بۇگىندە ءومىرىن وسىمدىكتەر الەمىمەن بايلانىستىرعان ريمما قىزمەتىندە ۇلگىلى, ونەگەلى وتباسىنىڭ وتاناسى اتانىپ وتىر. وڭتۇستىك قازاقستان وبلىسى, سوزاق اۋدانى, شولاققورعان اۋىلىندا تۋىپ-وسكەن ريمما اۋدان ورتالىعىنداعى احمەت بايتۇرسىنوۆ جالپى ورتا مەكتەبىن ۇزدىك ءبىتىردى. ارمان قۋىپ, الماتى قالاسىنداعى قازاق مەملەكەتتىك اگرارلىق ۋنيۆەرسيتەتىندە «اگرونوم» ماماندىعىن وقىدى. جاستايىنان تابيعاتقا, جەر بەتىندەگى تىرشىلىككە, اسىرەسە, جىلدىڭ ءتورت مەزگىلىندە ۇلكەن وزگەرىسكە ۇشىرايتىن وسىمدىك اتاۋلىعا قۇمار قىز ماماندىق تاڭداۋدا قاتەلەسپەگەن-ءدى. جوعارى وقۋ ورنىن بىتىرگەن سوڭ تۋعان جەرگە كەلىپ ەڭبەك ەتتى. وتكەن عاسىردىڭ 90-جىلدارىنداعى توقىراۋدا كەڭشار-ۇجىمشارلار تاراپ, شاعىن قوجالىقتارعا اينالدى. وسى كەزدە العاشقى ەڭبەك جولىن اگروونەركاسىپ, شارۋا قوجالىعىندا اگرونوم بولىپ باستادى. شارۋا قوجالىعىندا جۇمىس ىستەپ ءجۇرىپ, ءوز سالاسىنىڭ قىر-سىرىنا قانىعا ءتۇستى. ەلىمىزدىڭ وزگە وڭىرلەرىنەن تابيعاتى ەرەكشە سوزاقتىڭ توسىن مىنەزىن, وندا وسەتىن وسىمدىكتەر الەمىن تەرەڭ تانىدى. ىزدەنىمپازدىعى مەن ىسكەرلىگىنىڭ ارقاسىندا 2007 جىلى سوزاق اۋداندىق اۋماقتىق ينسپەكتسياسىنىڭ باس مامانى-وسىمدىكتەر كارانتينى جونىندەگى مەملەكەتتىك ينسپەكتورى قىزمەتىنە تاعايىندالدى. سودان بەرى وسى قىزمەتتى ابىرويمەن اتقارىپ كەلەدى.
جاڭالىققا جانى قۇمار ريمما جوگىبايقىزى وسى جىلدار ارالىعىندا ەلىمىزدىڭ ازىق-ت ۇلىك قاۋىپسىزدىگىن ساقتاپ, فيتوسانيتارلىق احۋالدىڭ تۇراقتىلىعىن قامتاماسىز ەتۋدە وڭىرىمىزگە وزىندىك جەتىستىكتەرىمەن تانىلعان بىرەگەي جان. سونىڭ ىشىندە رەتتەلەتىن اۋماقتا شەتەلدەردەن نەمەسە باسقا دا كارانتيندi ايماقتان زاتتاردىڭ زاڭسىز كەلۋىنەن قورعاۋدى قامتاماسىز ەتۋدە اسا بەلسەندىلىگىمەن, ءمىنسىز قىزمەتىمەن, جاۋاپكەرشىلىگىمەن تانىلدى. ەلىمىزدىڭ وزبەكستان رەسپۋبليكاسىمەن مەملەكەتتىك شەكاراسى ارقىلى وتكىزىلەتىن ونىمدەرىنە مەملەكەتتىك باقىلاۋ جۇرگىزۋ كەزىندە حالىقارالىق «ەۋرازيالىق ەكونوميكالىق وداقتا وسىمدىكتەر كارانتينىن قامتاماسىز ەتۋ» شەشىمىنىڭ تالاپتارىنا سايكەس كەلمەگەن ونىمدەردى انىقتاپ, كەرى قايتاردى جانە 650 كيلو ءونىمدى جويۋعا قاتىستى. ءوزى تۋرالى اڭگىمەگە ساراڭ ريممانىڭ بۇل − ەلگە ءمالىم جەتىستىكتەرى عانا.
