قوعام • 04 ناۋرىز، 2021

قازاقستان ەلشىسى ماسكەۋدەگى باۋىرجان مومىش ۇلى اتىنداعى مەكتەپتە بولدى

44 رەت كورسەتىلدى

ەلشى ەرمەك كوشەرباەۆ باستاعان قازاقستاننىڭ رەسەيدەگى ەلشىلىگىنىڭ دەلەگاتسياسى ماسكەۋدىڭ زەلەنوگراد اكىمشىلىك اۋدانىنداعى باۋىرجان مومىش ۇلى اتىنداعى №1912 ورتا مەكتەپتە بولدى، دەپ حابارلايدى Egemen.kz.

ەسكە الۋ ءراسىمى كەزىندە ديپلوماتتار مەكتەپ اۋلاسىندا ورناتىلعان باتىردىڭ بيۋستىنە گۇل شوقتارىن قويىپ، ب.مومىش ۇلى مەن اتى اڭىزعا اينالعان پانفيلوۆ ديۆيزياسىنا ارنالعان مەكتەپ مۇراجايىنىڭ كورمەسىمەن تانىستى.

وقىتۋشىلارمەن جانە وقۋشىلارمەن كەزدەسۋدە ە.كوشەرباەۆ قازاق باتىرىنىڭ ەسىمىن ەستە ساقتاعانى ءۇشىن ريزاشىلىعىن ءبىلدىرىپ، بۇگىنگى بەيبىت ومىرگە قانداي قيىندىقپەن كەلگەنىمىزدى ۇمىتپاۋعا شاقىردى. سونىمەن قاتار، جاس ۇرپاقتى ەلدىڭ بوستاندىعى مەن تاۋەلسىزدىگى ءۇشىن جانىن قيعان ەرلەردىڭ ەرلىگى مەن ادالدىعى ۇلگىلەرى بويىنشا تاربيەلەۋدىڭ ماڭىزدىلىعىن اتاپ ءوتتى.

ءوز كەزەگىندە مەكتەپ ديرەكتورى اندرەي كۋرساكوۆ قازاقستاندىق ارىپتەستەرىمەن سوعىس باتىرلارىنىڭ ەسىمىن ماڭگى ەستە قالدىرۋداعى بىرلەسكەن جۇمىستارى تۋرالى ايتىپ بەردى. اتاپ ايتقاندا، جاقىندا باۋىرجان مومىش ۇلىنىڭ 110 جىلدىعىنا وراي تاجىريبە جانە ماتەريالدار الماسۋ بويىنشا ونلاين-كونفەرەنتسيا ءوتتى. سونىمەن قاتار، مەكتەپ مۋزەيىنىڭ كورمەسىن تسيفرلاندىرۋ جانە جىل سوڭىندا قازاقستاندىق مەكتەپتەرمەن تەلەكوپىر ۇيىمداستىرىپ، ماسكەۋ ءۇشىن بولعان شايقاستىڭ 80 جىلدىعىن اتاپ ءوتۋ جوسپارلانىپ وتىر.

8-سىنىپ وقۋشىسى ەۆگەني ۆوروبەۆتىڭ ايتۋىنشا، مەكتەپ مۋزەيىنە، مومىش ۇلىنىڭ ءومىرى مەن قىزمەتى تۋرالى سەمينارلارعا تەك ءوز وقۋشىلارى عانا ەمەس، سونىمەن قاتار جاقىن ماڭداعى مەكتەپتەردىڭ وقۋشىلارى دا قاتىسادى، ال وتكەن جىلدىڭ قاراشا ايىندا باتىردىڭ شايقاستارىنىڭ باعىتتارى بويىنشا ەكسكۋرسيا جاسالدى. «مەن مومىش ۇلىنىڭ جەكە باسىنا ءتانتىمىن، ول كورنەكتى اسكەري جانە قوعام قايراتكەرى بولدى. ونىڭ ايگىلى «مومىش ۇلى سپيرالى» اسكەري تاكتيكاسىنا تەك كەڭەس قولباسشىسى كونستانتين روكوسسوۆسكي عانا ەمەس، سونىمەن بىرگە مايدانداعى قارسىلاس-نەمىس گەنەرالى ەريح گەپنەر دە جوعارى باعا بەردى»، – دەدى ە.ۆوروبەۆ.

ماسكەۋ قالاسىنداعى زەلەنوگراد وكرۋگىندەگى №1912 مەكتەپكە باۋىرجان مومىش ۇلىنىڭ ەسىمى 2010 جىلى جەڭىستىڭ 65 جىلدىعى مەن باتىردىڭ 100 جىلدىعىن مەرەكەلەۋ اياسىندا قازاقستاننىڭ رەسەيدەگى ەلشىلىگىنىڭ قولداۋحاتى بويىنشا بەرىلدى. ءدال وسى مەكتەپتى تاڭداۋ كريۋكوۆو كەنتىنىڭ ماڭىندا 1941 جىلى ماسكەۋدى قورعاۋ كەزىندە قاندى شايقاستار بولعاندىعىمەن بايلانىستى، وندا قۇرامىندا باۋىرجان مومىش ۇلى سوعىسقان پانفيلوۆ ديۆيزياسىنىڭ جاۋىنگەرلەرى وشپەس ەرلىك جاسادى. 2010 جىلى قازاقستان ەلشىلىگىنىڭ كومەگىمەن ب.مومىش ۇلى اتىنداعى مەكتەپ مۋزەيى قۇرىلدى، ونىڭ قولا ءبيۋستى دە وسىندا ورناتىلدى.

سوڭعى جاڭالىقتار

«قىزىل» ايماقتا ءبىر عانا ءوڭىر قالدى

كوروناۆيرۋس • بۇگىن، 11:47

قانشا ادام ۆاكتسينا سالدىردى؟

كوروناۆيرۋس • بۇگىن، 09:40

847 ادام كوروناۆيرۋس جۇقتىردى

كوروناۆيرۋس • بۇگىن، 09:00

ۇقساس جاڭالىقتار