ەكونوميكا • 02 ناۋرىز، 2021

قازاقستان مەن قىتاي اراسىنداعى شەكارالىق وتكەلدەردە بولاتىن پروبلەمالىق ماسەلەلەر رەتتەلەدى

19 رەت كورسەتىلدى

قازاقستان مەن قىتاي اراسىنداعى شەكارالىق وتكەلدەردە كولىك قۇرالدارى مەن ۆاگوندار تۇرىپ قالاتىن پروبلەمانى رەتتەۋ قر يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك كاماليەۆتىڭ قحر كوممەرتسيا ءمينيسترىنىڭ ورىنباسارى ۆان شوۋۆەنمەن ەكىجاقتى كەلىسسوزدەرىندە باستى تاقىرىپ بولدى، دەپ حابارلايدى Egemen.kz.

قىتاي جاعى 2020 جىلدىڭ قورىتىندىسىندا قر مەن قحر اراسىنداعى تەمىر جول كولىگىمەن جۇك تاسىمالداۋ كولەمى 23% (21،6 ملن.توننا) جانە ترانزيتتىك تاسىمال 22% (7،8 ملن. توننا) وسكەنىن حابارلادى.

قىتاي-ەۋروپا-قىتاي باعىتى بويىنشا كونتەينەرلىك تاسىمالدار 55% ارتتى.

الايدا، بۇگىنگى تاڭدا شىڭجاڭ-ۇيعىر اۆتونوميالىق ايماعىنداعى كارانتيندىك شارالارعا بايلانىستى قحر باعىتىندا ۆاگوندار ۇزاق ۋاقىت تۇرىپ قالۋدا. بۇدان باسقا، 2020 جىلعى 15 قاراشادان باستاپ قىتاي تاراپىنان ازىق-ت ۇلىك جۇكتەرىن (بيداي، زىعىر تۇقىمى، مايلى داقىلدار تۇقىمى، كۇنباعىس تۇقىمى، سويا تۇقىمى، ارپا، ءشوپ، بيداي ۇنى، بيداي كەبەگى، كۇنباعىس مايى) قابىلداۋ توقتاتىلدى.

الەمدىك پاندەمياعا بايلانىستى كارانتيندىك شارالارعا بايلانىستى قازىرگى ۋاقىتتا "قالجات-دۋلاتى" جانە "مايقاپشاعاي-زيمۇناي" وتكىزۋ بەكەتتەرى جۇمىس ىستەمەيدى. "نۇر-جولى - قورعاس"، "دوستىق - الاشانكوۋ" جانە "باقتى - پوكيتۋ"وتكىزۋ بەكەتتەرى شەكتەۋلەرمەن جۇمىس ىستەپ جاتىر. بۇل جاعداي جۇكتەردى اۆتوموبيل كولىگىمەن ەكى جاقتى تاسىمالداۋعا كەرى اسەرىن تيگىزدى.

قىتاي جاعىنا "قالجات - دۋلاتى"، "مايقاپشاعاي - زيمۇناي" وتكىزۋ بەكەتتەرىنىڭ جۇمىسىن قايتا جاڭعىرتۋ، سونداي-اق كولىك قۇرالدارىن وتكىزۋدىڭ قولدانىستاعى تەتىگىن وزگەرتۋ ارقىلى "نۇر-جولى - قورعاس" وتكىزۋ بەكەتتەرىنەن اۆتوكولىكتەردى وتكىزۋ سانىن تاۋلىگىنە 200-گە دەيىن ۇلعايتۋ جونىندەگى ماسەلەنى قاراۋ ۇسىنىلدى.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار