بۇل قويىلىم ورىس دراماتۋرگى ناتاليا موشينانىڭ «سۆەت» اتتى شىعارماسىنىڭ جەلىسىنەن الىنعان. تەاتر رەجيسسەرى, قازاقستاننىڭ ەڭبەك سىڭىرگەن قايراتكەرى اسحات ماەميروۆ اتالعان تۋىندىنى قازاق تىلىنە اۋدارىپ, ساحنالاماق. مۋزىكامەن كوركەمدەگەن جانە رەجيسسەردىڭ اسسيستەنتى – مەكان دجۋماباەۆ. ال باس حورمەيستەر – ءاليحان ىدىرىسوۆ.
قويىلىمنىڭ جانرى – مەتافيزيكالىق دراما. مەتافيزيكا – بارلىق نارسەنىڭ ارعى جاعىندا كورىنەتىن جانە كورىنبەيتىن شىندىق. اريستوتەلدىڭ پايىمداۋىنشا, ول – بارلىق عىلىمدار ءۇشىن مىندەتتى نارسەلەردىڭ وزگەرمەيتىن جانە سەزىم مۇشەلەرىمەن ەمەس, ويمەن عانا جەتكىزۋگە بولاتىن ەڭ جوعارعى باستامالارىن زەرتتەيدى.
«دۇنيە-عاپىل» سپەكتاكلى – بارشا ادامزاتقا ورتاق تاقىرىپتى ءسوز ەتەتىن, ادام ءومىرىنىڭ قۇندىلىعىن العا تارتاتىن تۋىندى. ءومىردىڭ ءتۇرلى-ءتۇستى, قىزىلدى-جاسىلدى قىزىعى دا, ابىگەرگە ءتۇسىپ سەندەلىپ, ساندالىپ وتكەن كۇيبەڭ تىرشىلىك تە بۇل تاقىرىپتىڭ قاسىندا ماڭىزدى ەمەستەي. مەتافيزيكالىق دراما ۋاقىتتىڭ قادىرى, ادامدىق پەن ادالدىقتىڭ جولى, ءار ارەكەتتىڭ جاۋابى, ءار امالدىڭ ساۋابى سىندى ادامنىڭ ىشكى دۇنيەسىندەگى ماڭىزدى مادەني, رۋحاني قۇندىلىقتارعا دەن قويۋعا, ولاردى جۇگەندەپ, يگەرۋگە يتەرمەلەيدى.
وندا عايىپتىڭ ءرولىن «دارىن» مەملەكەتتىك جاستار سىيلىعىنىڭ لاۋرەاتى ايان وتەپبەرگەن, ابزال اراپوۆ, اسقار جۇمابەكوۆ سومدايدى. مازداقتىڭ ءرولىن ورازالى يگىلىك, ەرنازار جاڭاتىلەك ساحنالاماق. ريممانىڭ ءرولىن قازاقستاننىڭ ەڭبەك سىڭىرگەن قايراتكەرى, 71-ءشى حالىقارالىق كانن كينوفەستيۆالىنىڭ جەڭىمپازى سامال ەسلياموۆا مەن ءلايلا تەمىرحان سومدايدى. جاسىننىڭ ءرولىن «دارىن» مەملەكەتتىك جاستار سىيلىعىنىڭ لاۋرەاتى اسىلحان تولەپوۆ پەن ءدىنيسلام نۇرماعانبەتوۆ وينايدى. ال سۇيرىك اتتى كەيىپكەردىڭ ءرولىن ديانا اسقار, جانسايا ومىربەكوۆا, نۇراي رىسبەكوۆا ساحنالايدى.
