پرەزيدەنت • 02 ناۋرىز، 2021

قازاقستان مەن قىرعىزستان پرەزيدەنتتەرى جۋرناليستەر ءۇشىن بىرلەسكەن ءباسپاسوز ءماسليحاتىن وتكىزدى

19 رەت كورسەتىلدى

شاعىن جانە كەڭەيتىلگەن قۇرامداعى ەكىجاقتى كەلىسسوزدەردىڭ قورىتىندىسى بويىنشا قاسىم-جومارت توقاەۆ پەن سادىر جاپاروۆ بۇقارالىق اقپارات قۇرالدارى ءۇشىن بىرلەسكەن ءباسپاسوز ءماسليحاتىن وتكىزدى، دەپ حابارلايدى Egemen.kz.

قاسىم-جومارت توقاەۆ سادىر جاپاروۆتىڭ قىرعىزستان پرەزيدەنتى رەتىندە قازاقستانعا جاساعان العاشقى مەملەكەتتىك ساپارىن قازاق ەلىنە كورسەتىلگەن ايرىقشا قۇرمەتى دەپ باعالايتىنىن ايتتى.

– قىرعىزستان – ءبىز ءۇشىن وداقتاس مەملەكەت، سونداي-اق، تاتۋ كورشى، باۋىرلاس ەل ءارى سەنىمدى سەرىكتەس، – دەدى قازاقستان پرەزيدەنتى.

قاسىم-جومارت توقاەۆ ەكى اعايىن ەلدىڭ قارىم-قاتىناسىن دامىتۋعا ولشەۋسىز ۇلەس قوسقان قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ تاريحي ءرولىن ەرەكشە اتاپ ءوتتى.

مەملەكەت باسشىسى قىرعىزستان پرەزيدەنتىنىڭ بۇل ساپارى قوس مەملەكەتتىڭ تاۋەلسىزدىك العانىنا 30 جىل تولعان مەرەيلى كەزەڭىمەن تۇسپا-تۇس كەلۋىنىڭ سيمۆولدىق ءمانى بار ەكەنىن ايتىپ، بۇگىنگى كەلىسسوزدەر قورىتىندىسى قازاق-قىرعىز ستراتەگيالىق سەرىكتەستىگىن دامىتۋعا تىڭ سەرپىن بەرەتىنىنە سەنىم ءبىلدىردى.

– ساياسي، ەكونوميكالىق، گۋمانيتارلىق جانە اسكەري-تەحنيكالىق سالالارداعى مۇددەمىز ۇقساس. وسى ۋاقىتقا دەيىن ەكى ەل اراسىندا 180-گە جۋىق قۇجاتقا قول قويىلعان. ءبىز بۇگىن دە بىرلەسكەن مالىمدەمە قابىلداپ، بىرقاتار ماڭىزدى كەلىسىم-شارتقا قول قويدىق. قازاقستان مەن قىرعىزستان ەۋرازيا ەكونوميكالىق وداعى اياسىندا بەلسەندى ارەكەت ەتۋدە. ورتالىق ازياداعى تۇراقتىلىق پەن قاۋىپسىزدىكتى ساقتاۋ ءۇشىن اۋقىمدى جۇمىستاردى بىرگە اتقارىپ كەلەمىز، – دەدى قاسىم-جومارت توقاەۆ.

كەلىسسوزدەر بارىسىندا كوروناۆيرۋسقا قارسى بىرلەسكەن جۇمىستار تالقىلاندى. قازاقستان قىرعىز حالقىنا كەزەكتى گۋمانيتارلىق كومەك رەتىندە مەديتسينالىق قۇرالدار مەن ءدارى-دارمەكتەر جولداۋعا دايىن ەكەنىن راستادى. سونىمەن قاتار مەملەكەت باسشىسى قىرعىزستاننىڭ قارۋلى كۇشتەرىنە اسكەري-تەحنيكالىق كومەك كورسەتىلەتىنىن مالىمدەدى.