«جۇمىسىم وزىمە ۇنايدى. وسىمدىكتەر الەمى – جانىم قالاعان ماماندىعىم. وزىمە جۇكتەلگەن مىندەتتى جاۋاپكەرشىلىكپەن اتقارۋعا تىرىسامىن. ماسەلەن, شەتەلگە ەكسپورتقا شىعارىلاتىن وسىمدىك تەكتەس ونىمدەردى تەكسەرىپ, قاداعالايمىز. قاجەت بولعان جاعدايدا شىمكەنت قالالىق كارانتيندىك زەرتحاناسىنا جىبەرەمىز. كۇندەلىكتى ىشكى ساۋدا نىساندارىنداعى وسىمدىك ونىمدەرىن تەكسەرىپ, تالاپ ساقتالماعان جاعدايدا اكىمشىلىك شارا قولدانىپ, ايىپپۇل سالامىز. بۇل ءوز كەزەگىندە اۋدان تۇرعىندارىنىڭ قاۋىپسىزدىگى ءۇشىن قاجەت», دەيدى ريمما جوگىبايقىزى.
ريممانىڭ ىسكەرلىك قابىلەتى اۋداندىق اۋماقتىق ينسپەكتسياسىنىڭ باس مامان-وسىمدىكتەر كارانتينى جونىندەگى مەملەكەتتىك ينسپەكتورى بولعان كەزدە كەڭىنەن تانىلا باستادى دەسەك قاتەلەسپەيمىز. سەبەبى ءوز سالاسىن جەتىك مەڭگەرگەن مامان شارۋا قوجالىعى يەلەرىنىڭ ارقاسۇيەر اقىلشىسىنا اينالدى. قوعامدىق جۇمىسقا دا بەلسەنە ارالاسادى. زامانداستارىن تۇرمىسى تومەن وتباسىلاردىڭ بالالارىن مەكتەپ فورماسىمەن قامتاماسىز ەتۋ سىندى يگى ىسكە ۇيىمداستىردى. ەڭبەگى ەلەنىپ, Nur Otan پارتياسىنىڭ اۋداندىق فيليالى توراعاسىنىڭ, وبلىستىق, اۋماقتىق ينسپەكتسيا باسشىسىنىڭ العىس حاتتارىن يەلەندى. ابىرويلى جان وتباسى تىرشىلىگىنىڭ دە ۇيىتقىسى. وتاعاسى قانات مولداليەۆ ەكەۋى ەكى ۇل, ەكى قىز تاربيەلەپ وتىر. ۇلكەن قىزدارى سىمبات تۇرار رىسقۇلوۆ اتىنداعى قازاق ەكونوميكالىق ۋنيۆەرسيتەتىندە وقيدى, ال جانەل − ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى. ۇلدارى نۇرباقىت پەن ءاليجان − اۋدان ورتالىعىنداعى ءنازىر تورەقۇلوۆ IT ليتسەيىنىڭ وقۋشىسى. «ەنەم باقىت وماروۆا ۇزاق جىلدار اۋداندىق تۇتىنۋشىلار قوعامىندا جۇمىس ىستەدى. بۇگىندە زەينەتتە. اياۋلى انا, وسى كىسىنىڭ ءتالىم-تاربيەسىن كوردىم. العىسىم شەكسىز. قىرىق جىلدان استى, نامازىن قازا ەتپەگەن كىسى. بىزگە جول سىلتەپ, نەمەرەلەرىن تاربيەلەپ وتىرعان باقىتتى اجە», دەيدى ريمما جوگىبايقىزى.
تۇركىستان وبلىسى
