ارينە, جوعارىداعى ءسوزدى تولىق جوققا شىعارۋعا بولمايتىن شىعار. ايتالىق, قىتايدىڭ عاجايىپ اۋەنى ەۋروپالىقتىڭ كوزىنەن جاس شىعارىپ جىبەرسە نەمەسە جاپ-جاس قۇبىلىستىڭ قارتاڭ ونەر يەسى ءومىر بويى قول سوزىپ وتكەن بيىگىن قالپاقپەن قاعىپ الا سالۋى سياقتى ونەردە شەكارانىڭ جوقتىعىن دالەلدەيتىن مىسالدار جەتەرلىك. ءبىزدىڭ ايتپاعىمىز دەمەك باسقا شەكارا, باسقا ولشەم, باسقا بىرلىك.
ديماش قۇبىلىسى دۇنيەگە كەلگەندە قايسىبىر قالامگەر جارىنا قاراپ: – ديماشتان كەيىن ءبىزدىڭ قازاق ەستراداسىنىڭ انەبىرەۋ جۇلدىزسىماقتارى ەندى ۇيالىپ, قولىنا ميكروفون ۇستاۋدى قوياتىن شىعار, – دەسە, قالامگەردىڭ ايەلى قالجىڭعا جاقىن جان بولسا كەرەك: – قويشى, سەندەر دە ابايدان كەيىن ۇيالىپ, قولدارىڭا قالام ۇستاماي كەتكەن جوقسىڭدار عوي, – دەپتى.
ادەمى دە ادەپتى ءازىل ءبىزدى شىنىمەن ويلاندىرىپ تاستادى. ونەردەگى باعانادان بەرى ءبىز ايتىپ وتىرعان ۇلى شەكارا قايدا قالدى دەپ جان-جاعىمىزعا قارايتىندايمىز. ونەردەگى وزگەشە شەكارانى وسىنداي دارا قۇبىلىستار اراعا عاسىرلار سالىپ بۇزىپ تۇرماسا, بۇگىندە كىمنىڭ جۇيرىك, كىمنىڭ ج ۇلىك ەكەنىن شىن اجىراتۋ قيىنداعان ءۇستى قيىنداپ بارادى. ولەڭنىڭ اتىن جامىلىپ ءوزىنىڭ اتاعىن تۇگەندەپ جۇرگەن جازارماندار مەن كىتاپ كەمىرگەن كەمەل جانكەشتىلەردىڭ اراسىنداعى شەكارا تىم كۇردەلەنىپ كەتكەن. ارى مەن ۇياتىن اقشاعا ساۋدالاعان اشكوز قوعام بۇگىندە بارلىق شەكارانى اشىپ تاستادى. كيەلى ساحنانى جۇيەلى ءسوز بەن ماڭگىلىك مۋزىكا ەمەس, كەلىمدى-كەتىمدى كەمتالانتتار جاۋلاعان ءۇستى جاۋلاپ العان. كىتاپ وقىماي-اق كىسىلىك تۋرالى ايتىپ, جازباي-اق جاقسى اتانىپ جۇرگەن زامانداستارىمىز كوپ.
شىعارماشىلىقتاعى شىندىق شەكاراسىن بۇگىندە الەۋمەتتىك جەلىنىڭ اۋلەكى توپتارى دا بۇزىپ جاتقانىن جاسىرماۋىمىز كەرەك. بۇرىن دارا دارىنداردى, ەل مويىنداعان ەرەكشە ونەر يەلەرىن كوپشىلىك «جۇلدىز», «قازاق ادەبيەتى» سياقتى ۇلكەن گازەت-جۋرنالداردان, «رەسپۋبليكا» سارايى, «قازاقكونتسەرت» سياقتى كيەلى ساحنالاردان كورىپ, تانىساتىن. كىمنىڭ تۇعىر, كىمنىڭ تۇلپار ەكەنىن وسىنداي سۇزگىلەر ساراپتاپ, ءبىر ۋاقىت توسقاۋىل بولىپ وتىراتىن. قازىر وسى ءۇردىستىڭ بارلىعى ىسىرىلىپ تاستالدى. ارينە, ايتا بەرسەك بۇل قياناتشىل ارەكەتتەردى اشكەرەلەپ تاۋىسۋ مۇمكىن ەمەس.
