تسەمەنت باعاسى ءبىر ايدا 13 پروتسەنتكە كوتەرىلىپتى. بۇل ءۇي باعاسىنىڭ قىمباتتاۋىنا اكەلدى. دەپۋتات جامبىل احمەتبەكوۆ ۇكىمەتكە ساۋال جولداپ, قۇرىلىس ماتەريالدارى نارىعىندا باعانى رەتتەۋ قاجەتتىگىن ايتتى. سونداي-اق سالادا قازىر مامان تاپشى. جالاقى دا ماردىمسىز. قۇرىلىسشىلاردىڭ الەۋمەتتىك كەپىلدىكتەرى مەن ەڭبەك قۇقىعى دا ساقتالمايدى.
دەپۋتاتتىڭ ايتۋىنشا, قۇرىلىس سالاسىندا 200 مىڭنان استام مامان جەتىسپەيدى. ۇكىمەت كادر پروبلەماسىن شەشۋ ءۇشىن شەتەلدىك جۇمىسشىلاردىڭ ەلدە بولۋ مەرزىمىن جوبا اياقتالعانشا سوزۋى كەرەك. سونداي-اق كوللەدج ستۋدەنتتەرىنىڭ وندىرىستىك پراكتيكادان ءوتۋى مەن دۋالدى ءبىلىم بەرۋ جۇيەسىن جەتىلدىرۋ قاجەت.
–قۇرىلىس نارىعىندا قۇرىلىس ماتەريالدارىنىڭ جاپپاي قىمباتتاۋى بايقالىپ وتىر. قۇرىلىس ماتەريالدارى باعاسىنىڭ ءوسۋى تۇرعىن ءۇيدىڭ قىمباتتاۋىنا اكەپ سوقتى. سايكەسىنشە, بۇل مەملەكەتتىك بيۋدجەت ەسەبىنەن سالىناتىن مەكتەپتەر, اۋرۋحانالار جانە باسقا دا الەۋمەتتىك وبەكتىلەر قۇرىلىستارىنىڭ دا قىمباتتاۋىنا اكەلدى. مىسالى, ارماتۋرانىڭ باعاسى قىسقا ۋاقىت ىشىندە 40%-55% ءوستى, 2020 جىلدىڭ قىركۇيەگىندە ءبىر توننا ارماتۋرانىڭ باعاسى 190 000 مىڭ تەڭگە بولسا, بۇگىنگى تاڭدا ونىڭ باعاسى 290000-325000 مىڭ تەڭگە ارالىعىندا, – دەيدى ءماجىلىس دەپۋتاتى.
