ايماقتار • 03 ناۋرىز، 2021

قىزىلوردادا ەكولوگيالىق ماسەلەلەردى شەشۋگە ارنالعان جوبالار تالقىلاندى

33 رەت كورسەتىلدى

بۇگىن وبلىس اكىمى گۇلشارا ابدىقالىقوۆا حالىقارالىق ارالدى قۇتقارۋ قورىنىڭ ەلىمىزدەگى اتقارۋشى ديرەكتسياسى ديرەكتورى بولات بەكنيازبەن كەزدەستى. كەزدەسۋدە ارالدى قۇتقارۋ قورىنىڭ ارال ءوڭىرىنىڭ الەۋمەتتىك جانە ەكولوگيالىق پروبلەمالارىن شەشۋگە باعىتتالعان جوبالارى مەن باعدارلامالارى ءسوز بولدى، دەپ حابارلايدى Egemen.kz

– «سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ» (ساراتس-1) جوباسىنىڭ ءبىرىنشى فازاسىن باستاۋعا حالىقارالىق ارالدى قۇتقارۋ قورىنىڭ ءرولى ەرەكشە بولدى. قازىر «وڭىرلىك دامىتۋ جانە ارال تەڭىزىنىڭ سولتۇستىك بولىگىن قالپىنا كەلتىرۋ» جوباسىنىڭ تەحنيكا ەكونوميكالىق نەگىزدەمەسىن ازىرلەۋ ءۇشىن دايىندىق جۇمىستارى جۇرگىزىلۋدە. سونىڭ ىشىندە، سولتۇستىك ارال تەڭىزىنىڭ اۋماعىن ۇلعايتۋ كومپونەنتى  ءوڭىر تۇرعىندارى ءۇشىن وتە ماڭىزدى. سولتۇستىك ارال تەڭىزىنىڭ اۋماعىن ۇلعايتۋدىڭ ءبىر نەمەسە ەكى دەڭگەيلى نۇسقالارى بويىنشا تۇپكىلىكتى شەشىم قابىلدانعان جوق. سوندىقتان، جوبانىڭ تەحنيكا ەكونوميكالىق نەگىزدەمەسىن ازىرلەۋ بارىسىندا جان-جاقتى قاراۋعا، ەكولوگيالىق جانە ەكونوميكالىق جاعىنىن ءتيىمدى جوبانىڭ ىسكە اسىرىلۋىنا اتسالىسۋدى سۇرايمىز، – دەدى وبلىس اكىمى.

سونىمەن قاتار كەزدەسۋدە بولات بەكنياز قور تاراپىنان اتقارىلعان جۇمىستار تۋرالى ايتىپ ءوتتى.

بۇگىنگى كۇنگە دەيىن قور تاراپىنان ارال تەڭىزىن قۇتقارۋ جانە ساقتاۋ بويىنشا حالىقارالىق جانە جەرگىلىكتى دەڭگەيدە كوپ دەگەن كەزدەسۋلەر ۇيىمداستىرىلىپ، جوبالار جۇزەگە اسىرىلۋدا.  «بارساكەلمەس» مەملەكەتتىك تابيعي قورىعىمەن، ءتۇرلى عىلىمي زەرتتەۋ ينستيتۋتتارىمەن بىرلەسكەن جۇمىستار جۇرگىزىلۋدە.  

قازىرگى ۋاقىتتا قوردىڭ وبلىستاعى فيليالى قامباش كولىنىڭ جاعالاۋىندا ورنالاسقان «ارال» عىلىمي-تۋريستىك، كوكارال تۇبەگىنىڭ وڭتۇستىك بولىگىندەگى، بيوسفەرانى قورعاۋ ورتالىقتارىندا  اڭشىلىق شارۋاشىلىعى بويىنشا جۇمىس اتقارۋدا.

– ارال تەڭىزى باسسەينىنىڭ نەگىزگى وزەندەرى – ءامۋداريا جانە سىرداريا بويىنشا ەكولوگيالىق سۋ جىبەرۋلەرگە قالدىق قاعيداتتى پايدالانا وتىرىپ، ارال تەڭىزىن بۇرىنعى شەكارالارعا قايتارۋ مۇمكىن ەمەس.  تەڭىزدى تولتىرۋ ءۇشىن وعان جىلىنا كەمىندە 60 ملرد تەكشە مەتر سۋ كەلۋىن قامتاماسىز ەتۋ قاجەت، سوندىقتان سۋارمالى جەرلەردە سۋ تۇتىنۋدى ازايتۋ، كەيبىر سۋ قويمالارىن بوساتۋ قاجەت بولۋى مۇمكىن. قازاقستاندا كولەمى 27 ملرد تەكشە مەتر بولاتىن سولتۇستىك ارال تەڭىزى ساقتالدى، وسى كەزەڭدە ۇلكەن ارال تەڭىزىنە شامامەن 40 ملرد تەكشە مەتر سۋ قۇيىلدى، – دەدى بولات بەكنياز.

مۇنىمەن قوسا جيىندا ارال وڭىرىندە شەشىمىن تابۋدى قاجەت ەتەتىن كوپتەگەن ەكولوگيالىق پروبلەمالارعا بايلانىستى  قوردى  الماتىدان قىزىلوردا قالاسىنا كوشىرۋ ماسەلەسى قوزعالدى.

جيىن سوڭىندا بولات بەكنياز ايماق باسشىسىنا ۇيىمداستىرىلعان كەزدەسۋ ءۇشىن العىس ايتىپ، الداعى ۋاقىتتا دا بىرلەسىپ جۇمىس اتقاراتىنىن جەتكىزدى.

سوڭعى جاڭالىقتار

ەلداناعا ەل ريزا

سپورت • كەشە

جۇمەكەننىڭ «بالاۋساسى»

رۋحانيات • كەشە

سۇيىسپەنشىلىك ساباعى

ايماقتار • كەشە

ۇقساس جاڭالىقتار