قاسىم-جومارت توقاەۆ قازاقستان قىرعىزستاننىڭ ەڭ ءىرى ساۋدا سەرىكتەستەرىنىڭ ءبىرى جانە كوش باستاۋشى ينۆەستورلارىنىڭ قاتارىنا كىرەتىنىن جەتكىزدى.

– ءبىز سوڭعى 15 جىلدا بۇل ەلگە 1 ميلليارد دوللاردان استام قارجى قۇيدىق. قازاق ينۆەستورلارى قىرعىز ەكونوميكاسىنىڭ ماڭىزدى سالالارىن وركەندەتۋگە، الەۋمەتتىك احۋالىن جاقسارتۋعا قوماقتى ۇلەس قوسىپ كەلەدى. اتاپ ايتقاندا جاڭا جۇمىس ورىندارىن اشىپ، ءوندىرىس سەكتورى مەن قارجى نارىعىن دامىتۋعا ەرەكشە كوڭىل بولۋدە. وسى ورايدا ءبىز ءوزارا ينۆەستيتسيالاردى قولداۋعا جانە قورعاۋعا كەلىستىك، – دەدى قازاقستان پرەزيدەنتى.

مەملەكەت باسشىسى ساۋدا كەدەرگىلەرىن ازايتۋ، ەكى ەلدىڭ كەدەن جانە سالىق ورگاندارى اراسىنداعى ءوزارا ءىس-قيمىلدى نىعايتۋ، ولاردىڭ جۇمىسىنا تسيفرلىق تەحنولوگيا ەنگىزۋ جونىندە كەلىسىم جاسالعانىن جەتكىزدى.

قاسىم-جومارت توقاەۆ ەكى ەلدىڭ ەكسپورتتىق الەۋەتىن نىعايتىپ، شاعىن جانە ورتا بيزنەس اراسىنداعى بايلانىستاردى كەڭەيتۋ ءۇشىن جاقىن ارادا قازاقستان دەلەگاتسياسى قىرعىزستانعا ارنايى ساپارمەن باراتىنىن اتاپ ءوتتى. 

ەكىجاقتى بايلانىستاردىڭ كۇن تارتىبىندەگى ماڭىزدى مىندەتتىڭ ءبىرى – ازاماتتاردىڭ بارىس-كەلىسى مەن الىس-بەرىسىن جاقسارتۋ.

– وسى رەتتە شەكارا بەكەتتەرىنىڭ وتكىزۋ مۇمكىندىگىن ارتتىرۋ ءۇشىن شارالار قابىلدانۋدا. مىسالى ەڭ ءىرى «قورداي» (اقجول) بەكەتىن جاڭعىرتۋ جۇمىستارى – سونىڭ ايقىن دالەلى. ەندى جۇرتتىڭ شەكارادان قينالماي وتۋىنە جاعداي جاسالماق. بەكەتتىڭ جابدىقتارى جاڭارتىلدى. 8 جولاقتى اۆتوجول سالدىق. بۇل جۇمىس ءوز جالعاسىن تابادى. پاسپورتتىق-باقىلاۋ رەجيمىن جەتىلدىردىك. مۇنىڭ بارلىعى ەكى ەل اراسىنداعى جولاۋشىلار مەن كولىكتەردىڭ سانىن ەداۋىر ارتتىرۋعا مۇمكىندىك بەرەدى. قازاقستان بۇل نىساندى جاقىن ارادا اشۋعا دايىن. كەلىسىم بويىنشا، قىرعىز تاراپى دا ءتيىستى جۇمىستى تەز ارادا اياقتايتىن بولدى، – دەدى مەملەكەت باسشىسى.

قازاقستان پرەزيدەنتى ءوزارا بايلانىستى نىعايتۋ ءۇشىن ىرگەلەس جاتقان ايماقتاردىڭ ىنتىماقتاستىق اياسىن كەڭەيتۋ جونىندە كەلىسىم جاسالعانىنا توقتالدى. ونىڭ ايتۋىنشا، وڭىرارالىق ىنتىماقتاستىقتىڭ ءبىرىنشى فورۋمىن جۋىق ارادا وتكىزۋ قاجەت، سونداي-اق، شەكارا ماڭىندا تاۋاردى رەسىمدەپ، وڭدەيتىن ساۋدا-لوگيستيكالىق ورتالىق قۇرۋ كەرەك.

