جاقىندا شىعىس قازاقستان وبلىسى تارباعاتاي اۋىلىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى فيلولوگيا فاكۋلتەتىنىڭ دوتسەنتى, فيلولوگيا عىلىمدارىنىڭ كانديداتى, ايتىسكەر اقىن سەرىكزات دۇيسەنعازى اتىنداعى قازاق ءتىلى كابينەتىنىڭ اشىلۋ سالتاناتى ءوتتى. جەرلەسىمىزبەن بىرگە كەلگەن تانىمال اقىن قالقامان سارين, ايتىسكەر قىزدارىمىز اينۇر تۇرسىنباەۆا, سارا توقتامىسوۆالارمەن كەزدەسۋ اۋىل تۇرعىندارى مەن وقۋشىلاردى قۋانىشقا بولەدى.
جاقىندا شىعىس قازاقستان وبلىسى تارباعاتاي اۋىلىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى فيلولوگيا فاكۋلتەتىنىڭ دوتسەنتى, فيلولوگيا عىلىمدارىنىڭ كانديداتى, ايتىسكەر اقىن سەرىكزات دۇيسەنعازى اتىنداعى قازاق ءتىلى كابينەتىنىڭ اشىلۋ سالتاناتى ءوتتى. جەرلەسىمىزبەن بىرگە كەلگەن تانىمال اقىن قالقامان سارين, ايتىسكەر قىزدارىمىز اينۇر تۇرسىنباەۆا, سارا توقتامىسوۆالارمەن كەزدەسۋ اۋىل تۇرعىندارى مەن وقۋشىلاردى قۋانىشقا بولەدى.
كەزدەسۋدە اۋدان اكىمىنىڭ ورىنباسارى نۇرجان مولداشەۆ شاقىرۋدى قابىل العان سەرىكزات ماقسۇت ۇلىنا حالىق اتىنان راحمەتىن ايتىپ, ريزاشىلىعىن ءبىلدىردى.
كەلەسى كەزەكتە ءسوز العان سەرىكزات ماقسۇت ۇلى:«مەن كاسىپكەر ەمەسپىن, بۇل كابينەتكە ءۇيىپ-توگىپ دۇنيە اكەلىپ بەرەمىن دەپ ۋادە ەتە المايمىن. بىراق كەرەكتى كىتاپتار مەن كورنەكىلىك قۇرالدار جاعىنان كومەكتەسىپ تۇرامىن», دەدى. سونىمەن بىرگە, الا كەلگەن ادەبي-عىلىمي كىتاپتارىن, ءوزى ءسوزىن جازعان اندەر جيناعىن كابينەتكە تارتۋ ەتتى. كەزەگىمەن ءسوز العان اۋىل اقساقالى ساپار وزبەكوۆ قوناقتارعا العىس ايتىپ, اق جول تىلەدى.
وسىدان كەيىن شارا اياگوز قالاسىندا جالعاسىن تاپتى. قوناقتار مۇندا جاڭادان سالىنىپ پايدالانۋعا بەرىلگەن 200 ورىندىق بالاباقشا مەن سەمەي وبلىستىق تاريحي-ولكەتانۋ مۇراجايىنىڭ اياگوز قالاسىنداعى فيليالىنىڭ اشىلۋىنا قاتىستى. بۇلدىرشىندەردىڭ قۋانىشىن ەسەلەيتىن تاربيە ورداسىن قابىلداپ الۋ سالتاناتىنا شىعىس قازاقستان وبلىسى اكىمىنىڭ ورىنباسارى نۇرىمبەت ساقتاعانوۆ, اۋدان اكىمى نۇربول نۇرعاليەۆ, اقىن, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى نەسىپبەك ايت ۇلى, جازۋشى, قازاقستاننىڭ ەڭبەك سىڭىرگەن قايراتكەرى سۇلتان ورازالين تەبىرەنە ءسوز سويلەدى.
شىعىس قازاقستان وبلىسىنىڭ اكىمى بەردىبەك ساپارباەۆتىڭ «تۋعان جەرگە تاعزىم» اكتسياسىنىڭ اياسىندا اياگوز قالاسىنىڭ قاق ورتاسىندا ورنالاسقان «جاستار» ساياباعىندا بوي كوتەرگەن ماحاببات سيمۆولى «قوزى كورپەش-بايان سۇلۋ» ەسكەرتكىشىنىڭ اشىلۋىنا كوپشىلىكتىڭ كۋاگەر بولعانىنا دا ءبىراز ۋاقىت ءوتتى. سول قوس عاشىقتىڭ ماحابباتىن تۋ ەتكەن رەسپۋبليكالىق «ماڭگىلىك ماحاببات» اتتى اقىندار ءمۇشايراسىنىڭ قورىتىندى كەشى دە وسى كۇنى مارەسىنە جەتتى. بۇل مادەني شارانىڭ قورىتىندىسى بويىنشا ارقالى اقىن, قازاقستاننىڭ ەڭبەك سىڭىرگەن قايراتكەرى سەرىك اقسۇڭقار ۇلى ءبىرىنشى ورىنعا يە بولىپ, 500 مىڭ تەڭگە سىياقى الدى. ەكىنشى ورىن حالىقارالىق «شابىت» فەستيۆالىنىڭ جۇلدەگەرى ەرلان جۇنىسكە بۇيىرىپ, 300 مىڭ تەڭگەگە يە بولدى. ءۇشىنشى ورىندى «التىن قالام-2011» ادەبي سىيلىعىنىڭ يەگەرى, جاس اقىن ولجاس قاسىم يەلەندى. ول 200 مىڭ تەڭگە سىياقىمەن ماراپاتتالدى.
بەكەن مالدىباەۆ,
ءاليا كوشكىمباەۆا.
شىعىس قازاقستان وبلىسى,
اياگوز اۋدانى.
