«مەملەكەتتىك بيۋدجەتتىڭ شىعىستارى - 97,3, رەسپۋبليكالىق بيۋدجەتتىڭ شىعىستارى – 99, جەرگىلىكتى بيۋدجەتتەردىڭ شىعىستارى 94,5 پايىزعا اتقارىلدى. رەسپۋبليكالىق بيۋدجەت بويىنشا سوماسى 2 ترلن 510 ملرد تەڭگەگە شىعىستار جۇرگىزىلدى. اتقارىلماۋ 25 ملرد تەڭگەنى قۇرادى. ونىڭ ىشىندە 13 ملرد تەڭگە - ۇنەمدەۋ. يگەرىلمەگەنى - 12 ملرد. تەڭگە», دەدى 2021 جىلدىڭ قاڭتار-اقپانىنداعى رەسپۋبليكالىق بيۋدجەتتىڭ ورىندالۋى جايىندا بايانداعان مينيستر.
ونىڭ دەرەگىنشە, يگەرىلمەگەن نەعۇرلىم ءىرى سوما قورعانىس, ەڭبەك جانە حالىقتى الەۋمەتتiك قورعاۋ, دەنساۋلىق ساقتاۋ, ادiلەت جانە مادەنيەت جانە سپورت مينيسترلىكتەرىندە قالىپتاسىپ وتىر.
«يگەرىلمەۋدىڭ نەگىزگى سەبەپتەرى: كونكۋرستىق راسىمدەردى ۇزاق ۋاقىت وتكىزۋ جانە ۋاقتىلى وتكىزبەۋ, تولەم جونىندەگى قۇجاتتاردى ۇزاق كەلىسۋ, ورىندالعان جۇمىستار اكتىلەرىن ۋاقتىلى ۇسىنباۋ, ناقتى كورسەتىلگەن قىزمەتتەر كولەمى, ورىندالعان جۇمىستار ءۇشىن اقى تولەۋ, شارتتار مەن قوسىمشا كەلىسىمدەردى قازىناشىلىق ورگاندارىنا تىركەۋگە كەش ۇسىنۋ», دەدى ول.
سونىمەن قاتار مينيستر دەرەگىنشە, جەرگىلىكتى بيۋدجەتتەردىڭ شىعىستارى 853 ملرد تەڭگەنى قۇرادى. اتقارىلماعانى - 49 ملرد تەڭگە.
«وسى جىلى وڭىرلەرگە 1,9 ترلن تەڭگە سوماسىندا نىسانالى ترانسفەرتتەر كوزدەلگەن. ولارعا 1 ناۋرىزعا دەيىن 211 ملرد تەڭگە بولىنگەن. ونىڭ 95,1 پايىزى يگەرىلگەن. اتقارىلماعانى – 10 ملرد تەڭگە, ونىڭ ىشىندە 1 ملرد تەڭگە – ۇنەمدەۋ, 9 ملرد تەڭگە يگەرىلمەدى. ەڭ كوپ يگەرىلمەۋ ماڭعىستاۋ وبلىسى, نۇر-سۇلتان قالاسىندا, تۇركىستان, باتىس قازاقستان جانە پاۆلودار وبلىستارىندا قالىپتاستى», دەدى ەرۇلان جاماۋباەۆ.