كەلىسسوزدەردەگى تاعى ءبىر وزەكتى ماسەلە – سۋ-ەنەرگەتيكا سالاسىنداعى ىقپالداستىق.

– اتاپ وتەتىن جايت، بۇگىندە شۋ جانە تالاس وزەندەرىنىڭ اڭعارى بويىنشا ىقپالداستىعىمىز كوپتەگەن ەلگە ۇلگى بولىپ وتىر. مەملەكەتارالىق سۋ شارۋاشىلىعى نىساندارىن پايدالانۋ جونىندەگى بىرلەسكەن كوميسسيامىز بار. قازاقستان بۇل نىسانداردى جوندەۋ جانە پايدالانۋ جۇمىستارىنا جىل سايىن قارجىلاي كومەك كورسەتىپ وتىر. سوڭعى ون جىلدا وسى ماقساتقا 1 ميلليارد تەڭگەدەن استام قاراجات  بولدىك. ءبىز اتالعان ماسەلە بويىنشا جۇمىستى ەكىجاقتى فورماتتا، سونداي-اق، وڭىردەگى باسقا دا ارىپتەستەرىمىزبەن جالعاستىرامىز. وزەندەر بويىنشا ءبىز ءوزارا ءتيىمدى ءىس-قيمىل جاساۋىمىز كەرەك، سوندا عانا ەشقانداي كەلىسپەۋشىلىك بولمايدى، – دەدى قاسىم-جومارت توقاەۆ.

مەملەكەت باسشىسى ءوز سوزىندە مادەني-گۋمانيتارلىق ىنتىماقتاستىقتىڭ پەرسپەكتيۆالارىنا دا توقتالدى.

– قازاقستان مەن قىرعىزستاننىڭ مادەني كۇندەرىن وتكىزۋگە ۋاعدالاستىق. بىشكەكتە ابايعا، نۇر-سۇلتان قالاسىندا ماناس پەن شىڭعىس ايتماتوۆقا ارنالعان ەسكەرتكىشتەر بوي كوتەرەدى. وعان قوسا بىرەگەي تاريحي مۇرالارىمىزدى دارىپتەۋ ءۇشىن كۇش-جىگەرىمىزدى جۇمىلدىراتىن بولدىق، – دەدى قازاقستان پرەزيدەنتى.

كەلىسسوزدەر قورىتىندىسى بويىنشا ەكى ەل جاستارىنىڭ اراسىنداعى بايلانىستاردى جانداندىرۋعا ۋاعدالاستىق جاسالدى. مەملەكەت باسشىسى ەلىمىزدىڭ جوعارى وقۋ ورىندارىندا قىرعىز جاستارىنا بولىنەتىن ءبىلىم كۆوتاسىن 10  ەسەگە كوبەيتۋ جونىندە تاپسىرما بەرگەنىن، سونىڭ ارقاسىندا مۇنداي گرانتتاردىڭ  سانى 50-گە جەتەتىنىن، سونداي-اق، بىشكەكتە قازاقستاننىڭ بەدەلدى جوعارى وقۋ ورنىنىڭ فيليالىن اشۋ تۋرالى باستامانىڭ قاراستىرىلىپ جاتقانىن ايتتى.

قازاقستان مەن قىرعىزستاننىڭ كوشباسشىلارى وڭىرلىك جانە جاھاندىق ماسەلەلەر جونىندە پىكىر الماستى. قاسىم-جومارت توقاەۆتىڭ پىكىرىنشە، كوپتەگەن ماسەلەلەر بويىنشا ەكى ەلدىڭ ۇستانىمدارى ۇقساس. ورتالىق ازيا ەلدەرى باسشىلارىنىڭ كونسۋلتاتيۆتىك كەزدەسۋىن ودان ءارى دامىتۋدىڭ ماڭىزدىلىعى ايتىلدى. مەملەكەت باسشىسى ازياداعى ءوزارا ىقپالداستىق جانە سەنىم شارالارى كەڭەسىنىڭ الەۋەتىن نىعايتۋ جونىندەگى قازاقستاننىڭ باستاماسىنا قولداۋ كورسەتكەنى ءۇشىن سادىر جاپاروۆقا ريزاشىلىعىن ءبىلدىردى.

