ءبىلىم جانە عىلىم ءمينيسترى اسحات ايماعامبەتوۆ, نۇر-سۇلتان قالاسىنىڭ اكىمى التاي كولگىنوۆ, قوستاناي وبلىسىنىڭ اكىمى ارحيمەد مۇحامبەتوۆ, جامبىل وبلىسىنىڭ اكىمى بەردىبەك ساپارباەۆ, پرەمەر-ءمينيستردىڭ ورىنباسارى ەرالى توعجانوۆ بايانداما جاسادى.
«Nur Otan» پارتياسىنىڭ سايلاۋالدى باعدارلاماسىن ىسكە اسىرۋ اياسىندا ءبىلىم بەرۋ مازمۇنىن جاڭعىرتۋ, ونىڭ جاڭا ينفراقۇرىلىمىن قۇرۋ, پەداگوگتار مەن ءبىلىم الۋشىلاردى الەۋمەتتىك قولداۋ بويىنشا شارالار ازىرلەندى.
2024 جىلعا قاراي پەداگوگتاردىڭ جالاقىسى مەن ستۋدەنتتەردىڭ شاكىرتاقىسى 2 ەسەگە ۇلعايادى. 800 جاڭا مەكتەپ سالىنىپ, 5000 اۋىل مەكتەبى جاڭعىرتىلادى. كوللەدجدەردە 9-سىنىپ نەگىزىندە وقۋ تولىعىمەن تەگىن بولادى. كوللەدجدەردى بيزنەسكە سەنىمدى باسقارۋعا بەرۋ تاجىريبەسى جالعاسادى (قازىرگى ۋاقىتتا 10 كوللەدج بەرىلدى). ۋنيۆەرسيتەتتەردىڭ ءبىلىم بەرۋ باعدارلامالارى كاسىپتىك ستاندارتتار نەگىزىندە 100% جاڭارتىلادى, بۇل تۇلەكتەردىڭ جۇمىسقا ورنالاسۋ مۇمكىندىكتەرىن ارتتىرادى. تالانتتى جاستاردىڭ ەلدەن كەتۋىن قىسقارتۋ ماقساتىندا شەتەل ۋنيۆەرسيتەتتەرىنىڭ فيليالدارىن اشۋ جوسپارلانۋدا. وتاندىق 20 جەتەكشى جوو وڭىرلەردىڭ ءوسۋ نىساناسىنا اينالادى.
نازارباەۆ ۋنيۆەرسيتەتىنىڭ تاجىريبەسى بويىنشا يننوۆاتسيالار مەن جاڭا تەحنولوگيالاردى دامىتۋمەن اينالىساتىن ەكى وزىق جوو قۇرىلاتىن بولادى. جوعارى ءبىلىمنىڭ قولجەتىمدىلىگىن ارتتىرۋ ءۇشىن 2025 جىلعا دەيىنگى گرانتتار سانى 50%-عا ارتادى. جىل سايىن جاس عالىمدارعا 1000 گرانت بولىنەدى, ال 500 قازاقستاندىق عالىم الەمنىڭ تانىمال عىلىمي ورتالىقتارىندا تاعىلىمدامادان وتە الادى.
مەملەكەت باسشىسى قاسىم-جومارت توقاەۆتىڭ تاپسىرماسى بويىنشا وسى جىلدىڭ ءساۋىر ايىندا بەلگىلەنگەن ۇلگىدەگى قۇجاتتاردى بەرە وتىرىپ, قازاقستاندىقتاردىڭ ءوز بەتىنشە وقۋ ناتيجەلەرىن تانۋدى كوزدەيتىن ۇزدىكسىز ءبىلىم بەرۋ تۇجىرىمداماسى قابىلدانادى.
