ە.تۇرعىمباەۆتىڭ ايتۋىنشا, ءبىرىنشى كەزەڭدە, ياعني 2021 جىلدان باستاپ سەرجانتتار, كينولوگتار, ۋچاسكەلىك پوليتسيا كومەكشىلەرى, كۇزەت جانە باسقا قىزمەتتەرگە جالاقى 3 جىل ىشىندە 15 پايىزدان 58 پايىزعا دەيىن كوتەرىلەدى. قالعان قىزمەتكەرلەردىڭ جالاقىسى وسى كەزەڭدە 30 پايىزعا وسەدى.
«تۇرعىن ءۇي ءۇشىن وتەماقى الاتىن بولىنىستەر سانى 27 پايىزدان 78 پايىزعا دەيىن ءوستى. ەندى 23 مىڭ قىزمەتكەر وتەماقى الاتىن بولادى», دەدى مينيستر.
سونداي-اق ول ىشكى ىستەر سالاسىندا كادر دايىنداۋ ماسەلەسىنە ەرەكشە ءمان بەرىلىپ وتىرعانىن العا تارتتى.
«الدىمەن, ۆەدومستۆولىق ءبىلىم بەرۋ جۇيەسى وزگەردى. 12 وقۋ ورنىنىڭ التاۋى قالدى. ولار: الماتى, قاراعاندى, قوستاناي اكادەميالارى, اقتوبە زاڭ ينستيتۋتى, سونداي-اق شىمكەنت جانە پاۆلودار وقۋ ورتالىقتارى. ءىىم الماتى اكادەمياسىندا 2 فاكۋلتەت اشىلدى. باسشىلار مەن ورتا بۋىن باسشىلارىن دايارلايدى. قوسىمشا رەيتينگى جوعارى وقۋ ورىندارىمەن 33 مەموراندۋم جاسالدى», دەدى ول.
