ايتەۋىر ادام امان. وقىس وقيعاعا جەدەل نازار اۋدارعان قالا اكىمى نۇرلىبەك نالىباەۆتىڭ تاپسىرماسىمەن شاھار باسشىسىنىڭ ورىنباسارى بەكتاس نۇريدينوۆ ورتتەن زارداپ شەككەندەرگە باردى.
قۇتقارۋ قىزمەتىنە سابالاق ساياجايى پوبەدا كوشەسى ءنومىرسىز مەكەن-جايدا ءورت ورىن العانى تۋرالى حابارلاما 9 ناۋرىز كۇنى ساعات 22:20 شاماسىندا كەلىپ تۇسكەن ەكەن. اتالعان وقيعا ورنىنا شۇعىل جەتكەن ءورت ءسوندىرۋ بولىمىنەن 3 تەحنيكا, 8 قىزمەتكەر جۇمىلدىرىلىپ, 23:35 شاماسىندا جالىن تولىق سوندىرىلگەن. بولجام بويىنشا ءورت پەشتەگى اقاۋدان پايدا بولۋى مۇمكىن. قازىر ساراپتاما تاعايىندالىپ, ءورتتىڭ شىعۋ سەبەبى انىقتالۋدا.
ءۇيدى ساعىنىش داۋلەتوۆا ەكى قىزىمەن جانە مۇمكىندىگى شەكتەۋلى وگەي اكەسىمەن بىرگە پانالاپ كەلىپتى. جەرگىلىكتى بيلىك وكىلدەرى ءمان-جايدى كوزبەن كورىپ, قاجەتتى شارالار تىزبەگىن جاساقتادى.
وتباسى جالدامالى پاتەرگە ورنالاستىرىلادى. پاتەردىڭ جالداۋ قۇنى تاسبوگەت كەنتى اكىمدىگى ارقىلى وتەلەتىن بولادى. الداعى ۋاقىتتا ولاردى ۋاقىتشا باسپاناعا ورنالاستىرىپ, ءۇي كەزەگىنە تىركەۋ جۇمىستارى جاسالادى. وقىستا قيىن جاعدايعا تاپ بولعانداردى ازىق-ت ۇلىك, قاجەتتى كيىم-كەشەكپەن قامتاماسىز ەتۋ دە دەمەۋشىلىك ەسەبىنەن شەشىمىن تاپقان.
«ساعىنىش داۋلەتوۆانىڭ اناسىنىڭ اتىنا تىركەلگەن ۇيگە قاتىستى قۇقىق مەنشىگىن انىقتاپ, قۇجاتتارىن قايتا راسىمدەۋگە جىبەرەمىز» دەگەن قالالىق جۇمىسپەن قامتۋ, الەۋمەتتىك باعدارلامالار جانە ازاماتتىق حال اكتىلەرىن تىركەۋ ءبولىمىنىڭ باسشىسى ينديرا اقجىگىتوۆا وتباسىعا ءبىر رەتتىك مەملەكەتتىك جاردەماقى تاعايىندالاتىندىعىن دا اتاپ ءوتتى.
