تاۋەلسىزدىكتىڭ 30 جىلدىعىن مەرەكەلەۋگە وراي ناۋرىز ايى قازاقستاننىڭ ۇلتتىق ءداستۇرى مەن مادەنيەتىنىڭ مەرەكەسى رەتىندە بەكىتىلگەنى بەلگىلى. سوندىقتان دا شىعىس قازاقستان وبلىسىندا ناۋرىز تويىنا ازىرلىك ەرتە باستالدى.
«ناۋرىز-فيلوسوفيا» كورمەسىن ۇيىمداستىرۋشىلار مۋزەيدىڭ باعانالى زالىنا قازاق حالقىنىڭ سالت-ءداستۇرىن, بۇرىنعى تىرشىلىگىن ايشىقتايتىنداي تۋىندىلاردى جيناقتادى. ءار جۇمىس وزىنشە ەرەكشە. شاڭگەرەي ىبىراەۆتىڭ, الفيا مۋحامەديانوۆانىڭ اكۆارەلمەن مولدىرەتىپ جازعان سۋرەتتەرىنە ۇڭىلمەي ءوتۋ مۇمكىن ەمەس. كەلۋشىلەر دە بۇل كارتينالارعا جاقىننان ءبىر قاراپ, ءسال كەيىن شەگىنشەكتەي تاعى قىزىقتادى. سونىمەن قاتار گۇلنار بەكبەردينوۆا, تاتيانا لەونوۆالاردىڭ ناۋرىز مەرەكەسىنە ارنالعان گرافيكالىق كومپوزيتسيالارى دا فيلوسوفيالىق تۇرعىدا تەرەڭ ماعىناعا يە. ال تاريحي جانردا جازىپ جۇرگەن قايسان قادىربەكوۆتىڭ پولوتنولارى كورمەنىڭ كوركىن اشىپ تۇردى دەسەك, ارتىق ايتپاعاندىعىمىز.
سۋرەتشىلەر وداعىنىڭ مۇشەسى قايسان قادىربەكوۆ تارباعاتاي اۋدانى, تۇيىق اۋىلىنىڭ تۋماسى. وكىنىشتىسى, 1960 جىلدارى بۇقتىرما سۋ قويماسى اشىلىپ, تۋعان اۋىلى سۋ استىندا قالىپ كەتكەن. قىلقالام شەبەرى تۋعان اۋىلىنان اجىراپ قالعاندىقتان دا سۋرەتشىلىك جولدى تاڭداعان سياقتى.
– شىنىن ايتقاندا, تۋعان اۋىلىمنىڭ سۋ استىندا قالعانى جانىما قاتتى باتتى. سول كەزدەرى تەبىرەنىستەن, ساعىنىشتان اۋىلدىڭ سۋرەتىن سالاتىن ەدىم. كەيىن وسى باعىتتا وقۋ وقىدىم, ءبىلىم الدىم. بۇگىندە تاريحي جانردا ازدى-كوپتى كارتينالارىم بار, – دەيدى سۋرەتشى.
قايسان راحمەت ۇلىنىڭ ەڭبەكتەرى قازاقستان مۋزەيلەرىندە عانا ەمەس, الىس-جاقىن شەتەلدەرگە دە ساتىلعان. ايتۋىنشا, ەڭبەكتەرىنە سۇرانىس كوپ. ونەر مۋزەيىنە ۇسىنعان جۇمىستارى دا كوپشىلكتىڭ نازارىن اۋداردى. كوپشىلىك دەيمىز, سانيتارلىق تالاپتارعا بايلانىستى كوپ كورەرمەن جينالمادى. بىراق مۋزەي قىزمەتكەرلەرى بۇل كورمەگە الەۋمەتتىك جەلىدە ونلاين-ەكسكۋرسيا جۇرگىزىپ, ونەرسۇيەر قاۋىمعا تانىستىرماق نيەتتە.