جالپى, ءبىزدىڭ ايتپاعىمىز نە, البەتتە ونەردە شەكارا بولۋ كەرەك. بۇلبۇل تالانت ءان سالعان بۇتاقتا توعىشار قارعالار قارقىلداماۋى ءتيىس. تۇلپارلار باق سىنايتىن بايگەگە باسپاقتى ەشقاشان قوسپاعان دۇرىس. ءبىز شىن ونەردەگى شىرقاۋ بيىك شەكارالاردى وسى تۇرعىدا بولگىمىز كەلەدى.
بىراق ءبارىبىر ونەردە شەكارا جوق. ءبىز وسى رەتتە تاعى ءبىر شەكارا تۋرالى ايتۋدى ۇمىتىپ بارا جاتقاندايمىز. بۇل شەكارانىڭ ءجونى تىپتەن بولەك. كەز كەلگەن ادامنىڭ كوزىنە كورىنە بەرمەيتىن نازىك شەكارا جالپى كوپ ناسيحاتتالا بەرمەيدى. بۇل شەكارا تاساداعى تالانتتاردى ۇلكەن ساحناعا جىبەرمەي جاتقان ماتەريالدىق شەكارا, تانىسى جوق تۋىندىگەرلەردى ۇلكەن ساحنالارعا جىبەرمەي ۇستاپ جاتقان تۇرلاۋسىز تىرلىك قۇرعان شەكارا دەۋگە بولادى.
ءبىز كەيدە كوزىمىز كورگەن, قۇلاعىمىز ەستىگەن شىندىقتى عانا تانىپ, سونى عانا ناسيحاتتايتىن سياقتىمىز. الايدا ءبىز ەستىمەگەن, ءبىز ەشقاشان كورمەگەن قۇبىلىستاردىڭ بارى راس قوي. مىسالى, الەمدەگى ەڭ ۇلكەن پيراميدا ەگيپەتتە ەمەس, مەكسيكانىڭ پۋەبلا شتاتىندا ورنالاسقانى سياقتى نەمەسە الەمدەگى ەڭ بيىك شىڭ ەۆەرەست ەمەس, ودان الدەقايدا بيىك ماۋنا-كەا جانارتاۋى مۇحيتتىڭ استىندا جاتقاندىعىن كوبىمىز بىلە بەرمەيمىز.
ءبىز ايتىپ وتىرعان تاساداعى تالانتتار دا كەيدە وسى سالىستىرۋلاردى ەسىمىزگە سالادى. ساحنادا سارناپ جۇرگەن جاساندى جۇلدىزداردى الدەبىر اۋىلدا جاعدايى جەتپەي قويدىڭ سوڭىندا جۇرگەن تابيعي تالانت شاڭ قاپتىرۋى ابدەن مۇمكىن. بىراق شىنايى ومىردەگى شىندىق شەكاراسى, جوقشىلىق بوگەتتەرى مۇنداي دارىن يەلەرىنىڭ داۋىسىن الىستارعا كوپ ەستىرتە بەرمەيدى. ارينە, ارا-اراسىندا جاقسى جانداردىڭ كوزىنە ءتۇسىپ قالىپ, كوپشىلىكتىڭ كوزايىمىنا اينالىپ جۇرگەن تالانتتار جوق ەمەس. دەگەنمەن ءبىز جوعارىدا ايتقان شەكارالىق شەكتەۋلەر شىن ونەردى شىدەرلەپ جاتاتىنىن ءبارىمىز مويىنداۋىمىز كەرەك.