پرەزيدەنت ءسوزىنىڭ سوڭىندا كەلىسسوز قورىتىندىسى قازاقستان مەن قىرعىزستان اراسىنداعى دوستىق، سەنىم جانە تاتۋ كورشىلىككە قۇرىلعان قارىم-قاتىناستاردى قوس تاراپ تا ودان ءارى نىعايتا بەرۋگە بەيىلدى ەكەنىن كورسەتتى دەدى.

– ءبىزدىڭ مەملەكەتتەرىمىز بەن حالىقتارىمىز توننىڭ ىشكى باۋىنداي ارالاسىپ كەتكەن. بۇل جۇرتتىڭ بارىنە بەلگىلى. مەملەكەت باسشىلارىنىڭ مىندەتى – ەكىجاقتى قارىم-قاتىناستاردى ىنتىماقتاستىقتىڭ ۇلگىلى مودەلىنە اينالدىرۋ. بۇگىنگى كەلىسسوزدەر اتالعان ماقساتتى شەشۋگە ارنالدى. پىكىر الماسۋلار وتە پايدالى ءارى تابىستى بولدى. ءبىز ەكىجاقتى ىنتىماقتاستىقتىڭ باستى باعىتتارىن ايقىندادىق، وڭىرلىك جانە حالىقارالىق قۇرىلىمدار اياسىنداعى ءىس-قيمىلداردى ارتتىرۋ ماسەلەسىن تالقىلادىق. ەكى ەل اراسىنداعى ىقپالداستىق بويىنشا كەز كەلگەن ماسەلەنى باۋىرلاس حالىقتاردىڭ ەجەلدەن قالىپتاسقان مۇددەلەرىن ەسكەرە وتىرىپ، شۇعىل شەشۋگە كەلىستىك. قىرعىزستان پرەزيدەنتى سادىر نۋرگوجو ۇلى جاپاروۆتىڭ ساپارى تابىستى ءوتتى دەپ ايتۋعا تولىق نەگىز بار، – دەدى قاسىم-جومارت توقاەۆ.

سوڭعى جاڭالىقتار

كۇلشە قىز

تەاتر • بۇگىن، 09:25

گۇلدەردىڭ سىرىن ۇققان...

ونەر • بۇگىن، 09:24

قالدىقتى كادەگە جاراتتى

ايماقتار • بۇگىن، 09:22

اقىلى اۆتوجول كوبەيدى

قازاقستان • بۇگىن، 09:18

Digital تەڭسىزدىك

تەحنولوگيا • بۇگىن، 09:14

ەلىن سۇيگەن ەرەن ەر

تاريح • بۇگىن، 09:11

راسيمانىڭ ءاسۇيى

قوعام • بۇگىن، 09:07

الاكولگە پويىزبەن بارۋعا بولادى

ايماقتار • بۇگىن، 09:01

اسارلاتىپ التىنشى ءۇي سالدى

ايماقتار • بۇگىن، 09:00

1500 وتباسى باسپانالى بولادى

ايماقتار • بۇگىن، 08:58

ۇلى مۇرات ۇستىنى

پىكىر • بۇگىن، 08:54

ادامزاتقا قالتقىسىز قىزمەت

تانىم • بۇگىن، 08:42

شىناشاقتاي سپورتشى شىندىعى

سپورت • بۇگىن، 08:39

قانداستار ءوز ورتامىزعا ورالدى

قازاقستان • بۇگىن، 08:33

جاڭا جوبالاردى تانىستىردى

قازاقستان • بۇگىن، 08:27

كۇزدە – حالىق ساناعى

قازاقستان • بۇگىن، 07:58

مەيىرىم ەكەن عوي

ونەر • كەشە

ءانۋار الەمى

ونەر • كەشە

بوياۋلار قۇپياسى

ونەر • كەشە

ۇقساس جاڭالىقتار