سالتاناتتى ءىس-شاراعا قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا, قىرعىز رەسپۋبليكاسى پرەزيدەنتىنىڭ ءىس باسقارۋشىسى سۇيىنبەك قاسمامبەتوۆ, قىرعىز رەسپۋبليكاسىنىڭ مادەنيەت, اقپارات, سپورت جانە جاستار ساياساتى ءمينيسترى قايرات يماناليەۆ, تۇركسوي ۇيىمىنىڭ باس حاتشىسى دۇيسەن قاسەيىنوۆ, وزبەكستان رەسپۋبليكاسى مادەنيەت ءمينيسترىنىڭ ورىنباسارى اليمجون ميرزاەۆ, ەلشىلىك وكىلدەرى, قوعام قايراتكەرلەرى قاتىستى.
سۇيىنبەك قاسمامبەتوۆ قىرعىز رەسپۋبليكاسىنىڭ پرەزيدەنتى سادىر جاپاروۆتىڭ حاكىم ابايدىڭ 175 جىلدىعىنا ارنالعان قۇتتىقتاۋ حاتىن وقىپ بەرىپ, اقتوتى رايىمقۇلوۆاعا تابىستادى.
قايرات يماناليەۆ ۇلى اعارتۋشى, قوعام قايراتكەرىنىڭ ءومىر جولىنا توقتالىپ, اباي شىعارماشىلىعى قىرعىزستاندا دا تانىمال ەكەنىن, كۇنى بۇگىنگە دەيىن قىرعىز ساحناسىندا جىرلارى جاڭعىرىپ جاتقانىن جەتكىزدى.
ءوز كەزەگىندە اقتوتى رايىمقۇلوۆا اباي قۇنانباي ۇلىنىڭ 175 جىلدىعىنا ارنالعان ءىس-شاراعا قاتىسۋشىلارعا العىس ايتتى.
ايتا كەتەيىك, كونتسەرتكە قازاقستان, قىرعىزستان, وزبەكستان, تۇركىمەنستان مەن تۇركيا ونەرپازدارى قاتىستى.
