۇمىس ىستەيتىن جەردە قىلمىسقا قارسى كۇرەستە ايتارلىقتاي ناتيجەلەرگە قول جەتكىزۋگە بولادى, – دەپ اتاپ ءوتتى ىشكى ىستەر ءمينيسترى ەرلان تۇرعىمباەۆ.
قازاقستاننىڭ ءىىم وكىلدەرى جۇرگىزىلىپ جاتقان پوليتسيانى جاڭعىرتۋ ناتيجەلەرى تۋرالى ايتىپ, كەلەشەككە ارنالعان پەرسپەكتيۆالاردى بەلگىلەدى. سەرۆيستىك باعدارلانعان پوليتسيا قۇرۋ رەفورمانىڭ ماڭىزدى مىندەتتەرىنىڭ ءبىرى ەكەنى اتاپ ءوتىلدى. بۇگىنگى تاڭدا قۇقىق قورعاۋ قىزمەتتەرى ساپاسىنىڭ باستى ولشەمشارتى حالىقتىڭ سەنىمى مەن ءوز قۇقىقتارىن قورعاۋعا جۇگىنگەن ازاماتتاردىڭ قاناعاتتانۋ دەڭگەيى بولىپ تابىلادى. تۇرعىندارعا ىڭعايلى بولۋ ءۇشىن ۋچاسكەلىك ينسپەكتورلار مەن ولاردىڭ كومەكشىلەرى «جۇرتقا جاقىن پوليتسيا» قاعيداتى بويىنشا جۇمىس ىستەپ, ىڭعايلى پاترۋلدەۋ ءادىسى ەنگىزىلىپ, ۋچاسكەلىك پاترۋلدەردىڭ جۇمىسىن تسيفرلاندىرۋ جۇرگىزىلەتىنى بەلگىلى بولدى.
ءوز كەزەگىندە, قازاقستاننىڭ IT-قاۋىمداستىعى فورۋمدا ەلدەگى قاۋىپسىزدىك جاعدايىن جاقسارتۋ جانە قۇقىق بۇزۋشىلىقتاردىڭ الدىن الۋدا بەينەكامەرالاردى پايدالانۋ ءۇشىن پروتسەستەردى تسيفرلاندىرۋ مۇمكىندىكتەرىن تانىستىردى. شەتەلدىك ساراپشىلار ءوز ەلدەرىنىڭ ازاماتتاردىڭ ءومىر ءسۇرۋى ءۇشىن قاۋىپسىز ءارى جايلى جاعداي جاساۋ جانە حالىقپەن ديالوگ ورناتۋ تاجىريبەسىن ورتاعا سالدى.
سونداي-اق فورۋمدا اقمولا وبلىسىنداعى «رودينا» اۋىلى ۇلگىسىندە قاۋىپسىز قوعامداستىق قۇرۋداعى جەتىستىكتەر ءسوز بولدى. فورۋم تاقىرىبىن تالقىلاۋعا قازاقستاننىڭ ازاماتتىق بەلسەندىلەرى مەن قوعام قايراتكەرلەرى بەلسەنە قاتىستى. ولار ىشكى ىستەر ورگاندارىن رەفورمالاۋ پروتسەسىنە حالىقتى كوبىرەك تارتۋعا باعىتتالعان بىرقاتار ۇسىنىس ەنگىزدى. قازاقستان ءىىم باسشىسى ەرلان تۇرعىمباەۆ ۇسىنىستاردىڭ بارلىعى مۇقيات زەردەلەنەتىنىن جەتكىزدى.
