پارلامەنت • 02 ناۋرىز، 2021

سەناتورلار مەملەكەتتىك ورگانداردىڭ كوكتەمگى سۋ تاسقىنىنا دايىندىعىن تالقىلادى

9 رەت كورسەتىلدى

سەناتور مۇحتار قۇل-مۇحاممەدتىڭ توراعالىق ەتۋىمەن حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسى بولدى. كەزدەسۋگە قاتىسۋشىلار توتەنشە جاعدايلار مينيسترلىگى مەن جەكەلەگەن وڭىرلەردىڭ كۇشتەرى مەن قۇرالدارىنىڭ كوكتەمگى سۋ تاسقىنى كەزەڭىنە دايىندىعىن تالقىلادى، دەپ حابارلايدى Egemen.kz.

«قازاقستاندا ءاربىر كوكتەم ايتارلىقتاي سۋ تاسقىنىمەن قاتار جۇرەدى. اسىرەسە اۋىل حالقى زارداپ شەگەدى. بيلىك جىل سايىن توتەنشە جاعدايعا دايىندىق تۋرالى ەسەپ بەرەدى، بىراق ۇلكەن سۋ كەلگەندە، ارقاشان كۇش پەن قاراجات جەتكىلىكسىز ءارى دايىندىق تا ناشار بولىپ شىعادى»، دەدى مۇحتار قۇل-مۇحاممەد.

ول سونداي-اق سەناتورلار وتكەن جىلى سۋ قاۋىپسىزدىگى تۋرالى ۇكىمەت ساعاتىن وتكىزۋ كەزىندە سۋ تاسقىنى قاۋپىنىڭ الدىن الۋ جونىندەگى ناقتى شارالار ۇسىنعانىن ەسكە سالدى.

توتەنشە جاعدايلار ءمينيسترى يۋري يلين ءوز سوزىندە مينيسترلىك 2017 جىلى اكىمدىكتەرمەن بىرلەسە وتىرىپ، كوكتەمگى سۋ تاسقىنىنا اسا بەيىم 905 ەلدى مەكەندى انىقتاعانىن اتاپ ءوتتى. بۇگىنگى كۇنى ەلىمىزدەگى 315 ەلدى مەكەننەن مۇنداي قاۋىپ الىنىپ تاستالدى جانە تاعى 314 ەلدى مەكەنگە قاۋىپ-قاتەر بارىنشا ازايتىلدى. ولاردا 350 مىڭنان استام ادام تۇراتىن 70 مىڭنان استام تۇرعىن ءۇي بار. ءمينيستردىڭ ايتۋىنشا، شەشىلمەگەن ماسەلەلەردىڭ ءبىرى – سۋ شارۋاشىلىعى قۇرىلىستارىنىڭ جاي-كۇيى بولىپ وتىر. وسىنداي 500-گە جۋىق گيدروتەحنيكالىق قۇرىلىستار قازىر جوندەۋدى جانە جاڭعىرتۋدى تالاپ ەتەدى.

كەزدەسۋ بارىسىندا شاراعا قاتىسۋشىلار سۋ تاسقىنى قاۋپىمەن كۇرەسكە وڭ اسەر ەتەتىن بىرقاتار ناقتى مىندەتتەردى شەشۋ قاجەتتىگىن اتاپ ءوتتى. اتاپ ايتقاندا، سۋدان قورعاۋ ايماقتارى مەن بەلدەۋلەرى ماڭايىندا ورنالاسقان ۇيلەر مەن وبەكتىلەردىڭ سۋدا قالۋىنا جول بەرمەۋ ءۇشىن ەلدى مەكەندەر قۇرىلىسىن جوسپارلاۋدى جاقسارتۋ اسا ماڭىزدى. جولداردى جوبالاۋ، سالۋ، جاڭعىرتۋ، جوندەۋ جانە پايدالانۋ كەزىندە تابيعي-كليماتتىق فاكتورلار دا ەسكەرىلگەنى ءجون. ودان باسقا، كوپ سالالى زەرتتەۋلەر جۇرگىزىلۋى ءتيىس جانە بوگەتتەردىڭ قاۋىپسىزدىگى دەكلاراتسياسىن ازىرلەۋدى قارجىلاندىرۋدى ءبولۋ كەرەك.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ەرلىككە تولى سۋرەتتەر

رۋحانيات • كەشە

ۇقساس جاڭالىقتار