اقپاننىڭ باسىندا «بيپەك اۆتو – ازيا اۆتو» كاسىپورنىنىڭ جۇمىسشىلارى «جۇمىستان قىسقارتىلۋى مۇمكىن» دەگەن حابارلاما العان بولاتىن. سوندىقتان جەدەل تۇردە ولاردى ناپاقاسىز قالدىرماۋعا باعىتتالعان شارالار قولعا الىندى. سونىڭ ءبىرى, كاسىپورىننىڭ تسەحىندا وتكەن بوس ورىندار جارمەڭكەسى ەدى. جارمەڭكەگە قوستاناي جانە الماتى قالالارىنان كەلگەن «سارىارقااۆتوپروم» جانە «Astana Motors» سەكىلدى ەلىمىزدىڭ الپاۋىت اۆتوقۇراستىرۋشىلارىمەن قاتار, وڭىردەگى ءىرى كاسىپورىنداردىڭ وكىلدەرى دە قاتىستى.
– «بيپەك اۆتو – ازيا اۆتو» كاسىپورنى جۇمىسشىلارىنىڭ جۇمىسقا ورنالاسۋ ماسەلەسى وبلىس اكىمدىگىنىڭ باقىلاۋىندا. ايماق باسشىسىنىڭ توراعالىعىمەن وبلىستىق شتاب قۇرىلىپ, وعان كومپانيالار توبى مەن باسقا دا مۇددەلى مەملەكەتتىك ورگاندار وكىلدەرى ەندى. ۆەدومستۆوارالىق ۇيلەستىرۋ شارالارى ارقىلى كاسىپورىننىڭ سوتپەن بۇعاتتالعان شوتتارى اشىلىپ, قىزمەتكەرلەرگە ايلىق پەن كوممۋنالدىق تولەمدەردى تولەۋگە مۇمكىندىك جاسالدى. جۇمىسشىلاردىڭ جالاقىسىن 10 ناۋرىزعا دەيىن تولىق تولەۋ تۋرالى شەشىم قابىلداندى, – دەدى وبلىس اكىمىنىڭ ءبىرىنشى ورىنباسارى الماسحان سماتلاەۆ.
سونىمەن قاتار كۇن سايىن كومپانيا جۇمىسشىلارىنىڭ باسقا كاسىپورىندارعا جۇمىسقا ورنالاسۋ جايى باقىلانىپ, جاعداي جاسالادى. ناتيجەسىندە, جۇمىسسىز قالعان 1 969 جۇمىسشىنىڭ 1 355-ءى جۇمىسپەن قامتىلىپ, سانى 614-كە ازايدى. سونداي-اق قازىرگى ۋاقىتتا وبلىستاعى 51 ءىرى كاسىپورىندا 1 829 بوس ورىن بار. وعان قوسا ەلەكتروندى ەڭبەك بيرجاسىندا جۇمىسسىز قالعانداردىڭ ماماندىقتارىنا كەلەتىن 1 900-گە جۋىق بوس جۇمىس ورنى تىركەلگەن. بيزنەستىڭ الەۋمەتتىك جاۋاپكەرشىلىگى باعىتى بويىنشا وبلىستاعى ءىرى كومپانيالار دا بۇل ىستەن شەتكەرى قالعان جوق. وسىنداي ۇيىمداردىڭ ءبىرى «كەمونت» كاسىپورنى قازىرگى ۋاقىتتا زاۋىتتىڭ جۇمىسسىز قالعان 111 قىزمەتكەرىن جۇمىسپەن قامتۋ شارالارىن جۇرگىزۋدە. ايماقتىڭ اۆتوكولىك قۇراستىرۋ سالاسىنداعى بىلىكتى كادرلارىنا وزگە وڭىرلەردىڭ كومپانيالارى دا قىزىعۋشىلىق تانىتۋدا. اتاپ ايتساق, شىعىسقا ارنايى ىسساپارمەن قوستاناي وبلىسى اكىمىنىڭ ورىنباسارى ەرلان قويشىباەۆ پەن قازاقستاندىق اۆتوبيزنەستى دامىتۋ جانە ۇيىمداستىرۋ ۇيىمىنىڭ, «سارىارقااۆتوپروم» جانە «Astana Motors» كومپانيالارىنىڭ وكىلدەرى دە كەلىپ, ءوز ۇسىنىستارىن جاسادى.
– سوڭعى ءتورت جىل كولەمىندە وبلىستاعى اۆتوموبيل قۇراستىرۋ سالاسىندا وڭ ديناميكا بايقالادى. كوشباسشى سانالاتىن «سارىارقااۆتوپروم» كاسىپورنى قازىرگى ۋاقىتتا اۆتوكولىكتىڭ 40 ءتۇرىن, ونىڭ ىشىندە سەگىز برەندتىك مودەلدى قۇراستىرىپ جاتىر. 2018 جىلى – 12 مىڭ, 2019 جىلى – 25 مىڭ, ال وتكەن جىلى 40 مىڭ اۆتوكولىك قۇراستىرىلسا, بيىل بۇل كورسەتكىشتى 60 مىڭعا جەتكىزۋ كوزدەلگەن. بىزبەن بىرگە تراكتور مەن كومباين قۇراستىراتىن «اگروماشحولدينگ» كومپانياسىنىڭ وكىلدەرى دە كەلدى, – دەدى ە.قويشىباەۆ.
الداعى ۋاقىتتا قوستانايدا قۇرىلۋى كوزدەلگەن اۋىل شارۋاشىلىعى تەحنيكالارى مەن اۆتوموبيلدەرگە بولشەكتەر وندىرەتىن لوكاليزاتسيالىق ورتالىق 450 جۇمىس ورنىن قامتاماسىز ەتسە, يندۋستريالىق اۋماقتا ورنالاسقان «متز» جانە «پتز» زاۋىتتارى دا جۇمىسشىلاردى قابىلداۋعا دايىن. وسىلايشا, بوس ورىندار جارمەڭكەسىندە «بيپەك اۆتو – ازيا اۆتو» كاسىپورنى جۇمىسشىلارىن قوستاناي مەن الماتى وبلىستارىنا جۇمىسقا شاقىرعان قازاقستاندىق وندىرۋشىلەر بىرقاتار جاعىمدى ۇسىنىس جاسادى.
وسكەمەن
