جاڭا رەكتوردى ۋنيۆەرسيتەت ۇجىمىنا ءبىلىم جانە عىلىم ۆيتسە-ءمينيسترى شولپان كارينوۆا تانىستىردى.
ءوز ءسوزىن ۇلى احمەت ءياساۋيدىڭ حيكمەتىنەن باستاعان جانار امانگەلدىقىزى جۇكتەلگەن جاڭا قىزمەتتىڭ جاۋاپكەرشىلىگىن تەرەڭ سەزىنەتىنىن جەتكىزدى. ەلباسى باستاماسىمەن اشىلعان حالىقارالىق ۋنيۆەرسيتەتتىڭ ەڭ نەگىزگى مىندەتى – قازاق ەلى مەن بۇكىل تۇركى الەمىنە قىزمەت ەتەتىن ءبىلىمدى, سالاۋاتتى, وتانسۇيگىش, ءارى جاڭا عاسىر تالاپتارىنا ساي مامانداردى دايارلاۋ ەكەندىگىنە توقتالدى. «مادەنيەت پەن وركەنيەتتىڭ نەگىزى بولىپ تابىلاتىن بۇل ۋنيۆەرسيتەت تاۋەلسىز ەلدىڭ ماڭگى بولاشاعىن قازىردەن باستاپ قالىپتاستىرۋشى ءبىلىم وشاعى. قوعامعا ۇلگى بولاتىن قاسيەتتى مەكەن. مەملەكەت باسشىسى قاسىم-جومارت كەمەل ۇلىنىڭ باستاماسىمەن «حالىق ۇنىنە قۇلاق اساتىن ۇكىمەت» تۇجىرىمداماسى قابىلدانعانى ءمالىمى. مەن دە ءوز كەزەگىمدە وسى تۇجىرىمدامادان شابىت الىپ, «حالىق ۇنىنە قۇلاق اساتىن ۋنيۆەرسيتەت» كونتسەپتسياسىن بىرگە قالىپتاستىرۋدى ۇسىناتىن بولامىن», دەدى جانار تەمىربەكوۆا.
ايتا كەتەلىك, جانار امانگەلدىقىزى تۇركيانىڭ الدىڭعى قاتارلى حادجەتتەپە ۋنيۆەرسيتەتىنىڭ ينجەنەرلىك فاكۋلتەتىن ءبىتىرىپ, اتالمىش وقۋ ورنىنىڭ “مەنەدجمەنت” ماماندىعى بويىنشا ماگيستراتۋرا باعدارلاماسىندا ءبىلىم العان. ءال-فارابي اتىنداعى قازاق ۇلتتىق ۋنيۆەرسيتەتىنىڭ اسپيرانتۋراسىندا وقىپ, سول جەردە كانديداتتىق ديسسەرتاتسياسىن قورعاعان. ەكونوميكا عىلىمدارىنىڭ كانديداتى.
قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ انكارا قالاسىنداعى وكىلەتتى كەڭەس باسقارماسىندا, تۇركسوي سىندى حالىقارالىق ۇيىمداردا ەڭبەك ەتكەن. الماتى قالاسىنداعى كيمەپ, قبتۋ جانە سدۋ سىندى بىرنەشە ماڭىزدى وقۋ ورىندارىندا ستۋدەنتتەرگە ساباق بەرۋمەن قاتار, ەۋرازيا تەحنولوگيالىق ۋنيۆەرسيتەتىنىڭ رەكتورى, الماتى مەنەدجمەنت ۋنيۆەرسيتەتى پرەزيدەنتىنىڭ كەڭەسشىسى قىزمەتتەرىن اتقارعان.
