ءبىرىنشى بولىمدە «شاققىش», «ەسمەرالدا», «اققۋ كولى» جانە «كورسار» سىندى ايگىلى بالەتتەردىڭ ۇزىندىلەرى مەن قازىرگى زامان حورەوگرافتارىنىڭ تۋىندىلارى – «Diversity», «Let it go» جانە ت.ب. كورسەتىلەدى. ەكىنشى ءبولىمنىڭ باعدارلاماسى «جيزەل» بالەتىنەن گراند-پا, «كارمەن-سيۋيتا» بالەتىنەن دۋەت, «اققۋ كولى» بالەتىنەن اداجيو, «سپارتاك» بالەتىنەن دۋەت, «دون كيحوت» بالەتىنەن پا-دە-دە, «Love Fear Loss» بالەتىنەن ءۇزىندى جانە وزگە دە تۋىندىلاردان قۇرالعان.
ەكى كەشتە دە ونەر كورسەتەتىن «استانا بالەت» تەاترىنىڭ ارتىستەرى: تاتيانا تەن, فارحاد بوريەۆ, سۇندەت سۇلتانوۆ, قازبەك احمەدياروۆ, بالجان ءابدىراحمانوۆا, ۋەسلي كارۆالو, اينۇر ابىلعازينا جانە وزگە دە بيشىلەر.
گالا-كونتسەرتتىڭ قوناقتارى: «استانا وپەرا» تەاترىنىڭ پرەمەرى باحتيار ادامجان, قازاق ۇاوبت جەتەكشى سوليستتەرى جانەل توكەەۆا, راحىم دايىروۆ پەن ماليكا ەلشىباەۆا.
«وسى گالا-كونتسەرت – قازاقستاندىق بالەتتىڭ قازىرگى كەلبەتىن اشادى. ءۇش بالەت ترۋپپاسىنىڭ جارقىن وكىلدەرى ءبىر ساحنادا ونەر كورسەتەدى. ايتا كەتەيىك, ءبىرىنشى ءبولىمنىڭ سوڭىندا ەرەكشە تريونى تاماشالاي الاسىزدار. ياعني, ءۇش تەاتردىڭ جەتەكشى سوليستتەرى, اتاپ ايتقاندا, فارحاد بوريەۆ, باحتيار ادامجان جانە جانەل توكەەۆا ادولف ادان مۋزىكاسىنا قويىلعان «كورسار» بالەتىنەن تريو ورىندايدى. جالپى, كەش باعدارلاماسى وتە مازمۇندى ءارى الۋان-ءتۇرلى. مۇندا ءبىز, بىرىنشىدەن, كوكتەمنىڭ جىلى شۋاعىن, جاڭا ءومىردىڭ باستالعانىن, ماحاببات پەن ىڭكار سەزىمدى جەتكىزبەكشى ەدىك. سوندىقتان, بۇل باعدارلاما ماحابباتتىڭ سان ءتۇرىن سيپاتتايدى: ىنتىق سەزىم, رومانتيكالىق, مەلانحوليالىق. بۇل كونتسەرت استانالىق كورەرمەننىڭ كوڭىلىنەن شىعادى دەگەن ۇمىتتەمىن. سەبەبى, بۇل باعدارلامانى سول ءۇشىن دايىنداپ وتىرمىز عوي. كوكتەم كەلدى, ەندى, وسى رومانتيكالىق كوڭىل-كۇي ارقايسىمىزدى تەربەتسە ەكەن, دەپ اڭسايسىڭ عوي», - دەگەن ويىمەن ءبولىستى رف ەڭبەك سىڭىرگەن ءارتىسى, «استانا بالەت» تەاترىنىڭ كوركەمدىك جەتەكشىسى نۇرلان كانەتوۆ.
بۇل ءىس-شارا مادەنيەت جانە سپورت مينيسترلىگىنىڭ قولداۋىمەن, ەلىمىزدىڭ تاۋەلسىزدىگىنىڭ 30 جىلدىعى اياسىندا وتكىزىلەدى. ەستەرىڭىزگە سالا كەتەيىك, ناۋرىز ايىندا ەلوردالىق ۇجىم تاعى ەكى اۋقىمدى باعدارلاما دايىنداپ وتىر: 12-13 ناۋرىزدا «ۆالپۋرگيەۆ ءتۇنى» جانە «GAIA» ءبىر اكتىلى بالەتتەرى كورسەتىلسە, ال, ناۋرىز مەيرامىنىڭ قارساڭىندا, 20-ناۋرىزدا «ۇلتتىق بالەت كەشى» وتەدى.