ۇكىمەت باسشىسى ءبىلىم جانە عىلىم مينيسترلىگىنە 2021 جىلعى جەلتوقسانعا دەيىن مەكتەپكە دەيىنگى ءبىلىم بەرۋدى قارجىلاندىرۋدىڭ ۆاۋچەرلىك تەتىگىن اپروباتسيالاۋدى اياقتاۋدى جانە 2022 جىلدان باستاپ ونىڭ جاپپاي ەنگىزىلۋىن قامتاماسىز ەتۋدى, وسى جىلدىڭ 1 ساۋىرىنە دەيىن الەمدىك پراكتيكادا قابىلدانعان, بالاباقشالاردىڭ جۇمىس ساپاسىنىڭ كورسەتكىشتەرىن («Starting well» رەيتينگىندە) بەكىتىپ, ەنگىزۋدى تاپسىردى. «بالاباقشالاردىڭ جۇمىسى اتا-انالاردىڭ قاناعاتتانۋ دەڭگەيىن, بالالاردىڭ ەرتە دامۋ كورسەتكىشتەرىن, تاماقتانۋ ساپاسىن, جۇرتشىلىقتىڭ باعاسىن ەسكەرە وتىرىپ باعالانۋى ءتيىس», دەدى ا. مامين.
وڭىرلەر اكىمدىكتەرىنە جەكە بالاباقشالار جەلىسىن دامىتۋ ەسەبىنەن 2021 جىلى 32 مىڭ ورىنعا دەيىن مەكتەپكە دەيىنگى ءبىلىم بەرۋ ورىندارىن اشۋدى قامتاماسىز ەتۋ, 200 جاڭا مەكتەپتى پايدالانۋعا بەرۋ, سونداي-اق قالالىق جانە اۋىلدىق مەكتەپتەردەگى وقىتۋ جاعدايلارىن تەڭەستىرۋ, ونىڭ ىشىندە اۋىلدىق جەرلەردە جوعارى بىلىكتى پەداگوگتاردى بەكىتۋ بويىنشا ناقتى شارالار قابىلداۋ تاپسىرىلدى. ءبىلىم جانە عىلىم مينيسترلىگىنە, وبلىس اكىمدىكتەرىنە بيىلعى 25 ناۋرىزعا دەيىن 5 مىڭ اۋىل مەكتەبىن جاراقتاندىرۋ, جوندەۋ, ورتا قاۋىپسىزدىگى جاعدايلارى, مەكتەپ جيھازدارىن جاڭارتۋ, كىتاپحانالار مەن مەكتەپ اسحانالارىن جاڭعىرتۋ بويىنشا ناقتى ينديكاتورلارى بار جاڭعىرتۋ جونىندەگى جول كارتاسىن ەنگىزۋ تاپسىرىلدى.
ۇكىمەت باسشىسى بيىل كوللەدجدەردە كادرلار دايارلاۋعا ارنالعان مەملەكەتتىك تاپسىرىستى 20 مىڭ ورىنعا ۇلعايتۋدى, سونداي-اق 9 جانە 11-سىنىپ تۇلەكتەرىمەن الدىن الا كاسىپتىك باعدارلاۋ جۇمىسىن جۇرگىزۋدى تاپسىردى. ءبىلىم جانە عىلىم مينيسترلىگىنە 20 اسا مىقتى جوو-نى ىرىكتەپ, وسى جىلدىڭ 25 ناۋرىزىنا دەيىن جوعارى وقۋ ورىندارىنىڭ باسەكەگە قابىلەتتىلىگى جونىندەگى كەڭەستىڭ قاراۋى ءۇشىن ولاردىڭ تىزبەسىن ۇكىمەتكە ەنگىزۋ تاپسىرىلدى.
ء«بىلىم بەرۋ جۇيەسىن كەشەندى جاڭعىرتۋ باسەكەگە قابىلەتتى ەكونوميكانىڭ نەگىزگى فاكتورى بولاتىن ساپالى ادامي كاپيتال قالىپتاستىرۋ ءۇشىن قاجەتتى جاعدايلار جاساۋعا مۇمكىندىك بەرەدى», دەدى ا. مامين.
