ايماقتار • 03 ناۋرىز، 2021

تورعايدا ءبىر اپتا جوعالعان جىلقىشى اتىنىڭ ارقاسىندا امان قالدى

452 رەت كورسەتىلدى

قوستاناي وبلىسىندا سوققان سوڭعى بوراندا جوعالىپ كەتىپ، ءبىر اپتادان كەيىن قاراعاندى وبلىسىنىڭ شەكاراسىنان تابىلعان 49 جاستاعى جىلقىشى امانگەلدى تۇرجانوۆ ەدى، دەپ حابارلايدى Egemen.kz

ايدالادا اجال اجداھاسىنداي قۇتىرعان دۇلەي بوراندا جانعا پانا بولارلىق ىق تاپپاي ءومىر مەن ءولىمنىڭ اراسىندا جانتالاسقان جانسەبىل جىلقىشى: «استىمداعى اتىم بولماسا، مەنى ەشكىم تابا الماس ەدى»، دەيدى.

20 اقپانداعى بوراندى كۇنى اۋعان تابىن جىلقىنىڭ سوڭىنان شىققان جىلقىشىنىڭ ءوزى دە ءىز-ءتۇزسىز جوعالىپ كەتتى. التى كۇنگە سوزىلعان ىزدەۋ شارالارى ەش ناتيجە بەرمەدى. اقىرى استانادان كومەككە جەتكەن تىكۇشاق استىنا توقىم توسەپ، ۇستىنە قار جامىلعان امانگەلدىنى 27 اقپان كۇنى عانا  تاپتى. قاسىنداعى اتى بولماعاندا قار استىندا جاتقان جىلقىشىنى تىكۇشاقتىڭ اۋەدەن بايقاي قويۋى ەكىتالاي ەكەن. 

قۇتقارۋشىلار امانگەلدىنى دەرەۋ جەزعازعان قالاسىنىڭ اۋرۋحاناسىنا جەتكىزگەن. ونىڭ ءوزىنىڭ ايتۋىنشا، قازىر جاعدايى ءتاۋىر. پالاتادا ءبىر ۇلى قاسىندا جاتىر. جىلقىشىنىڭ ءتورت ۇلى، ءبىر قىزى بار. ولار كۇن سايىن قوڭىراۋ شالىپ، اكەلەرىنىڭ امان قالعانىنا ءالى كۇنگە دەيىن سەنەر، سەنبەسىن بىلمەيتىنىن ايتادى ەكەن. 

– ءۇسىپ ءولىپ قالماۋ ءۇشىن دەنە جاتتىعۋىن جاسادىم. اتىم تەۋىپ-تەۋىپ قار ارشىپ بەرەدى، سول جەردەن شىققان ءشوپتى جەدىم. سوڭعى كۇندەرى بويداعى كۇشىم سارقىلىپ، كوزىمە مارقۇم انام ەلەستەي بەرەتىندەي كورىندى. اتا-بابامىز «اتتىنىڭ نەسىبەسى التاۋ» دەپ بەكەر ايتپاعان ەكەن، مەنى استىمداعى اتىم – احيللەس قۇتقارىپ قالدى. مەن بارىنەن بۇرىن اتىمنىڭ ءبىر ءسات جانىمنان كەتپەي قويعانىنا قاتتى تاڭعالدىم. ءبىر انىعى، مەن احيللەستىڭ ارقاسىندا ءتىرى قالىپپىن، – دەدى جىلقىشى.    

احيللەس قازىر ۇرپەك ماڭىنداعى قىستاۋدا. ال امانگەلدى اۋرۋحانادان شىعا سالىسىمەن، قايتادان جىلقىعا شىعامىن، ۇيدە وتىرا المايمىن، اتتىڭ قومىندا، جىلقىنىڭ جالىندا ءجۇرىپ ابدەن ۇيرەنىپ قالدىق قوي دەيدى. 

سوڭعى جاڭالىقتار

ەلداناعا ەل ريزا

سپورت • كەشە

جۇمەكەننىڭ «بالاۋساسى»

رۋحانيات • كەشە

سۇيىسپەنشىلىك ساباعى

ايماقتار • كەشە

ۇقساس جاڭالىقتار